1 Loola, liiso lyanyi lyamona bibyo byose, Liitulyanyi lyahulicha na umana bibyo. 2 Bibyo byine byamugudi benywe; na nene nibigidi; Nene nishi ahoso uli benywe. 3 Chigilwe nabadogoma nage gugo Mine gwina uoma use, Nene nihubenja ugombola na Abetcha. 4 Ata bibyo benywe mulihusula binywa bya lulimi, Benywe bose muli bagudahi bashi babawilile. 5 Biino, mwabashama pii abisa! Iyo yisuba lwengu wamli. 6 Hano hulichiwe byandihubenja, Mwahuliche mahindi ma milomo gyanyi. 7 Wi wii! Mwidogoma bishi bya kiine yulu ya Abetcha, Na udogoma bya lulimi yulu yage? 8 Wi wii! Mwimonya gee ugegamina lumwe luubi? Mwimdogomena Abetcha? 9 Wi wii! Bibi bisoga gee ummenga benywe?Ao, nahi um'bicha mtu, wii! Mwim'bicha gee? 10 Chigilwe gwimmambila benywe, M'begegamina batu wa lubisagulu. 11 Wi wii! Bubo bwata bwage bushi m'biiya iduba, Na udanja wage uhibi hegulu henyu? 12 Midogomenyi gyenyu gya lwengu ii mihingu gya mtoo, Migumbo gyenyu ii migumbo gya bitete. 13 Shamwe pii, ndewe, bululi nadogome, Na biya byine byinjilila na bichwe. 14 Niswala nyama cha m'bili gwanyi u meeno manyi, Na uguha mwego gwanyi mnda uboo wanyi! 15 Loolwe, gwipaga, nishi na maudagilo; Na ata bibyo nigibiya hululu ndila gyanyi u mbele wa meeso mage. 16 Iyo nayo ibi noo uhogononywa wanyi; Bululiguya mine gushi humnyemya Abetcha gushihiya u mbele wage. 17 Hulichiwe abisa binywa byanyi, Udogoma wanyi na ugingile mnda matu menyu. 18 Lingaminywe abisa, nahuhwa ulongya inywa yanyi, Nigidi ugana nene nili mtu gwa kiine. 19 Mnanyi gunahimana na nene? Bululi hano nishama pii na mtima gwanyi nuupuma. 20 Ata bibyo mishingilile bihisho bibili, bibyo kaa, haho nene nisilibisa u yenyi yobe; 21 Uhunye uboo obe ushindemene; Na anyemu obe ashimbiye iduba. 22 Biino ungite mamo mengo, na nene nigitabuwa; Ao, undeye nadogome nene, na gogwe wangae. 23 Usona wanyi na buubi bwanyi m'bunga? Umanye ugugila wanyi na buubi bwanyi. 24 Yulu yai wambisa yenyi yobe, Na umbala uba amangu obe? 25 Wi wii! Wiisusula yaanyi ilihugululwa? Ao, wi wii! Wilaminina bibyo bihupu bya bigumu? 26 Bululi wagola binywa bya bigumu yulu yanyi, Na umngisiya buubi bwanyi bwa buwalubaga bwanyi; 27 Wabiya magulu manyi mnda tumangila, na uonona mahitilo manyi mose; Waligolela ishaa ya uchunguluwa maasa mamagulu manyi; 28 Inangwa nili nahi itu ya ibochu, ya igugichu, Mlingilisho gwa ichwalaganywa yiilibe na icheche.