¹ haho gugo Elifazi, Mtemani, gugaile na guganine, ² Mtu gabetonda udogoma nobe, wi wii! Wimona bibii? Ata bibyo mnanyi mine gunalichibila gashidogome? ³ Loola, gogwe wabagigya batu beengi, Gogwe umabiile maboo mene mabele maimu. ⁴ Binywa byobe byam'bwatilicha guya gubele mgube, Gogwe wamaomya machwi menebali malema. ⁵ Ata bino hano byahihyila gogwe, gogwe wahuwa mtima; Byuhuuda, gogwe watutuwa. ⁶ Wi wii! Inyumbya yobe noo ushi byolihubenja, Na maudagilo mobe noo ushi ugolowa wa ndila gyobe? ⁷ Engelecha, ibumbu ino, mnanyi mine guchiminywe nage gushi na abachi? Ata baya bene bali na kiine bachingilwe koo uhi? ⁸ Nahi nene byandimonne, babo balihulima buubi, na uuna bisone, basusola byoka biya. ⁹ Wa luhuda lwa Abetcha balihudigwa. Na wa ututa wa sungu chage balihuhwa. ¹⁰ Uduga wagyo tambwe, na liidi lya tambwe gya buhuchi, Na meeno ma matambwe ma macho-macho, manogeya. ¹¹ Tambwe gya giosu gisuwa uhulwa buhibi, Nabo baana ba matambwe ma maota masambalala gimwechi gimwechi. ¹² Biino, nachwilwa na inywa wa bubisa, Liitu lyanyi lyahulicha tung'eneng'ene twage. ¹³ Mnda malanga mene mahumine u malo ma mtima ma busugu, Haya hasugwishiwa batu na tulo. ¹⁴ Booba na udanda binjwilile, na udanja mauda manyi. ¹⁵ Haho mnaga guhishile u mbele wa yenyi yanyi; Na isada ya m'bili gwanyi ingimene. ¹⁶ Gugo mnaga gugimene pii, nashioshe ugumana byagusobaa, Mlingilisho gubele u mbele wa meeso manyi; Habele pii, nene nihuliche liidi lyage, libele hugana, ¹⁷ Wi wii! Mtu gunaba na kiine uhima Abetcha? Wi wii! Mtu gunaba mmaha ulima M'bumbi gwage? ¹⁸ Loola, gee gushibaudagila bagichi bage; Na bamalaika bage gusubabala uba bahugi. ¹⁹ Wi wii! Ati iyuhima beme balihushama mnda ndu gya bitete, Mene mishingi gyage gili wi isee, Baya babiilwe umbele wa bihindi bya bigela. ²⁰ Hawingi ha lwelo na igolo bisubelwa-belwa; Basudugwa milumbu na hashi gubibiya mnda mtima. ²¹ Wi wii! Migichi gya bitula byabo gushichulilwe wa bili? Bawa, hanyuma bali humoneya bashi na lwenyi.