¹ Haho Ayubu gugaile, na udogoma, ² Bihulichiwe abisa binywa byanyi; Ino ihisho na ibe mmungyo wamli. ³ Ndeewe; na nene byoka biya nidogoma; Iyaka handihwa udogoma, gilililwe usebulula. ⁴ Nene, wii! Ushitaki wanyi uli humlola mtu? Nene yulu yai nashioshe uhemba? ⁵ Ndoolwe, mwagagilwe, Mwabiye maboo utunywa. ⁶ Na handisuengelecha nisuchigililwa, Na booba bwambwata m'bili gwanyi gose. ⁷ Yulu yai baabi bali na mwego, Na uba miungu, ehe, na ugililila uba na uoma? ⁸ Ibushi yabo yabangisiwa nabo u meeso mabo, Na babuwa babo u mbele wa meesomabo. ⁹ Madu mabo mali kolongecho hashi booba, Na ala sangulo gya Abetcha gishi hubahula. ¹⁰ Ng'ombe chabo cha milume chisubuta na chishibahungwilwa na uoma; Ng'ombe chabo cha maota chisubuta, chishibasolola magumo. ¹¹ Basuchitobola nahi miguma gya baana ba miyoo gyabo. Na baana babo basushiga. ¹² Basugimba wa bigombaganywa na binubi, Na useelela liidi lya filimbi. ¹³ Masugu mabo masugulwa na ugililwa, Hanyuma na usala abilousinda. ¹⁴ Ata bibyo bamsambile Abetcha. Utuhumine; Bululi tushihubenja umana madila mobe. ¹⁵ Gugo Mine gwina uoma ose noo nanyi, na tumgilile? Beswe tbi na alambwe nai tubemsaba? ¹⁶ Loolwe, ugililwa wabo ushi mmaboo mabo; Mihungo gya baabi na gibe koo nanyi. ¹⁷ Wi wii! Mnyendo chinga ma tala mabo basone masuchimwa? Na asusu abo ubachwila? Na Abetcha ubagabila usuma wa sungu chage? ¹⁸ Bululi baabe nahi bihupu bya bigumu umbele wa mnaga, Nahi bihupu byagululwa na isukishi? ¹⁹ Mwagana, Abetcha asubabiile baana ba mtu uya usona wage. Na gamme gee mine , yulu gamane. ²⁰ Meesomage gee mine na maamone udogya wage, Ganywe uchigililwa wage gee mine. ²¹ Bululi gwina saso nai hanyuma ha mlongo gwage, Lubalo lwa myaa gyage hagyihwa ugechwa hawingi? ²² Wi wii! Mtu gegese gunaosha umgigya Abetcha malango? Nage noo gusubaonona bene bali hegulu, ²³ Gumwe gusuwa na uoma wage ose, Guli mshame kolongecho na ulihocha; ²⁴ Bitundu byage bili bigiluchu mabele, Na miongo-ongo gyage gya mmauda gili gibongu. ²⁵ Gunge gusuwa na usuma wa mtima, Gushimtonde ata bisiga. ²⁶ Bose babili basulala m'bitete lulingo lumwechi, Byolo bisu bawila. ²⁷ Loolwe, nimagidi malanga menyu, Na mihungu gyamulihuhunga gya gisone yulu yanyi. ²⁸ Bululi mulihugana, Ndu gya gugo mmata gili uhi? Na itula yine yabashamine baya basone ili uhi? ²⁹ Wi wii! Mushibabudiche bahita madila? Na lango lyabo mushilimanine? ³⁰ Ugana msone gusushigwa lusugu lwa asusu? Na ulombwelwa hambuga lusugu lwa uchigililwa? ³¹ Mnanyi gunalisamba ndila gyage u yenyi yage? Iyaka mnanyi gunaosha umma alambwe a biya byeligilile? ³² Hamwechi na bibyo gwihilwa u sinda, Nabo balochi bigimana yulu ya lwendo lwage. ³³ Bitete bya wibeta-beta bibi bisoga, Na batu balamana nage hanyuma hage, Nahi biya batu byabasuumlombwela bene bashinabalwa. ³⁴ Biino bisili wii benywe muli hupocha mtima bunene mnda alambwe enyu mwahushigala lulimi kaa.