¹ Hanyuma ha bibyo Ayubu guunune anywa age, na uloga lusugu lwage. ² Ayubu gugaile, na ugana; ³ Na luchimine koo lusugu luya lwandibushilwe nene, Na buya busugu bwine buganine, gumo lwa Mwaana gwa mlumyana lya swalwa. ⁴ Lulo lusugu nalube mdoo; Abetcha ashilulole ata uhuma hegulu, Ata lwenge lushilulamiye. ⁵ Luuninywe na mdoo, mdoo gwa hululu, uba bwalo; Timba nalibe hegulu halo; Yo yose yine isuita lusugu uba mdoo na iludidibule. ⁶ Iyaka bubo busugu, na bube na mdoo gwiingi; Bushibalwe mnda masugu ma mwaa; Na bushibiwe u lubalo lwa myechi. ⁷ Loola, busugu bubo na bube bugumba; Na mnda mwabo mushibe na liidi lya useelela. ⁸ Na babuloge baya basuloga chuba, Baya bali tayali um'byula gugo Lewiathani. ⁹ Tumbala-mbala twa umayaya mage tuba mdoo; Na uenge lwenge na ushilupate; Na ushibimone bilili bya halwelo; ¹⁰ Wa ibalo ushihambile michango gya gumo lya mago. Na ushimbishile asusu u meeso manyi. ¹¹ Yulu yai nene nishiwilile mnda mwa mago? Yulu yai nishihuminye mtima handihumine mnda? ¹² Yulu yai machwii mambeile? Na mamomabele, nimakokele ii? ¹³ Bululi haho nisuba ulala na ulitucha; Nisuba ulala tulo; na uba na ulihocha; ¹⁴ Hamwechi na maoolo na bahungi ba mihungo gwa ibaloo, Baya bene bagubai u bibunduguchu; ¹⁵ Ambo hamwechi na baata bene bali na nolo, Bene bagiluche lufeza mmadu mabo; ¹⁶ Ambo, nahi uchiwa wa gumo lya usolowa, nishisuba ho; Nahi tulenge twine tushitumone lwenge abisa. ¹⁷ Uya wine babii bashibaosha ususula; Uya nao baya babaimu basulihocha. ¹⁸ Ubo bahambwa basumona ulihocha bose hamwechi; Bashibahulicha liidi iyaka lya mgimaninyi. ¹⁹ Bauulu na tulenge bali ubo; Mgichi gulu na ulitucha u mbele wa mlumyage gwa mgilo. ²⁰ Yulu yai guya guli na adugwa gusuhewa ugema, Na baya bene bali na utonga u mitima basuhewa mwego; ²¹ Bene balihuhemba luubu, nabo bashi hulumona; Na uludabile uhima uenga lindo lyine libele libisamu; ²² Bene bali saso abisa, Na useelela habasulimona sinda? ²³ Bululi bwai mtu guchibilwe ndila gusumona ugema, Mine Abetcha gwamchunguluwa wa lubimbo? ²⁴ Bululi usumwa wanyi wachwa nahi ugana noo iliwa, Na utonga wanyi ulihuhongolowa na maadi. ²⁵ Bululi ihisho iyo yandihusina noo ili hunjwila, Nayo yina ili hupa booba noo ili hunjwila. ²⁶ Nene nishihumona talala, ata ulihocha, na nishi hulitucha; asusu ka noo alihunjwila.