¹ Haho Ayubu gugaile, na udogoma, ² Ata na lino yaabo yanyi ili ya usuma; Bihulo byanyi bili bigumu uhima usumwa wanyi. ³ Oh, nabamana ihana yandabaosha ummona, Nahiye ndaa na haya hene heli hushama! ⁴ Nababiya yaabo yanyi weeli, Na ugilucha anywa anyi na byandihubenja. ⁵ Nisuba umana binywa byelingaa, Na umana biya byelisambila. ⁶ Wi wii! Gwabahimana nayi wa bwata bwa uosha wage? Nangu! Gwagapulicha. ⁷ Haho bene bina kiine babaosha ugombola nage; Biino, nabaleelelwa na aluliya anyi milumbu. ⁸ Loola, nagya u mbele wage, nage gushiho; Nagiwila unyuma, ata bibyo nishinaosha ummona; ⁹ Na uboo wa uachi hesugula mgilo, Ata bibyi nishinaosha ummona; Gusulibisa luubi lwa uboo wa ulume, yulu nashimmone. ¹⁰ Ata bibyo gee gugigidi ndila gyandihugila; Gabehwa uutonda nitobowa nahi nolo mmaahya. ¹¹ Ugulu wanyi wachibatilana ma matamba mage; Ndila gyage nigilamine, na nishigile mibamba mwagyo. ¹² Nishigiwile unyuma wa alago a milomo gyage; Niwashiche binywa bya anywa age uhima keene chanyi chose chandihelwe na Abetcha. ¹³ Ata bibyo gee guli gomwechi, mnanyi gunaosha umgalula? Itaka ichuli-chuli yage ya mwego yoyose yaisubenja, noo yesugila. ¹⁴ Bululi gee gusuwilicha iya yelisambile; Iyaka bihisho biingi nahi biya bya hamwechi nage. ¹⁵ Bululi bwa bibyo namona asusu u mbele wa yenyi yage; Handilanga, nimmona booba. ¹⁶ Bululi Abetcha aguita mtima gwanyi uchiminya malanga; Nage Mine gwina uoma ose gwasusula; ¹⁷ Bululi nishihubagane mtima yulu ya mdoo, Na ata yulu ya mdoo gwiingi gwambwila yenyi yanyi.