¹ Iyaka habele lusugu babo baana ba Abetcha bagile ulimonya u mbelewa MLUME, Ihingili nage gugile hawingi habo, yulu ya ugya ulimonya u mbele wa MLUME. ² MLUME gum'budiche Ihingili, Wahuma uhi? Uhungili gumgaile MLUME, na ugana, Nahuma mnda uchunguluwa-chunguluwa mmibaloo, na ugyata ubo na ubo mnda ibaloo. ³ MLUME gum'budiche Ihingili, wi wii! Wamlingamina gugo mgichi gwanyi Ayubu? Bululi hashi gunye guli nahi gee ibaloo yose, mtu m'bwilile na gugitabuwa mmano abilo, gwa mnyemya Abetcha na ulibagula na usona; nage ata bino gwachibatilana na uwilila wage, inangwa usongamanye nage, yulu namdogye hene hashi na ibalo. ⁴ Ihingili gumgaile MLUME, na ugana, Ibambi wa ibambi, ehe, byose byeli nabyo mtu gwihanayulu ya mwego gwage. ⁵ Biino hano golola uboo obe, nage gwiusebulula u mbele wa yenyi yobe. ⁶ MLUME gumsambile Ihingili, Loola, gee guli mnda uboo obe; bino, uuse mwego gwage ka. ⁷ Haho Ihingili guhumine u mbele wa yenyi ya MLUME, Guhulile Ayubu na bihute bisone utula byaasa asa bya magulu ndaa na mpala lubombo. ⁸ nage guguhile agingililwe a uligagila nao. ⁹ Haho mmachage gumsambile, Wi wii! Gogwe ndaa na bino wa wachibatilana na uwilila obe? Umsebulule abetcha na wawe. ¹⁰ Bibyo gee gumsambile, Gogwe ulihudogoma nahi gumwe gwa babo baachana ba bahugi byabasudogoma. Wi wii! Tuhewe bisoga mnda uboo Wa Abetcha, na beswe tushihewe na bibii? Mnda bihisho bibyo byose Ayubu gushigilie buubi mnda milomo gyage. ¹¹ Biino mamo magenda mage Ayubu matatu habahuliche gugo mwano gose gwa usona ubo ose wine umpashile, bachwile kila mtu uhuma wage; nabo noo Elifazi Mtemani, na Bildadi Mshuhi, na Sofali Mnaamathi; bahulichane hamwechi yulu bagye umlicha Ayubu na ummungya mtima. ¹² Haya habaginune meeso mabo, nabo bili koo, bashimsungule, baginune maadi mabo nuulila; kila gumwechi gugulile ichibabo yage, bagulule ihwili ha gulu ha hegulu ha miswe gyabo. ¹³ hanyuma bashamine ha bitete hamwechinage masugu njwii, mchuba na m'busugu, hashibele gumwe gwabo gudogomine nage inywa yo yose; bululi bamonine adugwa age ene ebele nao abele iyeengi abisa.