¹ Wi wii! gogwe unaosha uloba ng'wena na bugela? Ao, uhamba lulim lyagyo na mgochi? ² Wi wii! Unaosha ubiya mgochi mmihyembe mwagyo? Ao, uchibula anywa agyo na bugela? ³ Wi wii! gyiubongela ibumbu abisa? Ao, gyiusambila binywa bya bihochu? ⁴ Wi wii! Gyiita malagano hamwechi nobe, Ugiguhe nagibe mgichi gobe milubu? ⁵ Wiwii! Wigishigilanahi anonyi? Ao, ugisuga yulu ya misiha gyobe? ⁶ Wi wii! Migoma gya basengi bigiitila byudagulanya? Bigabulanya hawingiha buita byudagulanya? ⁷ Wi wii! Unaosha uigilucha ibambi yagyo na bigela byine bili na masongo, Ao, mswe gwagyo na sumo? ⁸ Ugibiile uboo obe; Ubyengeleche biya bita, na ushigila iyaka. ⁹ Loola, Ugibenja m bunene; Wi wii! Gushim'bulaga hasi guya mine gwimlola? ¹⁰ Hashi mine gwina buhuchi guya gunaosha um'byula; Biino mnanyi gunaoshaugimana umbele wanyi nene? ¹¹ Mnanyi gutulile uupa na nene namgiwidiche? Yo yose yine ili hasi ha gulu lyose iyanyi nene. ¹² Nishishama pii wa nangu ulisamba yulu ya bilumbu byage, Na uoma wage waata, na ata ubilingana wage usoga. ¹³ Mnanyi gunaosha umgubula magamba magyo? Mnanyi gunahengya ngabo gyage nyendo chopi? ¹⁴ Mnanyi gunaosha ubungula mikunjo gya yenyi yagyo? Meeno magyo malihumonya booba mibamba mwagyo. ¹⁵ Magamba magyo mali na uoma noo buhungwe bwagyo, Mali maumbatane hamwechi nahi uhambwa na yaala. ¹⁶ Nahi byamali mahambane Ata mnaga gushinaosha uhita hawingi. ¹⁷ Mali mawatane hamwechi; Maumbatilane, na mashi nasambulanywa. ¹⁸ Wa menga mailu mage ugema usumonya lwenge, Na Meeso magyo nali mahyanane na ndili cha lwelo. ¹⁹ Ndili chulama chisuhuma mnda anywa agyo, Na mitetele gya aahya gisuguluwa hambuga. ²⁰ Mii gusuhuma mnda tulonge-longe ywa mihyembe gyagyo, Nahi lweso lulihubila, na nyobu byachisulama. ²¹ Luhuda lwagyo lusulamya maala, Na ndili cha aahya chisuhuma mmanywa mwagyo. ²² Mioshi mwagyo noo mulimshame uoma, Umonya booba uli huina umbele wagyo. ²³ Misanyugya nyama chagyo mgihambanyu; mgiwatanyu hegulu hagyo; gishinaoshiwa ugubulwa. ²⁴ Mtima gwagyo guli guomu nahi liwe; Ehe, uguma nahi liwe lya hasi ha pelo gyuhelela. ²⁵ Hagisuliginuna, bilume pambwa bisumona booba; Bululi bwa booba bwago basunugeya mitima. ²⁶ Mtu gabemta ahilu ashibamgingila; Ata idabo, ata mgwii, ata sumo lya songo. ²⁷ Gyoo gisumona igele nahi idamba, Na mmubo nahi mti gwagubochu. ²⁸ Mgwii gushinaosha umsinya; Na mawe ma lya mjeleti wage inahi ibandu ya mti. ²⁹ Malonge masubalwa nahi byoolo-olo; Nagyo gisuseya lwindo lwa sumo halisutelwa. ³⁰ Mlugili mwage muli nahi tugingiliwe twa bwiigi; Gisuganda bya ulalila nahi ubiya itundu ya uhulila matete hegulu ha biswaswa. ³¹ Gyoo gisusulula m'benga nahi lweso luli hutibila; Gisuita bahali uba nahi mauta. ³² Gisuita buhitilo byage ugema mnyuma mwage, Ata mtu gwabalanga ugana benga lyina mbwii. ³³ Hegulu ha ibaloo hashi gulingamana nagyo, Gubumbilwe gushi na booba. ³⁴ Gyoo gisulola bitu byose byine bili hegulu; Iyoolo hegulu ha bose bene bali na mnenunana.