¹ Iyaka Elihugugailena udogoma, ² Hulichiwe binywa byanyi, benywe bene bali na lwengu; Tegwe matu wandi, benywe benebalina malango. ³ Bululi matu masutonda binywa, Nahi biya ibanga byaisutonda biliwa. ⁴ Na tulisobolele byine bili bya bweenge; Na tumane bya bisoga. ⁵ Bululi Ayubu gwagana, Nene nili mtugwa kiine, Nage Abetcha gwapuminya kiine gyanyi; ⁶ Inangwa ninaba na kiine, nibalilwe uba gwa lulimi; Malase manyi mashi huhona, inangwa nishi na usona. ⁷ Wi wii! Uli mtu nai mlingilisho gwa Ayubu, Gusunywa wenja nahi maadi? ⁸ Gusugyata na baya bene basugula buubi, Na ugya hamwechi na batu babii. ⁹ Bululi gwagana, Bishihummita mtu yoyose, Na useelela na Abetcha. ¹⁰ Wa bino pulichiwe benywe bene muli humana; Abetcha ashilangilwe ugila bya buhulihuli; Na Dambe ugila bisonyu. ¹¹ Bululi gwimma mtu ulamana na mgilo gwage, Nage gwimmita mtu umona wa ualamana na ndila gyage. ¹² Ehe, chigilwe, Abetcha gushigila bibii, Na Dambe gushihugicha uonona. ¹³ Mnanyi gumlagile uilola ibaloo? Ao mnanyi gum'biile ibaloo ino yose? ¹⁴ Nambo gabem'biila mtu mtima gwage, Uliongwela mtima gwage na luhuda lwage; ¹⁵ Bene bina mibili bose bichima hamwechi, Nabo batu bigiwila iyaka uba ihwili. ¹⁶ Uba wina malango, uhuliche ino inywa; Ulihuliche liidilya binywa yanyi. ¹⁷ Wi wii! gwihyilila mtu mine guli huonywa kiine ata gimwechi? Na gogwe wii! Wimmonona mlubi mine guli na kiine na uoma? ¹⁸ Wi wii! Bilingye umsambila oolo, Gogwe uli mlubi? Ao ubasambila maata, Benywe muli balubi? ¹⁹ Ulingilisha gugo gushibageganina byenyi bya baata, Na gushibahoda bamona uhima mambuchu? Bululibose ii mgilo gwa maboo mage, ²⁰ Wa mengo mamwechi basuwa, ata mkundu gya busugu; Batu basudigila na ugya lwabo, Nabyo bilume pambwa bisuhumiwa na hashi ata uboo wa mtu. ²¹ Bululi meeso mage mali hegulu ha madila mamtu, Nage gusumona migyatichi gyage gyose. ²² Hashi buhisu na gugo mdoo gwata, Habasuosha ulibisa bagichi ba buhulihuli, ²³ Bululi gee gushi na byumlangila mtu bya biingi, yulu gagye u mbele wa Abetcha gaononywe. ²⁴ Gee gusubanoga noga ba bilume pambwa hashi ulilolela, Na ubiya benge ha ihana yabo. ²⁵ Bululi bwa bibyo gee gusugalulanya bigilanywa byabo; Gee gusubahembela lusugu lwelibachimya. ²⁶ Gee gusubahula nahi batu babii, Hululu u mbele wa meeso ma bange; ²⁷ Wa bululi baleile ndila gya gisoga, bashi mlamine gee, Bashigitabiche uwasha madila mage ata gimwechi; ²⁸ Ndaa na byabaitile lilo lya mbuchu umyila, Nage guhuluche lilo lya baya bene bali hususulwa. ²⁹ Gee gabehana ulibenga mnanyi gunaosha uonona yulu ya buubi?Gabebisa yenyi yage mnanyi gunaosha umlola? Nahi bisugililwa mmoga , ao mtu gumwechi, bili lulingo lumwechi; ³⁰ Ugana gugo mtu m'bii gashihyilile, Hashibe na gubawasha batu mmagochi. ³¹ Bululi hali mtu gumsambie Abetcha, Nene nilitoleleche uambilwa inangwa nishilubile; ³² Byandishi humona ungigye gogwe; Nambo nigilile usona nishigila iyaka? ³³ Wi wii! Alambwe age abi nahi byolihuunda gogwe, ndaa na byoli habihanya? Bululi bilingye gogwe usobola gushi nene; Wa bibyo ubegana byoligidi gogwe. ³⁴ Batu bene bali na lwenyi bisambila, Ehe, mtu ge gese mine gwina lwengu guli hupulicha; ³⁵ Gugo Ayubu gudogomine nangu na malango, Na m'binywa byage bishi na lwengu. ³⁶ Nambo Ayubu gwabatonjwa ndaa na wisula, Bululi gugaile nahi batu ba basone. ³⁷ Bululi iyulibiya ubenga heguluha buubi bwage, Gwahula kwasa hawingi hetu, Na ulibiya binywa byage pyutu uli Abetcha.