¹ Haho Ayubu gugaile guganine, ² Ehe, usumwa wanyi wabalingililwa, Na asusu anyi abalingililwa hamwechi! ³ Bululi wisuba bushito nahi isee ya bahali; Bululi bibyo binywa byanyi bisili by abilo. ⁴ Bululi migwi gya gugo Mine gwina uoma ose gili mnda mwanyi, Na mtima gwanyi gwanywa sumu lyage; Byudidibula bya Abetcha byalibiya hegulu hanyi. ⁵ Wi wii! Gigyo punda gya mgala gisugaba nambo gyina byaanyi? Na ata ng'ombe gisuduga mengo ma gili hulishiwa? ⁶ Wi wii! Ituishi na chumba inaoshiwa uliwa ishi na miinyu? Na wi wii! mtogwa liigi guli na busoga bobose? ⁷ Mtima gwanyi gwahanya ata ubiuda; Wandi nene ili nahi iliwa yiibi. ⁸ Ata bibyo nabahewa usaba wanyi, Nage Abetcha gwabapa iyo inywa yandihubenja abisa! ⁹ Ugana Abetcha gwabalitolelecha uususula; Ugana gwaba ulebecha uboo wage na unyinga koo! ¹⁰ Haho noo handaba lihugya ndaa na hano; Ehe, nabalitilicha mnda usumwa wine ushihundecha; Bululi nishihaninye binywa bya Mmaha. ¹¹ Uoma wanyi iyuhi, ata nahembe? Na isula yanyi iyii, ata nahembe? ¹² Wi wii!Uoma wanyi iyi uoma wa mawe? Na ata m'bili gwanyi, wi wii! Iyii mmubo? ¹³ Wi wii! Ushi ugana nishi na bwatilicho mnda mwanyi, Iyaka ugana uba na bitundu wahunyiwa koo nanyi? ¹⁴ Mtu guya mine gulihubenja uchima mtima gulingye ugililwa bosoga na magenda mage; Ata gwage gugo mine gulihuleya umnyemya Guya gwa Uoma ose. ¹⁵ Bashiwetu bagilile lubichano nahi ichiba ya maadi. Mlingilisho gwa hyibetabeta hya maadi ma mgechi. ¹⁶ Bibele bihisu bululi bwa mbula gya mawe, Mine balafe lisulibisa. ¹⁷ Mengu ma bisupata aahya bisusumbuluwa, Habeba yuuda, bisuhwa hene habili. ¹⁸ Migoma gyine bisugyata wa ndila gyabo gisugaluwa; Gisusala na ugya mlwanaganywa na uchimina. ¹⁹ Migoma gya Tema gisubilola, Basolokoto ba Sheba basubihemba. ²⁰ Badamba mmee wa ibalo baudagile; Bachwile uu, nabo badambile mmee. ²¹ Bululi benywe bino musili bibyo; Mwamona ihisho ya ubabula, mwamona booba. ²² Wi wii! Nabegana, M'bepa? Ao, Tangilwe mnda lutangi lwa bitundu byenyu? ²³ Ao, Pogononywe na uboo wa amangu? Ao, Pogononywe na maboo na baya bene bali humonena? ²⁴ Ngigiwe, nene nishama pii; M'bemanya iyi ihisho nai yandilubile. ²⁵ Nahi bisuhola mtu na binywa bya winene! Biino ubucha wenyu, wi wii! walangulula ii? ²⁶ Wi wii! Mwalanga usuta binywa? Bululi binywa bya guya mine gwawa malanga guli nahi mnaga. ²⁷ Ehe, mulihuunda ubatele luti babo bamashige, Na uita byodagolanya bya genda lyenyu. ²⁸ Hano bino, lihulichiwe uninganina; Bululi chigilwe nishidogoma lulimi u meeso menyu. ²⁹ Giwilwe, namtendelela, ishiba inywa ya umonenana; Ehe, giwilweiyaka, inywa yanyi iya winene. ³⁰ Wi wii! Mnda lulimilwanyi muli usona? Wi wii! Aola a mmanywa mwanyi ashihumana bihisho bya bigugichu?