¹ Yoshua mwaana gwa Nuni, gubatumine batu babili uhuma haya Shitimu wa bubisa, yulu ya udinda, gubasambile, Giwe ugilola gino sii, na Yeliko. Bagile bahiile mnda ndu gya gumwe sengu chinalyage Lahabu, balalile uya. ² Oolo ly Yeliko lisambilwe mwano, ugana, Loola, batu bopi ba baana ba Isilaeli bagingila lino mno m'busugu, yulu ya udinda sii. ³ Oolo lya Yeliko lihilile batu wa Lahabu, guganine, Batobole batu baya bene bachwa obe, bagingila mnda ndu gyobe, bululi bachwa udinda sii. ⁴ Guya mmachana gubaguhile baya batu bopi, nuubabisa, guganine, Ehe, baya batu bachwa wanyi alakini nishigidi wabahuma; ⁵ mabele mengo ma ubugalwa wa limbwa lya mbuga, hasibele mdo, baya batu bahumine, na nishigidi wabagile; balamwe abilo, bululi mwibawata. ⁶ Alakini gee gubele m'baseche u butato, gubabisile na ubahupa bihupi bya byaanyi, byelibele mmupe hegulu ha butato. ⁷ Bibyo baya batu babalamine u ndila gyugya Yolodani ndaa na u byabu; na haya baya batu bene babalamine habahwile uhuma, babugule limbwa. ⁸ Iyaka hambele bashinalala gubagilile uya hegulu ha butato, ⁹ gubasambile, baya balumyana, Nene nigidi ugana Mlume gwamma gino sii, na ugana booba bwatugingilila yulu yenyu, na ugana bashami bose ba gino sii bisumbuluwa u mbele wenyu. ¹⁰ Bululi tuhuliche Mlue byeliguminye maadi ma bahali lya Shamu u mele wenyu, haya hamuhumine Misili, iyaka bhishi biya byamubagilie ba maoolo mabili ma Baamoli bene babele uya m'bwala mwa Yolodani, noo,Sihoni na Ogu, bamuchiminye abisa. ¹¹ Na hatuhuliche bibyo mitima gyetu gidandile, na hashishigele uoma o ose u mtu ge gese, wa yulu yenyu; bululi Mlume, Abetcha enyu, oo noo Abetcha, hegulu ha gulu na hasi ha sii. ¹² Bino hano, nihumtendelela, ndahilwe pa yulu ya Mlume, bululi namgilia byandihusimba uba, wa ugana na benywe mwigila wa byamulihusimba uba ndu gya tata; iyaka pewe ihwicho ya uwilila; ¹³ ugana mwimmonya tata uba na mwego na mago, na bashiwetu malumyana na baachana, n bibya byose byabali nabyo, na uluhonya luhuda lwetu na luubu. ¹⁴ Baya balumyana bamsambile, Mwego gwetu gubi mwego gwenyu, uba mushilisamba mwano gwa bino bigilanya byetu; hanyuma bibi, mengo mene mituha Mlume gino sii, twiugilila wa usimba na wa uwilila. ¹⁵ Haho gubasadiche u mgochi u dilisha, bululi ndu gyage gibele wibambacha ya mbuga; nage gubele hushama wibambacha, ¹⁶ Gubasambile, Giwe hiswe u loono, baya benebalihummenga bashichwe ubwata; mwalibise uya msugu matatu naa nabaya bene balihummenga byabigiwila; hanyuma noo mwabegya lwenyu. ¹⁷ Baya balumyana bamsambile, Besw tushihuunda uba abachi yulu ya uno ulaha pa wawatulahya pa. ¹⁸ Lingamina, hatwigingila mnda gino sii, hamba guno mgochi gwa gugachichu u lino dilisha lyine lyawatusadicha walili; na gogwe wabasumbiche obe mndu gyobe, sobe, na mnobe, na bashiwenyu, na batu bose ba ndu ya sobe. ¹⁹ Nambo habi mtu ge gese mine gwihuma mnda ndu gyobe na ugya u ndila, maashi mage mabi hegulu ha mswe gwage gee mine, beswetushibi na abachi; na mtu ge gese mine gubi mnda ndu gyobe maashi mage mabi hegulu ha miswe gyetu, nambo uboo mtu ubem'bongola. ²⁰ Alakini gogwe ubelisamba guno mwano, haho noo hatushibi na abachi, yulu ya uno ulaha wawatulahya pa. ²¹ Nage Lahabu guganine, Na bibe bibyo nahi byabili binywa byenyu. Gubatotole, nabo nuugya lwabo; nage nuguhamba guya mgochi gwa gugachichu u dilisha. ²² babo batu bagile, bahiile u loono, bashamine uya masugu matatu, ndaa nabaya batu benebabele hubalama byabagiwile; baya babele hubalama babaengile u madila maya mose, alakini bashibamonine. ²³ Hanyuma baya batu bagiwile, basalile luya loono, badabwile, bahyiile uli Yoshua, mwaana gwa Nuni, nabo bamsambile mwano gwa bikoko byose bihitiye wabali. ²⁴ Bamsambile Yoshua, Chigilwe Mlume gwabiya sii gyose mnda maboo metu; iyaka wuhima bibyo bashami ba gigyo sii badidibuwa mitima tulu yetu.