¹ Haho Ayubu gugaile, na ugana, ² Winene nigidi ugana noo bibyo; Ata bibyo mtu gusuba gwa kiine wi u mbele wa Abetcha? ³ Nambo gabebenja uhumana nage, Gushinaosha umgaa inywa imwechi hawingi ha uki. ⁴ Gee gwina lwengu mnda mtima, nangwina uosha mnda uoma; Mnayni guliitile uba mtu mgumu yulu yage nage gugililwe? ⁵ Gusuchihunya koono, nacho chishi na mwano, Gusuchitipula wa sungu chage. ⁶ Gusudigicha sii gihumeha ihana yage, Na bihanda byage udanda. ⁷ Gususambila chuba, nalyo lishibatobowa; Nato tumbala-mbala gusutubiya yaala. ⁸ Gee buchima bwage noo gusuganda gulu, Nauhyilila mabimbi ma bahali. ⁹ Gee gusuita tumbala-mbala twa Mlunga, na Olioni, na iyo Kilimia, Na bihichi bya tumbala-mbala twa luubi lwa uboo wa ulume. ¹⁰ Gusugila bihisho bya byata byine bishibaengwa; Ehe, bihisho bya bisaga byine bishibabalwa. ¹¹ Loola, guluhugyata hoka nanyi, na nishihummona; Iyaka gulihuhita ugya hambele hanyi na nishihummana. ¹² Loola, gulihuwata, mnanyi gumaosha umchibila. Mnanyi gunaosha um'bucha Wagila ii? ¹³ Abetcha gushibahunya sungu chage; Ulibaya balihubwatilila Lahabu balihuginama hasi weli. ¹⁴ Wi wii! Nene nimgaa wii, Na usobola binywa byanyi bya udogoma nage? ¹⁵ Gee, inangwa nene nili na kiine, nisaba mgaa; Nabamtendelela tendelela msusuchi gwanyi. ¹⁶ Nambo nabamgita, nage nungitabuwa; Ata bibyo nisabagitabicha ugana gwahulicha liiilyanyi. ¹⁷ Gee gusutatila na itatilo, Na uuongecha malase manyi na hashi ata ibalo. ¹⁸ Gushihundeya nahemene, gulihukongecha usumwa ka. ¹⁹ Nambo tubegana uoma wa bilume pambwa, loola, guli haho! Nambo tubegana uonone, mnanyi gwimbiila myaa gya mwego? ²⁰ Inangwa gwina kiine, anywa anyi nene mine ikonona; Inangwa nili m'bwilile, imangisiya uba nili mlubi. ²¹ Nene nili m'bwilile; nishihulola ichuli-chuli yanyi ya mwego; Nilihunenuna mwego gwanyi. ²² Bibyo byose ibimwechi; bululi bwa bibyo nagana, Gee gusuchimya ba bawilile na basone nabo. ²³ Nambo bibyo bihulo bibehaga wa utuwa kutu, Gwisebulula utonjwa wage guya gushi na buubi. ²⁴ Ibaloo yabiwa mnda maboo Ma babii; Gee gusuwila byenyi bya tululiyatwage; Nambo gushi gee mnanyi hano? ²⁵ Biino masugu manyi mali abilo uhima mmichi gwa mwano; Malihuhinga abilo na mashihumona bya bisoga. ²⁶ Malihuhita abilo nahi maato; Mlingilisho gwa loochi lulihusala uwata buhibi bwage. ²⁷ Nabegana nene nigibilila usumwa wanyi; Nibungula mshina gwa yenyi yanyi, mtima gwanyi gwiseelela; ²⁸ Nene nimona booba bwa uchigililwa wanyi ose, Nigidi ugana ushimbalila uba nishi na abachi. ²⁹ Niononywa yulu nili mlubi; Yulu yai nasusuwe bunene? ³⁰ Inangwa nalimona mnda maadi ma mbula gya mawe, Nauhahacha maboo manyi wa inono ya abigi; ³¹ Ata bibyo wiitela mnda iina, Nene ata bichwalaganywa byanyi byikonywa, ³² Bululi gee gushi mtu, nahi nene, yulu namtonde, Ata tuhyichanye yulu yauonona. ³³ Hashi mine gusululiya hawingi hetu, Gunaosha utubiila maboo beswe bose babili. ³⁴ Na gapuminye lubango lwage, Na booba bwage bushididibule; ³⁵ Haho noo nabagana, nashi mmone booba; Bululi noo byandishi mnda ichuli-chuli yanyi ya mwego.