¹ Hanyuma haho habele na sumbilo lya bayahudi; Yesu gugile Yerusalemu. ² Na uya Yerusalemu ha mchangu gwa miyao hali ina ya madi, ibele hugiswa m'ibulania Betzata, yina busalilo butano. ³ Haho habele basumwa bengi balachu, bihabu, bitende, na ba-bilebe, [babele huhemba mabichiwe. ⁴ Hali mengo ma malaika usala, na ugingila mmina ya machi na ubicha madi. Gegese gilichunda gwa mtangi hanyuma ha madi ubichiwa, guihona na usumwa ose webele nao]. ⁵ Na hano hebele mtu, gwa mgongo hobu gushihuliocha miaa maumi matatu na inana. ⁶ Yesu hali manine guyo mlachu, gumanine gubele bilio masugu mengi, gumsambile ulibenja ube gogese poo? ⁷ Guya msumwa gumgaile, mlume, nene nishi na mtu gusacha mmina ya madi, madi mabebidichiwa; mengo mandisuhia nene, nisubanga gunge guasala. ⁸ Yesu numsambila, gimana, lisuiye mkeka gobe, ubelia. ⁹ Hoka haho guya mtu nuba poo, gulisuiche mkeka gweka, na ukia nalo lubele lusungu lulitucha. ¹⁰ Wa bibyo bayahudi bamsambile guya guhanyiwe, lino ii lusugu lwa ulitucha, bishi bibenju oli ulisuia mkeka. ¹¹ Gubagaile, guya guangita nabe poo noo guasambila lisuiye mkeka na ugie. ¹² Bapundiche, guya gumsambila lisuiye, ugie, ii nanyi? ¹³ Guya mtu guhonyiwe gushimmanine ii nanyi, yulu Yesu gubele mlibayule nabo, bululi haho habele mwalo gwa batu. ¹⁴ Hanyuma ha haho Yesu gummibangile m'ihuilo, gusambile, lola,usili poo; nanyu ugila bubi iyaka, ushichwe uwasua na ikikibia ibii uli ina. ¹⁵ Guya mtu guligilile luage, gubasambila bayahudi mwano ugana ii Yesu bummaninye. ¹⁶ Yulu ya bibyo bayahudi bamuzile Yesu, bululi gugilile iba chuba lya ulitucha. ¹⁷ Gubagaile tala gulihugila ata mano mengo, na nene nigila mkilo. ¹⁸ Yulu ya bibyo bayahudi babendiche tu umaga, bululi gusabela lusugu lwa ulitucha ka, na iyaka hamwechi na bibyo gwamgita Abeca ii sage, gwalita nahi Abeca. Yesu gugaile, gubasambile, bibyo, bibyo namsambila. ¹⁹ Mwana gushinagila ihisho gee mine, gusugila iya yine Yesu miona sage gulihugila, yoyose isugila shibana noo isugila na mwana. ²⁰ Yulu sage gusumunda mwanage, nage gusuumonya byose biesugila gee mine; na bihisho bya biata uli bibyo guimanya, bululi mlage umona bisaga. ²¹ Bibyo nahi tata bielihuchula babu na ubaha mwego, bioka bibyo mwna guibaha mwego bose bene balihubenja. ²² Iyaka tata gushihuonona mtu gegese, yulu gummele mwana uonona ose; ²³ Bululi batu bose bamnyemie mwana, nahi biya biabalihumnyemia tata. Gushihumnyemia tata mine gupilile. ²⁴ Bibyo bibyo nihumganina,nine guchulicha inywa yanyi na ubwacha gee mine gupilile guina mwego gwa milumbu; nage gushiononywa, bululi gwahita uhuma ulubu na ugingila mmwego. ²⁵ Bibyo bibyo, namganine, mengu mahuchwa, namo noo manu, babu habihulicha lidilia mwana gwa Abetcha, na baya bilihulicha babi poo. ²⁶ Yulu na bibya tata guina mwego ii luhuda lwage, bioka bibyo gummele mwana mwegu ii luhuda lwage. ²⁷ Na gummele alaga aa uonona yulu ii mwana gwa Adamu. ²⁸ Mushigigilwe na bibyo binywa, yulu mengo mahuhia, wa baya batu bose bali usinga bihulicha lidi liage. ²⁹ Nabo bihuma, baya bagilile bisoga wa uchuwa wa mwego na baya bagilambi uchuwa wa uononywa. ³⁰ Nishinagila inywa nene mine, biandi huhulicha noo biandi huonona; na uonona wanyi ii wa kiine, yulu nishihuenga ubenja wanyi nene, nihuita ubenja wa mine gupilile. ³¹ Nene nabelimonya nene mine. ulimonya wanyi ushi wa kiine. ³² Uligunge gulihuumonya ubatu, na nene nigidi umonya wage welihuumonya u batu ii wa kiine. ³³ Na benywe muhilile batu wa Yohana, nage gumoninye kiine. ³⁴ Nene nishihugaa umonywa a balanga msenge, nambo nihudogoma bino bululi benywe muhone. ³⁵ Gee gubele na tala lilihulama na ugema, benywe m'bele hubenja useelela lunge lwage mengo mache. ³⁶ Na umonea wandi nao ii wata uli uya wa Yohana; na giya migilo gipele tata bululi nagiwiliche, na gigio migilo giandibugila gilihumonya ugana tata gutumine. ³⁷ Na tata mine gutumine gumoninye. Lidi lyage mushilihulich mengo mamose, na yenyi yage mushibaimane. ³⁸ Na inywa yage mushinayo ishame mnda mwenyu, bululi mushihum'bwasa guya gutuminywe nage. ³⁹ Mulihulola migele, yulu benywe mulihulanga mwina mwegu gwa milumbu mnda mwage, na bibyo noo bili huumonya. ⁴⁰ Mushihubenja uchwa wenyi muhewe mwego. ⁴¹ Nene nishihuhewa bugengeda na balanga msenge. ⁴² Nimgidi benywe musha na luundo lwa Abeca mnda mwenyu. ⁴³ Nene nichuile wa china lea tata, na benywe mushihungaa, gungu gabechwa wa china liage bemine, mwimgaa gugo. ⁴⁴ Munaosha wii uasha benywe bene mulihuhana ugegenda benywe wa benywe, na ugengeda uya ulihuchwa wa Abeca ali a buchima mushi huwenga. ⁴⁵ Mshilange nene nimshitaki wa tata hali mine guimshitaki, gee ii Musa, gwamlihuudagila benywe. ⁴⁶ Nambo mwabam'bwasa Musa, mwabam'bwasha nene; yulu gee gugalile miano guanyi. ⁴⁷ Nambo musahuwasha migolo giage, mwibiwasha wii binywa bianyi.