¹ Mwana gwa mtu, mine gubushilwe na mmachana Masugu mage ma uba na mwego mashi meengi, mali magiluchu na asusu. ² Nage gususola nahi biya sange, hanyuma nuugechwa; Gususina nahi ihochu, nage gushibashama abisa, ³ Gogwe wii! Wabulula meeso mobe umlola mtu nahi gugo, Na umbiya mnda uononywa hamwechi na gogwe? ⁴ Mnanyi gunaosha uhunya itu isoga ihume mnda itu isone? Hashi gunaosha. ⁵ Wa bululi masugu mage mali maganywe, lubalo lwa myechi gyage unagyo gogwe, Gogwe wam'biila ng'umba chage cheshinaosha uhita; ⁶ Leeya umlingamina gee, gaoshe ulitucha, Ndaa nahelihwa uwiicha masugu mage, nahi guya mine guhigilwe. ⁷ Bululi hali maudagilo ma mti, yulu gubegechwa gwitota iyaka, Na ata maotela mage mashisunga. ⁸ Inangwa micinga gyage ginaota mmisee, Na shina lyage ua mnda bitete; ⁹ Wa yulu ya bushio bwa maadi gwitota, Na utota matabi nahi mti gwa mlubala. ¹⁰ Ata bibyo mwana gwa mtu gusuwa, gusuwa mno mmibaloo; Ehe, mwana gwa mtu mtima gusuhuma nage guli uhi? ¹¹ Nahi biya maadi byamasuhunguwa mnda bahali, Na luudi nalo lusuhunguwa na uguma; ¹² Noo bibyo mwana ga mtu gusulala hasi, gashibyuwe; Ndaa na mengo maya mashibi hoiyaka gulu bashigimana, Na ata ubyulwa mnda tulo. ¹³ Hange wabambisa usinda, Ukusa wa lubisagulu, ndaa na byihita uchigililwa obe, Na umbiila mengo mene maganinywe, na ukengelecha! ¹⁴ Mtu gabewa, wi wii! Gubi na mwego iyaka? Nene nisuba uhemba masugu mose ma bita byanyi, Ndaa na usulwa wanyi upyiile. ¹⁵ Gogwe wabagita, nene nabagitabuwa; Wisuba na itimaya mgilo gwa maboo mobe, ¹⁶ Ata bino ulihubala matamba manyi; Wi wii! Ushihulingamina buubi bwanyi? ¹⁷ Uluba wanyi wabiwa yaali mnda itanga, Gogwe wahamba usona wanyi. ¹⁸ Biino, loola, loono lubegwa hashishigala hashi atu, Nalyo liwe lya lyata lisuhunyiwa ha ihana yage; ¹⁹ Maadi meengi masuhungula mawe; Uhongolowa wage usuguha isee ya umgala; Gogwe maudagilo ma batu mabachimya. ²⁰ Gogwe wammima uoma masugu mose, nage gusuhita gagye lwage Usugalula yenyi yage, na ummisha gagye uhagwa. ²¹ Baana bage balihulanga bunyemu, ata bibyo gee gushigidi; Hanyuma boo balihudamba mmee, ata bibyo gee gushi na mwano gwabo. ²² Bibyo m'bili gwine guli hegulu hage guli na masumwa, Na ichuli-chuli yage ya mwego yine ili mnda mwage ili na malilo.