¹ Yesu heli manine malanga na Bafalisayo bahulicha ugana Yesu guaita bakikiwa bengi uli Yohana na ubachunda. ² (Inangwa gee mine Yesu gushichundile, bakikiwa bage ka). ³ Guhumine ubayahudi nuukiaGalilaya. ⁴ Bibyo bilingie gahitile Samaliya. ⁵ Guhiile mmbuga gya Samaliya, gilihugiswa Sikali, hoka na luya lubala lwine luhelwe Yusufu na sage Yakobo. ⁶ Haho habele na mloba gwa madi gwa Yakobo. Yulu ya ima na luendo Yesu, gushamine haguya mloba gwa madi. Mabele mengo ma kunyia meno. ⁷ Mmachana gwa Msamalia guchwile utaha madi. Yesu gumsambile, pee madi munywa. ⁸ Bululi bagigiwa bage bagile ugula iliwa umbuga. ⁹ Guya mmachana gwa Msamalia guganine, Biliwe gogue Muyahudi usaba madi wendi,na nene ni mmachana Musamalia? (Bululi Bayahudi bashibahulichana na Basamalia). ¹⁰ Yesu gumgaile, na umsambila, nambo wabamana karoma gya Abeca,na mnanyi gulihusammbila; pee madi nanywe,wabamsaba gee, nage gabauba ma mwego. ¹¹ Guya mmachana gumganine, mlume ushi na itu ya utaha nayo na mloba guli mdungu; bibyo wamahumia uhi mamo madi ma mwego? ¹² Gogue uli mmosobu ulisetu Yakobo, gutuhele guno mloba, na gemine gunywine mano madi, na bana bage nabo, na bisunganywa byake. ¹³ Yesu gumgaile, gese mine gwinywe mano madi gwimona yuma iyaka. ¹⁴ Gegese mine gwinywa madi maya mandimma nene gushimona yuma mlumbu,bululi maya madi mandimma malimsula gwa madi na ugilulila mwego gwa milumbu. ¹⁵ Guya mmachana gumsambile, mlume, pee mamo madi, nashimone yuma, na nashichwe iyaka utaha. ¹⁶ Yesu gumsambile, ugye ukita mlumiobe, uchwe nage hano. ¹⁷ Guya mmachana gugaile, na udogoma, nishi na mlume, Yesu gumsambile wadogoma bibenju, nishi na mlume. ¹⁸ Yulu ubele na balume batano, na guya goli nake gushi mlumiobe. ¹⁹ Guya mmchana gumsambile, mlume, na namona gogwe wii mbua. ²⁰ Bamasetu batambibile u lulu luono, na benywe muli hugana uya Yelusalemu noo wiligiye beswe ugya utambikila. ²¹ Yesu gumsambila, mago, ungitabiche, mengo mahuhia mene mamushibi hutambikila taba u luno lwano, wala uya Yelusalemu. ²² Benywe mulihutambikila yamshikidi: beswe hili hutambikia yatugidi; bululi ohoma wachwa uhuma u Bayahudi. ²³ Mengo mahuhya, namo noo mano, batambikichi ba kiine bemtambikila tata wa mtima gwa kiine. Bululi tata guluhubaenga batu nahi babo bamtambikile. ²⁴ Abeca ii mtima, na bumtambikila gee balingiye bamtambikila wa mtima na biine. ²⁵ Guya mmachana guganine, nigidi guichwa mshinyiwa mauta (guhugiswa Kelesitu): nage helicha, gee gutuinunili bibyo bihicho. ²⁶ Yesu gumsambilem nene nihudogoma nobe, noo gee. ²⁷ Hanyuma ha hano bakikiwa bage bachuile, bakakilwe kubele hudogoma na mmachana, hashi gudogomine, ulihuenga ii? Yulu ulihudogoma nague? ²⁸ Haho guya mmchana gushigile mtando gwake, gugile umbuka ubasambila batu. ²⁹ Chuwe, utala guno mtu gumsambila byose biandihishiche. Guno gushi noo Kelesitu? ³⁰ Bahumine mbuga nugia uli Yesu. ³¹ Hanyuma bagigiwa bage, bamtongelele, bamganine, mgigya,ubeya. ³² Gee gubasambile, nene ninayoo iliwa ya mushigidi benywe. ³³ Bakikiwa bage badogomiene, ulimtu gwamhuila na iliwa? ³⁴ Yesu gubasambile, iliwa yangi noo ino, nagile bili hubenja miine gupilile, nahue mmgilo gwake. ³⁵ Ati benywe mulihugana, hiwilila miechi gitatu, noo mengo musola? holue, nene nihumsambila, ginunywe meso menyu lolue mobala, sange chahuguma, masili mengo ma usola. ³⁶ Na meshi gusuhewa alambwe, na uongola bisolwa ganyua u mwego gwa milumbu, bululi guya guunine na guya msochi baseelele hamwechi. ³⁷ Yulu iyo inywa ibe winene, gumwe gusuuna na gunge usola. ³⁸ Nene nilihummila usolo biya bishimdegiche, bange badegile, benywe mwagingila na uya bya ausu obo. ³⁹ Mgiya msuga basamalia yulu ya inywa ya guya mmchana, gubasammbile ugana, gwasambila bihisho byose byandikilile. ⁴⁰ Baya basamalia habamkilile, bamtongelele gashame waba, nage gushamine nabo masugu mabili. ⁴¹ Beenngi bawashiche yulu ya inywa yage. ⁴² Bamsambile guya mmachana, bino twawasha, ishi yulu ya binywa byobe ka, bululi twalihulidicha beswe bene, iyaka twamana ugana winene gee noo mmonya guibalo. ⁴³ Hanyuma ha masugu mamo mabili, guhumine ubo na ugya Galilaya. ⁴⁴ Yulu Yesu gemine gusibele gwa hugana mbua gushi na bunyemu mmibale yage. ⁴⁵ Bibyo helihiile Galilaya, bagalilaya bamgaile; bululi bomonine bihisho byose bieli gilile uya Yelesalemu mengo ma sumbila; baya nabo bagile uliya sumbila. ⁴⁶ Hehiile iyaka Kana gya Galilaya, uya waligalulile madi uba mmena. Habele gumwe mmata ga sii mwanage gubele msumwa uya Kapelenaumu. ⁴⁷ Gugo hehuliche ugana Yesu gulihuchwa uhuma ubayahudi na ugya Galilaya, gumgilile Yesu na umtongelela gasale na gammonenye mwanage, mine gubele alibu na uwa. ⁴⁸ Yesu gumsammbile, musahumona bisaga na bia tenene mushiwosha. ⁴⁹ Guya mmata gwa sii gumsambile, mlume, sala mwananyi gushinawa. ⁵⁰ Yesu gumgaile, ubegii, mwanobe guipoo. Guya mtu guwashiche iya inywa iganine Yesu, nage nuugya. ⁵¹ Na hebele husala, bache bake bamgaile, bamganine mwanobe guipo. ⁵² Haho gubabundiche u mengo nai magahuna, nabo bamsambile mmakeshi mengo ma bihinndi njuu bya chuba, hommuna homa. ⁵³ Bibyo sage na mwana gumanine na moka maya mengo maganine Yesu, mwanabe guipo. Gee guwashiche na batu bose ba mndu giake. ⁵⁴ Iyo ii isaga ya bubili igilile Yesu hebele huhuma Ubayahudi ugia Galilaya.