¹ Haho Elifazi Mtemani gugaile na udogoma. ² Wi wii! Hanaba mtu ge gese umgilila Abetcha? Winene guya guli na lwengu gusuligilila gee mine. ³ Wi wii! Guya guli na uoma ose gunaba na saso yulu ya guya mine guli na kiine? Na wi wii! iyalambwe weli, ugana uita madila mobe uba mawilile? ⁴ Wi wii! Iyoli gogwe umnyemya gee mine guli huambila? Na ugingila mnda uonona na gogwe? ⁵ Wi wii! Usona obe ushi waata? Na usona obe ushi na isula. ⁶ Bululi waguha itu yasendewa na mshiwenyu bunene, Na ubachula bichwalaganywa byabo bene bali buchi. ⁷ Ushimmele maadi guya mine guimine, Gogwe umgimine guya mine guli na ndala. ⁸ Ata bibyo guya ilume pambwa, sii gibele gyage; Na guya mine gutoninywe, gee noo gugishamine. ⁹ Ugachingile baachana ba bawilwa bali buuchi, Na maboo ma mashige manogilwe. ¹⁰ Bululi bwa bibyo magochi mali mauchunguluwe, Na booba buchwila wa abilo buli huususula. ¹¹ Ao wi wii! Ushihumona mdoo, Na maadi meengi muuchinja? ¹² Mi wii! Abetcha ashi hegulu ha gulu? Iyaka loola bili tumbala mbala koo, Byatuli hegulu! ¹³ Gogwe wagana, Abetcha agidi ii? Wi wii! Anaosha uonona mnda mdoo gwiingi? ¹⁴ Matimba ma mdoo malihum'bisa gee, na gashimone; Gee gusugyata u butato bwa gulu. ¹⁵ Wi wii! wigililila ugyatila mgiya ndila gyaala gigyatilwe na baya batu basone? ¹⁶ Bene baguhilwe hambele ha mengo mabo, Mishingi gyabo gwageseya nahi ichiba ya maadi; ¹⁷ Beme bamsambile Abetcha, Utuhumine; Iyaka, Gugo Mine gwinauoma ose gunaosha utugilila ii? ¹⁸ Nage noo gugiluche madu mabo bitundu bya bisiga; Ata bibyo mihungo gya basone na gibe koo nanyi. ¹⁹ Ba kiine basumona bibyo na useelela; Nabo bene bashi na abachi basubaseya; ²⁰ Bagane, Chigilwe gyabo bene batuginywine bachingilwe koo, Na mihonagyabo aahya abichigya. ²¹ Ummane abisa Abetcha, bululiube natalala; Haho noo busoga habwiuchila. ²² Ubigae, ibumbu ino, lugigyo luuhuma mnda anywa age, na binywa byage ubibiye mnda mtima gobe. ²³ Ubemgiwilila Mine gwina uoma ose, wigubawa; Ubehunya usapana koo na itula yobe. ²⁴ Gogwe lindo lyobe ulibiya mnda isee, Na nolo cha Ofili uchibiya hawingi ha mawe ma bichiba; ²⁵ Nage Mine gwina uoma ose gubi lindo lyobe, Gubi lufeza lwa ugengeda oli. ²⁶ Haho noo holi seelela uli Mine gwina uoma ose, Na uginuna yenyi yobe umlola Abetcha. ²⁷ Wimsaba nage gwiuhulicha; Na gogwe wiwilicha bya ulibindila. ²⁸ Gogwe wibangisiya inywa, nayo yimoneya oli; Na ugema wigema mnda madila mobe. ²⁹ Haho hene habiugwisha, wigana, Hali uginyuwa iyaka; Nage guya gulisacha Abetcha imogonona. Gwimmogonona na guya gushi na abachi; Ehe, wihogononywa bululi bwa maboo mobe mahaha.