¹ Haho Ayubu gugaile, na guganine. ² Nihuliche binywa biingi mlingilishi gwa bibyo; Benywe bose muli bahungyi bene bali hususula. ³ Wi wii! Binywa byine bishi na alambwe bibi na isula? Na hali ii yine yuchigilicha, na wagaa? ⁴ Na nene nabaoshaudogoma nahi benywe; Nambo mitima gyenyu gyisuba ha ihana ya mtima gwanyi, Nabaosha usulula binywa yulu yenyu, Na ummaila mswe gwanyi. ⁵ Ata bibyo nabam'biiya uoma wa anywa anyi, Na umemena wa milomo gyanyi waba hucha. ⁶ Inangwa nadogoma, uchigililwa wanyi usahola; Inangwa nalichibila, nahungwilwa itu nai? ⁷ Ata bino gukiminye; Mlongo gwanyi gose waguita uba mauwa. ⁸ Umbwashile abisa, noo mangisio yulu yanyi; Na ugonda wanyi wanginywina, wa umangisiya u yenyi yanyi. ⁹ Gwasambula wa uchigililwa wage, na uumonena; Gudigile-digile meeno yulu yanyi; Msusuchi gwanyi ukunjwila meeso wa buhuchi, ¹⁰ Bambululila tunywa twabo; Upula pii u matama wa utuwa; Ulisumbicha hamwechi yulu yanyi. ¹¹ Abetcha ambiile hegulu habo ba bilubicha, Na uutele mnda maboo ma baabi. ¹² Nibele mnda mwa ulitucha, nage gunogile-nogole; Ehe, gumbwashile u oshi, na upina; Iyaka gungimiya nabe itoto yage. ¹³ Bashi bage ba migwii bali banyunguluwe ngubi chose, Guli huunoga lubunda lwanyi, gushihuumonena keene; Kundu chanyi gwachigesa hegulu ha ubitete. ¹⁴ Gwa nooga na unoga na unoga iyaka; Gwambulaga nahi ubulagwa na ilume pambwa. ¹⁵ Niluwile bichwalaganywa bya madagala nauchwala ha m'bili gwanyi, Na lwiga lwanyi nalubisa m'bitete. ¹⁶ Yenyi yanyi yadoga yulu ya usuwa byosochi, Na mdoo goka guli u bilili byanyi; ¹⁷ Inangwa hashi buhuli-huli mnda maboo manyi, Na usaba wanyi uli usoga. ¹⁸ Ehe sii, ushihulile maashi manyi, Na lilo lyanyi lishibe na ihana ya ulitucha. ¹⁹ Ata biino, loola, m'bangisii gwanyi guli ha gulu. Na guya mine gwiinyemya guli hegulu. ²⁰ Magenda manyi mali humbedula; Ata bibyo liiso lyanyi lili lumgesela Abetcha luhanga; ²¹ Nambo mtu gwabammilila Abetcha byelihuunda, Gamdogomene mwana gwa mtu umbele wa m'binji nage. ²² Uba hahuhita myaa giicho, Nigya mnda ndila giya gyine gyandishigiwila iyaka.