1 Haho Ayubu gugaile, na gudogomine, 2 Hashi adugwa benywe noo batu ba bawilile, Benywe hamwiwa, haho lwengu lwisunga. 3 Ata na nene nage, nina bumana nahi benywe; Nene nishi mmugi wamli benywe; Ehe, mnanyi gushinamana bihisho nahi bibyo? 4 Nene nili mtu gwa usewa na magenda mage, Nili mtu mine gumgishile Abetcha na gungitabwile; Gugo mine gwina kiine, guli m'bwilile, gusili biseewa. 5 Mnda malanga mage gugo mine gwina ulitucha muli unenuna adugwa; Tayali wa yulu ya guya mine guli hushelemuwa magulu. 6 Itulaya bamsapwe yungwe isugilula, Na baya bene bali humchigilicha Abetcha basushama kilongecho; Mmaboo mabo Abetcha gusubiya bitundu biingi. 7 Biino hano uchibuche chicho nyama,nacho chiugigya; Na tunonyi twa ha hululu, nato twiusambila. 8 Ao udogome na sii,nagyo gyiugigya; Nacho swii cha m'bahali chyiusambila. 9 Mnda bibyo byose iyii ishigidi, Ugana iyuboo wa MLUME wine ugilile biino? 10 Ugana ichuli-chuli ya mwego ya byine bili na mwego bii mnda uboo wage, Na luhuda lwa batu bose. 11 Wi wii! Liitu lishi noo lisu lisulingilila binywa, Nahi biya songo gya lulimi byalusutonda iliwa? 12 Bauulu noo bali na lwengu, Na yulu ya ushama masugu meengi hali umana. 13 Lwengu na alago ali na gee [Abetcha];Gee gula na mihungu na umana. 14 Loola, gusubela, na bishinaoshiwa ugubawa iyaka; Gusuhamba mtu na bishinaoshiwa umsula. 15 Loola, gusuchibola maadi, namo masuguma; Iyaka; gusumahila namo masuchinja ibaloo. 16 Wage gee uli uoma, na mihungo ugiliya; Gugo gusubichiwa, na m'bichanyi nage ii gwage. 17 Gee gusubahunya bahungi wa ubawasha kole, Nage gusubaita ba tululiya uba bahugi. 18 Gee gusudegecha ihambo ya bamaoolo, Na ubahamba munda chabo wa michingo. 19 Gee gusubahunya ba bibuli wa uwaswa kole. Na ubahyugutula na bilume pambwa. 20 Gusuhunya midogomenyi gya baya bene baudagilwe, Na uhunya lwengu lwa bauuu. 21 Gusuhongolola abule hegulu hababo bahela, Na udegecha mchingo gya mine guli uoma. 22 Gusuununa bihisho bya lubisa gulu nda mdoo, Na iya yine ili mdoo ka ugaluwa uba ugengeda. 23 Gusubucha mioga na ugichimya; Gusudagalacha mioga koo, na ugishiga. 24 Gusuhunya mtima uli bauulu ba batu ba sii, Na ubachiminya mnda lwanaganywa mine mushi ndila. 25 Boo bali bubabata mnda mdoo mine mushi na ugengeda, Nage gusubaita ulugila nahi biya mmulwa.