¹ Haho Ayubu gumgaile MLUME, na ugana, ² Nigidi ugana unaosha ugila bihisho byose, Na ugana malanga mobe mashinahibilwa. ³ Mnanyi guno gusubisa mihungo gushi na malango? Bululi, nidogomine binywa byandishi mmane, Bihisho bya bisaga byupima nene, byandishigidi. ⁴ Hulicha, ibumbu ino, na nene nidogoma; Niubucha inywa, gogwe wasambile. ⁵ Nibele huhulicha mwano gobe, wauhulicha na maatu; Biino hano liiso lyanyi lyumona. ⁶ Bululi bwa bibyo nalionywa ichuli-chuli yanyi ya mwego, na ulibecha Mnda ihwili na mtoo. ⁷ Haho byunuba, hanyuma ha MLUME umsambila Ayubu biya binywa, MLUME gumsambile Elifazi Mtamani, Sungu chanyi chalama yulu yobe, na yulu ya babo bamagenda bobe babili; bululi benywe mushidogomine bilingye mnda mwano gwa gwanyi, nahi bidogomine mgichi gwanyi Ayubu. ⁸ Biino hano, guhwe ng'ombe cha milume njwii na miyoo gya milume njwii, mwamgile mgichi gwanyi Ayubu, mwalichigiche lutangi lwa uchigya; na gugo mgichi gwanyi Ayubu gwimsabila benywe; bululi mwimginamina gee, nashimgilile ulamana na buhugi bwenyu; bululi benywe mushidogomine binywa bya bigolobu yulu ya mwano gwanyi, nahi bidogomine mgichi gwanyi Ayubu. ⁹ Haho ElifaziMtemani, na Bildadi, Mshuhi, na Sofali, Mnaamathi, bagile na ugila nahi biya biganine MLUME; Nage MLUME gumgitabiche Ayubu. ¹⁰ Hanyuma MLUME gugalule bibya bya Ayubu, haya hene helibasabile ba magenda mage; MLUME nage gummele Ayubu nyendo chopi uhima biya byelibele nabyo hatangi. ¹¹ Haho bashiwabo bagile weli bose, malumyana na baachana, nabo bose bene balibele mmanane nabo hambele, balile iliwa hamwechi nage mnda ndu gyage; nabo bamlilile na umgilaha mtimayulu ya mwano gwa buubi bose bwine MLUME bwechwisiche yulu yage; kila mtu gummela ihindi ya lufeza, na lupete lwa nolo bato bose. ¹² Bibyo MLUME guhalile mihaa iyo isula ya Ayubu uhima ubutulilo bwage; nage gubele na miyoo uki umi na china, na ngamia uki mtuba, na migoma gya ng'ombe uki, na punda cha maota uki. ¹³ Iyaka gubele na bawalubaga njwii, na misiha gitatu. ¹⁴ Gumgishile guya gwa mtangi china lyage Yemima, na gwa bubili gumgishile china lyage Kesia, na gwa butatu gumgishile china lyage Kelen-hapuhu. ¹⁵ Mnda sii gigyo gyose hashibele baachana mahungwe nahi babo baana ba Ayubu; na sabo gubahele buhyana hawingi ha bashiwabo baana ba balumyana. ¹⁶ Hanyuma ha bihisho bibyo Ayubu guhamine myaa sambi na maumi mana, gee gumonine baana bage, na bedulu bage, ndaa na ibushi ya buna. ¹⁷ Bibyo Ayubu gee nuuwa, mmosu abisamine guli mgiluchu masugu meengi.