¹ Hanyuma ha haho Yesu gugile m'bwala mwa ichiba ya Galilaya, nayo iyaka noo ya Tibeliya. ² Mwalo gwa bamlamine, yulu babimonine bisaga bieliitile basumwa. ³ Nage Yesu guselile uloono, gushamine ubo hamwechi na bagigiwa bage. ⁴ Na pasaka, sumbile lya bayahudi lisibele alibu. ⁵ Haho Yesu guginuile meso mage gumonine mwalo gwa batu guli huchwa weli, gumsambile Filipo, tuigula mikati uhibano baye? ⁶ Na iyo gudogomine wumtonda; yulu gumanine gee mine bieli ita. ⁷ Filipo gumgaile, mikati gya dinali sambi chibili chishinabaosha, kila mtuguiya hichohichoka. ⁸ Bakikiwa bage gumwegabo, Andele, mmuluage Simoni Pedelo, gumganine, ⁹ Hano hali mwana, guli na mikati gitano na swii biopi, noi ii u guno mwalo gose? ¹⁰ Yesu gubasambile, babiwe batu hasi. hayaa hababele hebele biani biingi bibyo balumiana bashamine, babele alibu ukii chitano. ¹¹ Haho Yesu guguhile giya mikati, guheleleche, gubagabile babashame; na bioka biya na swii bagabulilwe bose biababendiche. ¹² Nabo habogiutile, kubasambile bakikiwa bage, ongolwe bitundi bya bishikachu ishichimine ata ihindi imwechi. ¹³ Babiongwele, bitanga umi na biopi, biya bihindi bya gia mikati gitano bishigele ubililwe. ¹⁴ Na baya, habamonine iya isaga yeligilile, baganine, wiinene gugu ii mbua giya giichwa mmibalo. ¹⁵ Hanyuma Yesu bibyo gumanine ugana bali buchwa umgimina na um'bia gabe olo, gulibayule, gugile iyaka ulono gee buchima. ¹⁶ Hasibele mengo ma igolo bagigiwa bage basalile wiichiba. ¹⁷ Bagingile m'bwato, batulile udabwa ugya Kapelenaumu. Na mdo gusibele ho na Yesu gushibele nahia wa bali. ¹⁸ Na mnaga hagutulile ututa ichiba usugita. ¹⁹ Batulile ushiila na bibali byabo nahi magulu uki chitatu, china bamonine Yesu gulihugiata hegulu ha madi ma ichiba na uhia alibo na buato, bamwene booba. ²⁰ Nage gubasambile, mnene, nanguusinywa. ²¹ Hababele hubenja bamchinye m'bwato, nabwato busibele um'bega ugya sii giabahehe hugia. ²² Lusugu lwake lwa mabili ihichi ya batu babele bagimanyu mpuata mwa ichiba bamoninehashi bunge bwato ila buya bumwechi ma yulu Yesu gushigingile iibuya bwato hamwechi na bagigiwa bage, yulu bagigiwa bage bagile boo buchima. ²³ (Bibyo hachuile mange maato uhuma Tibelia, alibu na haya hena habalile mikati, mengo maheleleche mlume). ²⁴ Ihichi ya batu habamonine Yesu gushibele uya ata bagigiwa bage, iya ihichi ya batu bachimine bobene mmaato ugya Kapelenaumu umenga Yesu. ²⁵ Habamonine m'bwala mwa ichiba, bamsambile mgigya, gogwe wa chua mengo nai? ²⁶ Yesu gubasambile, guganine, bibyo, bibyo nihumsambila, benywe mulihukenga, ishi yulu mumonine isaga, ii yulu mulile giya mikati na mugiushile. ²⁷ Nangu uigilila mkilo iliwa yin yidoga, bibyo muigilile mgilo iliwa yine yishama ata mwego gwa milumbu, iya yine yiima mwana gwa Adamu, bululi gugo noo gubiilwe yala na tata noo Abeca. ²⁸ Bibyo, bamsambile, tuitewii bululi tugile mkilo gwa Abeca? ²⁹ Yesu gubakaile, gubasambile, guno noo mkilo kwa Abeca, mum'bwasha guya mine gutuminywe nage. ³⁰ Bamsambile, haita isaga nai, tuimone bululi tuuwashe? Waita mgilo nai. ³¹ Bamsetu balile mana mluanaganywa, nahi bia biabikolilwe, gubahele iliya ya hegulu bululi baye. ³² Yesu gubasambile, bibyo bibyo, nihumsambila, gushi Musa gubahele iliwa ya hegulu, na tata gumma benywe iliwa kiine yasala hekulu. ³³ Bululi iliwa ya Abeca ii iya ilihusala uhuma hegulu na uiha ihalo mwego. ³⁴ Bamsambile, mlume utuhe ii iliwa masugu mose. ³⁵ Yesu gubasambile, nene noo iliwa ya mwego