1 Haho Ayubu gugaile, na gudogomine. 2 Wi wii! Mwinjigiliche ata mengo nai, Na uunoga-noga wa binywa? 3 Nyendo umi chino mwangiluucha; Mushihumona abule ungitila bihisho bya bigumu. 4 Inangwa mwaluba, Usona wanyi washama wandi nene mine. 5 Ugana mwilibanga yuluyanyi, Na udogoma yuluyanyi ugiluchiiwa wanyi; 6 Maanywe ugana Abetcha andubya, Na unyunguluwa na bwila bwage. 7 Loolwe, nihulila, Usapwa, ata bibyo nishihuhulichiwa; Nilihulilila uwatilichiwa, nahashiuononywa. 8 Gee gwachiba ndila gyanyi nashihite, Naubiya mdoo mnda mahitilo mnyi. 9 Gwanjula ugengda wanyi, Na upunya sala umswe gwanyi. 10 Gwambela ngubi chose, nene nigile; Na maudagilo manyi gumachulile nahi mti. 11 Iyaka gwalamya uchigililwa wage yulu yanyi, Gumbalile ubanahi gumwe gwa basusuchi bage. 12 Basolokoto bage basushena hamwechi, Na uusedecha mitala mitala mndila gyabo, Na ugimiya bushamo bwabo uchunguluwa itula yanyi. 13 Gwababiya bashuwetu koo nanyi, Na bene bangidi babagulilwe nanyi abisa. 14 Batu ba ibushi yanyi basunga, Na magenda manyi bene basuunda bangibilila. 15 Bene balihushama mnda ndu gyanyi, na bagichi banyi ba baachana, bambala uba mgenyi; Nene nili mgenyi u meeso mabo. 16 Namgita mgichi gwanyi, nage gushi hungitabuwa, Inangwa nili humtendelela na anywa anyi. 17 Luhuda lwanyi luli nahi lwa mgenyi uli mmachanyi, Nene nili byuchigilicha uli bashiwetu. 18 Ndaa na u baana ba bacho-bacho bali hunenuna; Nabebateya mgongo, baluhung'amba. 19 Bahietu bose balihukonywa; Na baya bene bandibele huunda bangalwile. 20 Uda lyanyi lyawatana hamwechi na ibambi yanyi na nyama chanyi, Nene nahogonowa na ibambi ya meeno manyi ka. 21 Mbonenywe keene, mbonenywe keene, benywe magenda manyi, Wa bululi oboo wa Abetcha wakuda. 22 Yulu yai benywe mulihundegya nahi Abetcha, Na mushigyushile na nyama chanyi? 23 Ehe, binywa byanyi byabagolwa hano! Ehe, byabagolwa mnda itabo! 24 Byabagolwa u liwe lya m'bachwa ndaa na milumbu, Wa kiliyo gya igele na gya lisasi. 25 Ata bibyo nene nigidi ugana Gupidicha gwanyi guli poo, Na ugana gwigima hegulu ha sii, 26 Na hanyuma ha ibambi yanyi udoga biino, Haya, hashibi na m'biili gwanyi nimmona Abetcha; 27 Nene nimmona na ichuli-chuli yanyi ya mwego, Na meeso manyi mimlingamina, na gushi gunge. Mtima gwanyi gwachiminya malanga mnda mwanyi! 28 Nambo m'bedogoma, Biya byatwimdegya! Wa bululi shina lya ino ihishoyamoneya weeli; 29 Ushimone booba ahilu; Wa bululi uonona wa ahilu uli na uchigililwa, Biino mumane ugana uonona uliho.