¹ Mushi nogei mitima gienyu; mulibawashe Abeca, mumbwashe na nene. ² Mndu gya tata muli bushamo buingi; bishisuba biya, nabamsambila, bululi nakya umlongecha bushamo. ³ Nene nabekia na umlangecha bushamo, nichwa iyaka umgaa wanyi; bululi wambi nene na benywe mwabeo. ⁴ Nene wandihugia mugidi ndila. ⁵ Tomaso gumsambile, mulume, tushigidi olihugya; beswe twigimana wi ndila? ⁶ Yesu gumsambile, nene noo ndila, na winene; na mwego, hashi mtu gunagya wa tata nambo gusahitila wandi. ⁷ Nambo mwabamana nene, mwabammana na tata, utula hano mwahumana iyaka mwammona. ⁸ Filipo gumsambile, mlume, utumonyetu tata. ⁹ Yesu gubasambile, nene nibele hamwechi nenyu mano masuku mose, gogue usamana Filipo? Gumonine nene, gumonine tata; bino gogue wagana, utumonye tata? ¹⁰ ushihuwasha ugana nene nili mnda mwa tata na tata guli mnda mwanyi? Bibyo binywa biandihumsambila nene, nishihubidogoma umungo gwanyi, bibyo tata guli hushama mnda mwanyi gulihugila gigio migilo. ¹¹ Mumbwashe ugana nene nilimnda mwatata, na tata mnda mwanyi, nangu! mushihuwasha bibyo, muwashe yulu ya gigyo migilo gyogine. ¹² Bibyo, bibyo, namsambila, gemine gwimbwasha migilo giandihugila nene, gee nage gwigigila; na giata uli gigyo gwigiita, yulu nene nagia wa tata. ¹³ Na benywe m'besaba yoyose wa jina lianyi, niita iyo,bululi tata gaginunue uhitila mwana. ¹⁴ M'besabo inywa yoyose wa china lianyi; niita. ¹⁵ Mwahukunda, mwinyemia alago anyi. ¹⁶ Na nene nisaba tata, nage guimma mpuatilicha gunge, nage gashame nenyu milumbu. ¹⁷ Noo mtima gwa winene, mine ibaloo ishi naosha umgaa, yulu ishihummona na ishimgidi; benywe mwammana, yulu gulihushama wenyu, nage gubi mnda mwenyu. ¹⁸ Nimshiga mashike nichwa wamli. ¹⁹ Mengo macho ibaloo ishimona iyaka, benywe mwimona. Yulu nene nina mwego na benywe mubi na mwego. ²⁰ Liya chuba benywe mwimana ugana nene nili mnda mwa tata, na benywe mnda mwanyi, na nene mnda mwanyi. ²¹ Gee mine gwina alago anyi, na wanyiemia, gugo noo gusukunda, na gusukunda gwiunjwa na tata, na nene nimmnda na ulimonya wage. ²² Yuda (nangu Isikaliyote) gumsambile, mlume bisili we ugana ulihubenja ulimonya wetu, ushi w'ibalo? ²³ Yesu gubagaile, na udogoma, mtu gabekunda gwinyemia inywa yanyi, na tata gwimunda na beswe tuicha waga na uita bushamo wage. ²⁴ Nambo mtu gushikunda gee gushihunyemia inywa yanyi, na inywa ya muli huhulicha ishi yanyi, iyage tata kutumine. ²⁵ Bibyo noo biandi msambile mengo mambele mshame wenyu. ²⁶ Wa bibyo gugo m'bwatilicha, gugo mtims gwa kuhaha, nine tata guimila wa jina lianyi, guingigia byose, gwimmengelecha byose byandimsambile. ²⁷ Talala, namsambila, talala gianyi namma giandihuuma nene gishi nahi g'ibaloo yagili huchanana. Mushinogeye mitima gienyu, na nangu uba na boba. ²⁸ Mahuliche biandimsambile, nihugia lwanyu nigiwila iyaka wa mli. Nambo mwabakunda, mwabaseelela yulu nihugia wa tata, yulu tata u mmata uli nene. ²⁹ NIlihumsambila bishinahia, bululi habiewilila mwawashe. ³⁰ Nene nishidogoma nenyu binywa bingi iyaka, yulu gulihuchwa mmata gwa ino ibalo, na gushi na uoma wandi. ³¹ Bululi ibaloo imane ugana nihumunda tata, nahi biya tata gusambile wita noo biandihuita, m'bechwa, tuligile lwetu.