mine guichua wandi gushimona iyaka, na mine guim'bwasha gushimona yuma. ³⁶ Bibyo niimsambile ugana mulihumona na mushihumbwasha. ³⁷ Bose bapa tata biichwa wandi, na gegese guichua wandi nishimtela hambuga. ³⁸ Buhuli nene nishisalile uhuma hegulu naite biandi hubenja, ii ubenja wa mine gutumine. ³⁹ Na ubenja wa mine gutumine noo uno, bose belipele nashichiminye ata gumwechi guabo. ⁴⁰ Bululi ubo noo ubenja wa tata ii ugana gese guimlola mwana na um'bwasha gee, gabe na mwego ga milumbu, na nene nimchula lusugu luisula. ⁴¹ Bayahudi bamnunile bululi gubasambile, gee ii iliwa isalile uhuma hegulu. ⁴² Baganine gugu gushi Yesu mwana gwa Yesusufu guatugidi sage na mnage? Bino guli hudogoma wii guno, nisalile uhuma hegulu? ⁴³ Bibyo Yesu gubasambile mileye ununilana benywe bene wa benywe bene. ⁴⁴ Hashi mtu gunaosha ucha wandi, gusahuhilua na tata gutumine; nanene nimchula lusugu lwa isula. ⁴⁵ Bigalilwe na ba mbua, nabose bigigiwa na Abeca. Na gese guhuliche na uligigia uhuma wa tata kuichwa wandi. ⁴⁶ Ushi ugana mtu gumonine tata, ii guya guhumine wa Abeca, gugo noo gummonine. ⁴⁷ Bibyo bibyo, namsambila, gee guawasha guina mwego gwa milumbu. ⁴⁸ Nene noo iliwa ya mwego. ⁴⁹ Bamasenyu balile mwana mluanaganywa; bawile. ⁵⁰ Ino noo iliwa yasala uhuma hegulu, yulu mtu gaiye na gashiwe. ⁵¹ Nene noo iliwa yina mwego isalile uhuma hegulu, mtu gabeya ino iliwa, guishama milumbu. Na iliwa yandihana nene ii m'bili guanyi, yulu ya mwego gua balangamsenge. ⁵² Bayahudi bobene wa bobene babele na paa bakanine, guoshawi gugu mtu utuha besue m'bili guake, tuguye? ⁵³ Haho Yesu gubasambile, bibyo bibyo nihumsambila, musahuguya m'bili gwa mwana gwa Adamu na unywa mashi mage, mushi na mwego mnda mwenyu. ⁵⁴ Guya m'bili guanyi na unywa mashi manyi guina mwego gwa milumbu na nene nimchula lusugu lwa isula. ⁵⁵ Bululi m'bili gwanyi iyiliwa ya kiine, na mashi manyi yuunywa ya kiine. ⁵⁶ Guiya m'bili guanyi na unywa mashi manyi guchwe mnda mwanyi na hehe nichie mnda mwage. ⁵⁷ Wa bibyo tata guli na mwego bulitumine nene, na nene mii poo wa tata bioka biya mine guinja gubi poo yulu yanyi. ⁵⁸ Ino noo iliwa yasala uhuma hekulu, ushi nahi bilile bamasetu, bawile, guiya iliwa iyo gushama milumbu. ⁵⁹ Bibyo binywa gubidogomine ii sinagogi, hebele hugigia, uya Kapelenaumu. ⁶⁰ Bibyo batu bengi hawingi habakikiwa bake habahuliche, baganine, ino inywa iyomu, mnanyi gunaosha uihulicha? ⁶¹ Yesu gumanine mnda mwake, ugana bagigiwa bake balihuinunila iyo inywa, gubasambile, ino inywa yamsumia mitima? ⁶² Bibiwii, hamwimmona mwana gwa Adamu gulihusela uya webele utangi? ⁶³ Mtima noo gusubiya mwego, m'bili gushi na alambwe oose, binywa biandamsambila ii mtima, iyaka ii mwego. ⁶⁴ Lolwe uli bange hawingi henyu bashibawashe. Bululi Yesu gumanine ukila ubutulile ii bananyi bashibawashe, na ii nanyi guimana. ⁶⁵ Gugamine, wa bibyo nihumsambila, hashi mtu gunaosha uchua wandi nambo gusadiswa na tata. ⁶⁶ Wayulu ya bibyo binywa hawingi ha bakikiwa bage bagiwile inyumanyuma bashigile nage iyaka. ⁶⁷ Yesu gubasambile baya umin na bopi, nabenywe mulihubenja ugya? ⁶⁸ Simoni Pedelo gumgaile, mlume! tugie wa nayi? Gogwe wina binywa bya mwego gwa milumbu. ⁶⁹ Na besue tuuwashea, iyaka tumanine, ugana gogwe noo mmaha guwa Abeca. ⁷⁰ Yesu gugaile, nene nishimsambwele banywe umi na bopi, nagumwe gwenyo ii ihingili? ⁷¹ Gubele hugana Yuda, mwana Simoni Isikariote; yulu gugo noo guimmona, nage ii gumwe gwa baya umine na bopi.