¹ Wi wii! Mtu gushi na mengo mage ma bita mnda ibaloo? Ma masugu mage wii! Mashi nahi masugu ma mmigwa? ² Nahi mgichi byesubenja abisa iya ichuli-chuli, Nahi mmigwa byesulolela alambwe age; ³ Noo bibyo nene byandihelwe myechi bya byose ibunene uba mtala gwanyi, Nene nigolelwe masugu menemali huimya. ⁴ Haya handisulala hasi, nisugana, nipyuwa mengo nai? Ata bibyo busugu buli bulahu; Nene nagilulwa na ulitela ubo na ubo na bwabwiya. ⁵ M'bili gwanyi gwagilula na bihupu na ihwili ya bitete; Ibambi yanyi gwaliumbata, hanyuma gwabeleya beleya iyaka. ⁶ Masugu manyi malihuhita abilo uhima itundu ya ufumina, Namo malihuhita hashi ata maudagilo. ⁷ Engelecha mwego gwanyi imnaga; Liiso lyanyi lishimona iyaka bya bisiga iyaka. ⁸ Liiso lyage guya guli huumona lishi ningamina iyaka; Meeso mobe mindola, ata bibyo nishibi hoo. ⁹ Nahi biya timba lisusunga na uchimina, Noo biya guya gulihusala usinda gushichuwa iyaka abisa. ¹⁰ Gushigiwila iyaka mnda ndu gyage, Na ata ihana yage ishimmana iyaka. ¹¹ Yulu ya bibyo nishichibila anywa anyi; Nidogoma yulu ya asusu a mtima gwanyi; Nilila wa usuma wa ichuli-chuli yanyi ya mwego. ¹² Wi wii! Nene nili bahali, ao wi wii! nene nili nyangumi? Na wababiye buusenga nene? ¹³ Haya handisugana, ingo yanyi yipungya mtima, Mulalo bwanyi bwipungwila usumwa wanyi; ¹⁴ Haho usumbabula u malo, Na uumbiya booba u malo ma mtima; ¹⁵ Ichuli-chuli yanyi ya mwego ilihusobola usundiwa, Na usobola luubu uhima mitongo gyanyi. ¹⁶ Nisili alema; nishibi na mwego masugu mose; Ushikimye, bululi masugu manyi ii mnaga. ¹⁷ Wi wii! Mtu iyitu nai, ata umginune, Na um'biya mnda mtima gobe, ¹⁸ Na ulingamina kila lwelo, Na umtonda mengo mose? ¹⁹ Wi wii! Ata mengo nai wileya uningamina; Na uukimya ndaa na byandimina mate? ²⁰ Ugananagilabuubi, nugilile ii Ee mmushi gwa babu? bululi bwaiwambiya nabe itoto yobe, Na nisili mchigo gwa ichuli-chuli yanyi ya mwego? ²¹ Gogwe, wi wii! yulu yai ushihundeelela usona wanyi, Na upuminya udogya wanyi? Bululi hano nilala mmihwili; Gogwe wikenga wa alima kelela, ata bibyo nishibi ho.