¹ Wi wii! Ugidi mengo maubuta wacho sunyu chine chili mmiao? Ao unaosha umana mengo ma ubuta wa lukungu? ² Wi wii! Unaosha ubala miechi gyabo gyabiwilicha? Ao wii! Ugidi mengo ma ubuta wabo? ³ Choo chisuginama, mengo maubuta baana babo, chisugibilila asusu abo. ⁴ Baana babo bali bisoga, chisuula na uoma mnda mgala; Chisugya lyabo, na chishibagiwila iyaka. ⁵ Mnanyi guleile pende uligila hulu? Ao wii! Mnanyi gugisulile mangala bihambo byage? ⁶ Gyine gyandiitile lwanaganywa uba ndu gyagyo, Na sii gya miinyu uba bushamo bwage. ⁷ Gee gusunenuna ihulo ya maadi, Na gushibahulicha mdodo gwa mgimaninyi. ⁸ Bwata bwa koono nii bulilo bwage, Gisuenga enga itu yo yose ya ibisi. ⁹ Wi wii! Mbogo gyigitabicha uugilila? Ao gyishama mnda liha lyobe? ¹⁰ Wi wii! Unaosha ugihamba mbogo na mgochi mituta? Ao, gyoo ginalima u bibetabeta mnyuma mobe? ¹¹ Wi wii! Wigiudagila bululi gyina uoma wiingi? Ao, wigishigila gyo mgilo gobe? ¹² Wi wii! Wigiudagila ugana gyihyicha biguma u ndu gyobe. Na uongola mtete u lagala lyobe lya uhulila? ¹³ Ihwahwa ya mbuni ili huseelela; Bibyo bihwahwa byage na maso mage, wii! Mali na yano? ¹⁴ Yulu gyo gisushiga maagi magyo u bitete, Na umabiya yuuda wiisee, ¹⁵ Na ugibilila ugana ugulu usumabela, Au nyama gya mgala na umagyatila ¹⁶ yoo isumaitila buhuchi baana bage, nahi ugana bashi bage; Inangwa asusu age iya bunene, ishina booba. ¹⁷ Wa ibalo Abetcha aigimine lwenyi, Na gushiihele malanga. ¹⁸ Mengo maisuliginuna hegulu igye, Isunenuna falasi na bene bali bagichine. ¹⁹ Wi wii! Gogwe ugihelefalasi uosha wagyo? Ao, M gogwe ugichwiiye mioshi mwage maaso ma udanda? ²⁰ M gogwe ugiitile uguluwa nahi njige? Utiticha wa liidi lyage usumonya booba. ²¹ Ulidunda-dunda mmibetabeta, na useelela uoma wage; Gusuhuma na ugya usambana na bene bali na tulume gela. ²² Gee gusuitila bene baligye usinywa weenja, na gushibagagilwa; Na gushibagaluwa ugiwila unyuma u mbele wa ahilu. ²³ Luuku lusummitila mdodo, Sumo lyugema na idabo. ²⁴ Gusumina sii wa buhuchi bwage na uchigililwa; Na gushibagimana yulu ya liidi lya asiba. ²⁵ Ho hose henehasugilwa asiba gee gusugana Aha! Nage gusuhulicha bushio bwa bita ata byili koo, Lwindo lwa bata ba basolokoto, na mdodo. ²⁶ Wi wii! Abemba asuguluwa hegulu wa lwenyi lobe, Na ugolola bihwahwa byage na ugya luubi lwa uboo wa ulume? ²⁷ Wi wii! Loochi lusuguluwa hegulu wa alago obe, Na uita iisa yage ihana hegulu? ²⁸ Lusushama u mawe ma maata, noo uli bulalo bwalo, Hegulu ha liwe lya wiigi na lyata na liomu abisa. ²⁹ Uhuma uya loo lusulola buhibi; Meeso malo masumona wa koo. ³⁰ Byaana byalo bisuhiha maashi; Na wine uli bitumba noo wine waluli.