¹ Haho Sofali, Mnaamathi, gugaile na udogoma. ² Wa bibyo malanga manyi mapa byu dogoma, Wa yulu ya abilo-abilo andi nao mnda mwanyi. ³ Nihuliche uambilwa undabiche mmee, Nago mtima gwanyi gwa umana gungaile. ⁴ Wi wii! Ushimanine ino inywa utula aala, Utula mwana gwa mtu gushinabiwa hegulu ha sii, ⁵ Ugana useelela wa babii iwa mengo macho, Na saso lya bangila biibi ilwa mengo mamechi ka? ⁶ Inangwa bwata bwage bunasela ndaa na ha gulu, Na mswe gwage uhyila u mtimba; ⁷ Ata bibyo gwichimiwa milumbu nahi tubi twage gee mine; Baya bene bammonine bigana, Guli uhi? ⁸ Gwiguluwa nahi malo, gashimoneye; Ehe, gwichingwa nahi malo mamtima ma m'busugu, ⁹ Liiso lyine limmonine lishimmona iyaka; Na ata ihana yage ishi mlingamina iyaka. ¹⁰ Baana bage bienga yano u ba mbuchu, Na maboo mage migiwicha bitundu byage, ¹¹ Mauda mage magilule buwa lubaga bwage, Ata bibyo wilala nage hasi mmihwili. ¹² Inangwa usona uli saa mmanywa age, Inangwa gwagibisa hasi ha lulimi lwage; ¹³ Inangwa gwaumonena keene gashioleye uligile lwage. Ata bibyo gwiuwata mmanywa age; ¹⁴ Ata bibyo iliwa yage mnda mwage ili hugaluwa, Isili bululu bwa uhaga misowa gya mnda mwage. ¹⁵ Gwamina bitundu, nage gwibisela iyaka; Abetcha gwibihunya mnda mwage. ¹⁶ Gwilamba Buganga bwa uhaga misowa; Na lulimilwa iloba lwimmaga. ¹⁷ Gushichilola chicho ngudi cha maadi, Tuya yoodi tuli tugiluchu bui na buleba. ¹⁸ Byelidegele mgilo gwibigiwicha, gashibimine; Wa bitundu byelipashile, gushiseelela. ¹⁹ Bululi gubamonene na ubashiga ba mbuchu; Gusapile ndu wa buhulihuli, na gushigigubaa. ²⁰ Wa ibalo gushimanine ulitolelecha mnda mwage, Gushihonya yoyose mnda iya yine yeli seelele. ²¹ Hashishigele itu yine yelilile; Wa bibyo ugilila wage ushihama. ²² Mnda ugilula wage wage gubi mnda asusu; Uboo wa gegese mine gulihususulwa wimchwila. ²³ Haho henehaliligilucha gumo lyage, Abetcha imtelela buhuchi bwa uambila wage, Na ubunyesha hegulu hage mengo mebi gulihuya. ²⁴ Gwisina aome a igela, Na buta bwa mmubo bwimtunga ubili. ²⁵ Gee gwaguhunya, nago gwahuma nda m'bili gwage; Ehe, songo gyugema gyahuma mnda iinyi yage; Udidibulwa uli hegulu hage.. ²⁶ Mdoo gose gwabiwa yulu ya lindo lyage; Aahya ene ashi hulilwe na mtu imchigya; Ichigya byine bishigele mnda itula yage, ²⁷ Gulu lyibulula hululu usona wage, Nagyo sii gyiginyuwa pinda piswa yulu yage. ²⁸ Bibya bya ndu gyage byigululwa, Byigeswa koo ha lusugu lwa uchigililwa wage. ²⁹ Ino noo ibaa ya mtu msone yuhuma wa Abetcha, Na buhyana bwelibiilwe na Abetcha.