¹ Bibyo habele gumwe Mfalisayo china liage Nikodemo mmata gwa Bayahudi. ² Gugo mtu gumkilile m'busugu, numsambila, mgigya, tugidi ugana uli mgigya uhuma wa Abeca bululi hoshi mtu gegese gumaita bisaga bino bioli huita gogwe, ii wa guya mine guli hamwechi na Abeca - Pungu. ³ Yesu gumsammbile, bibyo nihusambila, mtu gusahubuswa nyendo chibili, gushinaosha umona buolo bwa Abeca. ⁴ Nikodemu gumsambile, mtu gunabuswa wina guahuota? guna osha ugengila mnsa mwa mnage luendo lwa bubili nubuswa? ⁵ Yesu gumgaile, bibyo bibyo nusambila, mtugusa hubuswa wa madi na mtima, gushinaosha ugingila m'buolo bwa Abeca. ⁶ Ibushilwe wa mbili ii m'bili na ibushilwe wa mtima ii mtima. ⁷ Ushigalilwe yulu nusambila, mulinge ubuswa luendo lwa bubili. ⁸ Mnagu gusuututa waguobenja, usuhulicha lidi liago, ushigidi wagulihuhuma na waguli hugia, bioka biya na mishaminyi giage mtu gegese guhushilwe wa mtima. ⁹ Nikodemu gagaile na ukana, bibyo tunabiosha wii ubikia? ¹⁰ Yesu gumgaile, numsambila, gogue wii mgigia gwa Isilaeli na bino ushihubimana? ¹¹ Bibyo bibyo nihusambila ugana, iya yatugidi tulihudokoma na iya yatumonine tulihuimonya; na byabimonebu mushi hubiwasha. ¹² Nambo, niimsambile biahano hamkala, na mushihuwasha, mwiwasha wii nabe msambila bya hekulu? ¹³ Hashi mtu guselile hekulu guya tu mine gusalile hekulu, mwana gwa Adamu. ¹⁴ Nahibiya Musa gukinuile gya ndoa iya mlunguu, biyoka bibyo mwana gwa Adamu nage guikinunyua. ¹⁵ Na mtu gegese mine gwiwasha gabe na mwego gwa milumbu uhitila gee. ¹⁶ Wabululi bwa bibyo Abeca abendiche ino ibaloo naguhanene ihene yage, yulu gese guim'buasha gashichimine, bululi gabe namweko gwa milumbu. ¹⁷ Yulu Abeca ashimmulile mwana mmibaloo bululi gaionone ibalo, ii ibalo ihone yulu ya gee. ¹⁸ Guim'buasha gee gushiononwa, gushim'buasha guhuhua uononua, bululi gushimliwashe china lya Ihene ya Abeca. ¹⁹ Na unonoo uonona, bululi luenge luchwile mmibalo, na batu babendiche mdo uli luenge, yulu bigilanywa byabo bibele bibii. ²⁰ Wa bibyo mtu gulihugila bubii guswonywa luenge, nage gushibachwa uluenge, yulu biilanya biake bishichwe uombilwa. ²¹ Bibyo mine guli hugila bya kiine gusuchwa ulwengo yulu bigilanywa biage bimoneye hululu yulu biagilwa mnda Abeca. ²² Hanyuma ha bibyo Yesu na bakikiwa bake bagile msii gya Bayahudi; gushindile nabo uba na uchunda. ²³ Yohana nage gubele huchunda ubo Ainoni, hoku na Salimu, yulu ubo ubele madi mengi, na batu bamkilile, bachundilwe. ²⁴ Bululi Yohana gushibele nahambwe. ²⁵ Hanyuma habele paa hawingiha bakikiwa ba Yohana na gumwe myahudi yulu ya uhahachiwa. ²⁶ Bamkilile Yohana, bamsambile, mgigia, guya mine gobele nage m'buala mwa Yolodani,gee nine galimoninye, lola gugo gulihuchunda na batu bose bahumkila. ²⁷ Yohana gugaile, nudogoma, hashinaosha mtu gegese uwasha inywa yoyose nambo gusahewa ya uhuma hegulu. ²⁸ Na benywe mwambonya ubatu ugona, nene nishi Kelesitu nihililwe hambele hage. ²⁹ Mine gwina m'machi gwa buya noo mlume gwa buya, gee kwakimana nauhulicha, guaseelela nalidi lya mlume gwa buya. ³⁰ Bibyo saso lianyi liwilile. Gee gagililile na nene nasale. ³¹ Gee guchwile uhuma hegulu ha byose gee gwa ino ibaloo, biage biose ii bia ibaloo, nake gulihudogoma biamno mibaloo. Gee mine guchwile uhuma hekulu guli hegulu ha byose. ³² Biya bielimonine na ubihulicha noo bieli hummonya, na hashi mine gulihuwasha umonya wage. ³³ Gee mine gugitabiche umonya wage gubiile yaala ya ugana Abeca aliho. ³⁴ Yulu guya guhililwe na Abeca gulihudogoma binywa bya Abeca; yulu gushihuhana mtima wa bushimbi. ³⁵ Tata gulihubenja mwana, nage guamma byose mmaboo mage. ³⁶ Guimbwasha mwana guina mwego gua milumbu; gushim'bwasha mwana gushibi na mwegu,bululi buhuchibwa Abeca buli hegulu.