¹ Mtima gwanyi gwachiminya malanga, masugu manyi masunga, Sinda lisilitayali ungaa. ² Ii winene bali wandi bene bali na ungilucha, Liiso lyanyi lili lishame mnda umbiya usuma wabo. ³ Upe mbwate ya magulu biino, ube mbwate ya magulu yulu yanyioli gogwe; Ulinahyi mine gwimbiila ya mwate ya magulu? ⁴ Bululi mitima gyabo byabisa lweenyi; Wa bibyo ushibagimiya. ⁵ Gwionywa magenda mage babe buhibi bwage, Ata meeso ma baana bage migingila abele. ⁶ Gungitile nabe iina ubatu; Nibele mtu gwa uonyiwa wa hululu. ⁷ Liiso lyanyi nalyo libele mdoo bululi bwa byosochi, Na bilumbu byanyi byose bya m'bili bibele nahi ihochu. ⁸ Batu na kiine bigagilwa nabibyo, Na guya mine gushi na abachi gwiliginuna hegulu ha gwilubicha. ⁹ Bibyo mtu gwa kiine gwilama ndila gyage, Nage mine gwina maboo mahaha gwihima uba na uoma. ¹⁰ Biino chuwe, benywe bose, chuwe hano; Na nishimmona mtu mine gwina lwengu hawingi henyu. ¹¹ Masugu manyi mahuhita, malanga manyi mabeleya, Ndaa na maya mene mandi namo mnda mtima gwanyi. ¹² Wagalula busugu uba mchuba; Wagana, Ugema uli hoka yulu ya mdoo. ¹³ Nilihulolela usinda uba ndu gyanyi; Nilihuganda bya ulalila mnda mdoo; ¹⁴ Uba naugita udoga, Gogwe uli tata; Na usambila yolo Gogwe uli mago, na kachanyi; ¹⁵ Biino, maudagilo manyi mali uhi? Na maudagilo manyi, mnanyi gunamamona? ¹⁶ Misala ndaa na u mlimba gwa usinda, Haubi ulitucha mmihwili. Bidadi.