¹ Haho Elifazi, Mtemani, gugaile na udogoma, ² Wi wii! Bilingye mtu gwa lwengu gagae wa umana wa bwenge, Na ugilucha gumo lyage na mnaga gwa mlugulu? ³ Wi wii! Gabuche na ugombola byine bishi na alambwe, Ao, wa binywa byine byeshinagila bisoga wabili? ⁴ Ehe, gogwe wahunya bunyemu, Gogwe washibila inyumbya u mbele wa Abetcha. ⁵ Bululi usona obe wauhamba anywa obe, Gogwe wasobola lulimi lobe lwine luli na abachi. ⁶ Anywa obe gogwe mine uononena uluba, na gushi nene; Ehe, milomo gyobe gogwe mine gilihubangisiya yulu yobe. ⁷ Wi wii! Gogwe uli mtu gwa mtangi ubuswa? Ao, gogwe ubushilwehambele ha koono? ⁸ Wi wii! Uhuliche mihungo gya lubisagulu gya Abetcha? Wi wii! na gogwe, Wachibila lwengo lube lobe gogwe ka? ⁹ Wi wii! Gogwe ugidi inywa nai, yine yatushigidi beswe? Gogwe uli mmane ii, yine ishi mnda mwetu? ¹⁰ Bene nali na mbwii, na miungu abisa, bose bali hamwechi netu, Bene bali miungu uhima sobe. ¹¹ Wi wii! Uhungya wa Abetcha uli uchoo abisa oli, Na iyo inywa ya mateamanya ishi atu oli? ¹² Yulu yai mtima gobe gusambuanya! Na meeso mobe, wii! Yulu yai malihugema? ¹³ Na ugalule mtima gobe pinda piswa na Abetcha, Na uhunya binywa nahi bibyo mmanywa mobe. ¹⁴ Wi wii! Mwana gwa mtu iyitu nai, na gabe mmaha? Gugo gubushilwe na mmachana, ata gabe na kiine? ¹⁵ Gee gushibaudagila bahaha bage; Ehe, gulu lyabo lishi lihaha u meeso mage. ¹⁶ Uhima mtu guya mine guli huchigilicha na usona, Mwana gwa mtu mine gulihunywa buubi nahi mine gulihunywa maadi! ¹⁷ Nene niumonya, upuliche; Na bibyo byose byandimonine nibigana; ¹⁸ (Ugana batu bene bali na lwengu balisamba byo Utula bamasabo, na bashi bibisile. ¹⁹ Bene bahelwe gigyo sii boo buchima, Ata mgenyi gushihishile hawingi habo); ²⁰ Mtu m'bii gusuba na usuma masugu mge mose, Ata lubalo lwa myaa gyelibiilwe guya mtu gwa gumonenana. ²¹ Liidi lya umonya booba lili mmatu mwage; Ha ugililwa wage m'bwashi gwa kole gwimchwila hegulu hage. ²² Gee gushihuwasha ugana gwigiwila uhuma mnda mdoo, Nage gulihuhembwa na ahilu; ²³ Guli huhubagana hubagana yulu gapate iliwa, gulihugana ili uhi? Gugidi ugana lusugu lwa mdoo luli hoka nage; ²⁴ Asusu na unyogwa bili hum'biya booba; Bili hummima nahi biya oolo lili tayali u bita; ²⁵ Bululi gwagolola uboo wage umgalwila Abechta, Na ugyata na anene uli Mine guli na uoma wata; ²⁶ Umsumbilila wa oshi ligumu, Wa byundo byata bya ngabo chage. ²⁷ Wa bululi gwaunina yenyi yage na unona wage, Na lubunda lwage ulunonya na mauta; Nage gushamine mnda mabuga mene mali mauwa, ²⁸ Mnda ndu gyine gisha na mtu guuchiya, Mene mabele tayali uba bibunduguchu. ²⁹ Gushibi tayali, na bitundu byage bishihama, Na biliwa byage bishibi biingi mmino ibaloo. ³⁰ Gushihuma mnda mdoo; Ndili cha aahya chigumya matabi mage, Nage gwihuma wa luhuda lwa anywa age. ³¹ Gashiudagile bya bunene, na ulibicha; Bululi bubo bunene noo abi alambwe age. ³² Ino ihisho yigiliya hambele ha mengo mage. Na tabi lyage lishihama. ³³ Gwiukununa biguma byage byina bishi naoma nahi bya mzabibu, Na uong'ona buluba bwage nahi bya mzeituni. ³⁴ Bululi mlongo gwa babo bene bashihumnyemya Abetcha babi bigumba, Na aahya ichigya bitula byine bili na bugeda milomo. ³⁵ Boo balihuswala magumo ma masei, na ubuta usona, na magumo mabo malihulongya bya ubichana.