¹ MLUME gugililile umgaa Ayubu,na ugana, ² Wi wii! Mine gulihusaba gunahimana na Dambe? Guya gulihudogomana Abetcha, na gabegaa gee. ³ Haho Ayubu gumgaile Abetcha, na ugana, ⁴ Loola, nene nishi ata atu abisa, nuugae ii? Nabiya uboowanyi wanywa anyi. ⁵ Nilihudogoma lwendo lumwechi, nene nishidogoma; Ehe, nadogoma nyendo chopi na nishigililila abisa. ⁶ Haho MLUME gumgaile, Ayubumnda mnaga gwa isukishi, naugana, Lihambe munda chobe nahi mlumyana, Nene niubucha inywa, gogwe usambile. ⁸ Wi wii! Ata uonona wanyi wiugalula? Wimbiya nene mnda bulubi, yulu wabalwe uba na kiine? ⁹ Ao, wi wii! Gogwe ulina uboo nahi wa Abetcha? Unaosha uhila mmukulo gwa liidi nahi gee? ¹⁰ Biino! Ulichwiye ugengeda na bwata; Litogole bunyemu na buoolo. ¹¹ Geesa imbi luudi lwa sungu chobe, Wamlolekila mtu mine gwina mnenunana, wamsache. ¹² Umlole kila mtu mine gwina mnenunana umsache, Wabahyilile basone bose haho holigimana. ¹³ Ubabise mmihwili hamwechi, Ubahambe byenyi byabo ihana yibisamu. ¹⁴ Haho na nene nilisamba mwano gobe, Ugana uboo ube wa ulume unasho uuhogonona. ¹⁵ Ugilole gigyo ngugu, gyandibumbile hamwechi nobe; Gyoo gisuya byanyi nahi biya ng'ombe, ¹⁶ Loola bino, uoma wagyo uli mnda munda chage, Na uisha wage uli mnda mii gyage gya gumo lyage. ¹⁷ Gee gusudigicha mmila gwage nahi mmamba; Miigya bigima byage gilibilihambe hamwechi. ¹⁸ Mauta mage mali nahi mibungu gya mmubo; Mbachu chage chili nahi bihindi bya bigela. ¹⁹ Gyoo noo gyata gya ndila gya Abetcha; Gee mine gummitile gummele ahilu age. ²⁰ Chigilwe koono chisumma biliwa; Haya hene hasushiga nyama chose cha mgala. ²¹ Gisulala hasi ha miti gyine gili na ihochu, Hulibisa hene hali tulonge-longe na biswaswa. ²² Gigyo miti gyine gili na ihochu gisum'bwila na ihochu yagyo; Miamba gya u bichiba gisumchunguluwa. ²³ Loola, luudi lubegilula gyoo gishidanda; Gisulimona ugana gili kolongecho, inangwa Yolodani yagilula ndaa na umibega gyage. ²⁴ Wi wii! Mtuge gese gunagiwata gyahuba gili meeso, Ao, ugichibula mmyembe gyagyo na mgochi?