¹ Haho Bildadi gugo Mshuhi gugaile, na guganine, ² Gogwe widogoma bino binywa ata na mengo nai? Binywa bya anywa obe bibi nahi mnaga ata mengo nai? ³ Wi wii! Abetcha asugobeya uonona? Ao, gugo Mine na uoma ose gusugobeya bya kiine? ⁴ Ugana baana bobe bagilile buubi, Nage gwababiya mmuboo Mwa buubi bwabo; ⁵ Gogwe ubemmenga Abetcha wa alima kelela, Na utongelela gugo Mine na uoma ose; ⁶ Nambo gogwe uli mmaha na minene; Chigilwe gee hano gwababyula yulu yobe, Na gwabaita bushamo bobe bwa kiineuginunywa. ⁷ Iyaka inangwa uya ubutulilo bobe bubele bucho, Ata bibyo isula yobe yababula abisa. ⁸ Biino, ubabuche, ibumbu ino, bibushi byaala, Engelecha na ulingamine biya bamasobe byabaengile; ⁹ (Bululi beswe tuli ba mna akeshi ka, na tushigidi atu, Bululi masugu metu hano ha mgala malinahi ihochu ka;) ¹⁰ Wi wii! Babo bashiugigya na uuganina, Na udogoma binywa byine bilihuhuma mnda mitima gyabo? ¹¹ Wi wii! tulonge-longe tunamena hashi biswaswa? Na luso lunamena hashi maadi? ¹² Byahuba byili bibisi, na bisaguma, Bisuhonga hambele ha binge byaanyi. ¹³ Noo bili isula ya baya bene bali humgibilila Abetcha; Na maudagilo mage mabii gugo masuchimina; ¹⁴ Na uoma wage winogeya, Na maudagilo mage gugo ii nahi bunyushi bwa tande-tande. ¹⁵ Gwiudagila ndu gyge, gishigimana; Gwiliwatilicha wagili, nagyo gishihama. ¹⁶ Gee iimti gwa gubisi u chuba, Na maotele mage masudagalala mlubala lwage. ¹⁷ Michinga gyage gisuchunguluwa yulugulu, na uhugulwila luubi lwa mawe. ¹⁸ Ata bibyo gabechulwa ha ihana yage, Naho himmanya ugana Nene nishiumonine. ¹⁹ Loola, saso lya ndila gyage noo gino, Na bange bimena uhuma m'bitete. ²⁰ Loola, Abetcha gushimtele mtu gwa m'bwilile, Na gushibagimiya ba ngila biibi. ²¹ Haho gwigilucha anywa obe na aseo, Na milomo gyobe gwigigilucha na useelela. ²² Baya bene bali huuonywa bichwiiwa abule; Na itula yage ngila biibe ishibi ho iyaka.