¹ Haho MLUME gumgaile Ayubu mnda mnaga gwa isukishi, naugana, ² Mnanyi guno gulihubiya ulangulwa mdoo Wa binywa byine bishi na malango? ³ Biino ulihambe munda chobe nahi mlumyana, Bululi niubucha inywa na gogwe usambile. ⁴ Ubele uhi handigimiile mishingi gya sii? Bino! dogoma, nambo wina bunama. ⁵ Mnanyi gubiile lulingo lwage, nambo ugidi? Ao mnanyi gugolwele mgochi hegulu hage? ⁶ Mshingi gwage guwenyiwe witu nai? Ao mnanyi gubiile liwe lyage lya usunga, ⁷ Haho tumbala-mbala twa halwelo hatugimbile hamwechi, Na baana bose ba Abetcha habaitile mdodo gwa saso? ⁸ Ao mnanyi guhambile bahali na michango, Haya halitutile nahi ugana lyahuma mgumo. ⁹ Handiliitile timba uba isanjwa yage, Na mdoo gwiingi uba ichalaganywa ya uhambila, ¹⁰ Nilgile alago anyi; Niabiile na tuhongolo na michango, ¹¹ Niganine, Wihiya ndaa na hano, ata bibyo ushihita, Na hano mabimbi mobe mene malihututa michibilwa? ¹² Wi wii! Usambile lwelo utula masugu mobe hamatulile? Umasambile mayaya ihana yage? ¹³ Maoshe uhyila bisula bya ibaloo, Basone baukumunywe babe koo nagyo? ¹⁴ Gushihugaluwa mlingilisho gya bitete hasi ha yaala, Bitu byose byichwa nahi bichwalaganywa. ¹⁵ Na basone lwenge lwabo lwichibilwa lushibahyiile, Na uboo wine uginyuwe winogeya. ¹⁶ Wi wii! Ugingile misula gya bahali, Ao ugyatile ha lubisagulu lwa mabenga ma maadi? ¹⁷ Wi wii! Uununilwe michango gya lubu, Au umonine michango gya usinda? ¹⁸ Umanine bwata bwa ibaloo? Biino! Dogoma, uba ugidi bibyo byose. ¹⁹ Gili uhi ndila gya uhyiila bushamo bwa lwenge? Na mdoo nago, ihana yago ili uhi? ²⁰ Waoshe uguhila ndaa na wisulayago, Waoshe umana na mahitilo ma ugigila ndu gyage? ²¹ Ulanga ugidi, bululi ubushilwe mamo mengo, Na lubalo lwa masugu mobe mmeengi. ²² Wi wii! Egingile lindo lya imundimundi, Ao umonine lindo lya mbula gya mawe, ²³ Mene mandibiile pamba gya mengo ma asusu, Wa masugu ma machibo na bita? ²⁴ Wi wii! Lwengu lusubagulwa wa ndilanai, Ao mnaga gwa mlugulu usambalachiwa wi hegulu ha sii? ²⁵ Mnanyi guchubule midambwa gya maadi ma imbi luudi, Ao ndila gya ahenyuhenyu a kuba; ²⁶ Unyesha mbula hegulu ha sii gyine gishi na batu; Hegulu ya lwanaganywa lyine lushibashama batu; ²⁷ Ugigyusha sii gigyo gishibanya mabula na gya mauwa, Na umina byanyi bya binagu? ²⁸ Wi wii! Mbula gyina sage? Ao mnanyi gubushile matata mambula na iimee? ²⁹ Mawe ma mbula mahumine mnda mwa nanyi? Na bushamo bwa ha gulu mnanyi gububushile? ³⁰ Maadi miwatana nahi liwe, Na yenyi ya mabenda malihuwatana na peho. ³¹ Wi wii! Unaosha uhamba na ichungu-chungu ya tumbala-mbala, Ao ubilebecha bihambo bya Olioni? ³² Wi wii! Unaosha ugolwela mlongo gwa Gulu wa mengo mage? Ao unaosha ugolwela mlunga na baana bage? ³³ Wi wii! Ugidi alago ene ahelwe gulu? Unaoshe umonya uhyilila wage hegulu ha ibaloo? ³⁴ Unaosha uginuna liidilyobe ndaa na umatimba, yulu ya beiingi bwa maadi uuwile? ³⁵ Unaosha utuma ahenyuhenyu, nao nuugya, Uusambile beswe tuli hano? ³⁶ Wi wii! Mnanyi gubiile lwengu mnda mtima? Ao mmnanyi gubiile bumana mnda mtima? ³⁷ Mnanyi gunaosha ubala matimba wa lwengu? Ao mnanyi gunaosha uhungolola maadi ma gulu ma mmibambi? ³⁸ Mengo maihwili hamasulyanata, Na bitete habisulibumba hamwechi? ³⁹ Wi wii! Wigihibila tambwe gya ota buhibi? Ao wimagyusha matambwe ma baana mene mali na ndala, ⁴⁰ Hamasubisamina mtuhumbo twabo, Hamasushama malibise yulu ya ugongela? ⁴¹ Mnanyi gusuiha imombomombo iliwa, Byaana byage habisumlilila Abetcha, Na uhubaga-hubagana wa uhulwa na iliwa.