¹ Masuku mtuba hambele ha Pasaka, Yesu gukile Betania ubele Lazalo, guya gwelichulile uhuma u babu. ² Bibyo bammiile biliwa uya, Malata kugilile, Lazalo gubele gumwe gwa baya bene babele bashame huya iliwa hamwechi na Yesu. ³ Maliamu gukuhile ihindi ya malashi ma bumona buingi, gumshiminye Yesu umagulu na umaula na njuli chake, ndu giose gigilule na bushio bwa malashi. ⁴ Haho Yuda ishikali yote, gumwe gwa bakikiwa bake, noo guya mine gwimmana, nukana, ⁵ Atimano malashi malihuguchiwa wa dinali sambichitatu, bahewe bambuchu? ⁶ Nage kukanine bibyo, ushi wa ubamonena kene bambuchu, yulu gee ii miibi, nage noo gubele na ahuaba a bumona, kubikuhile byene bibele mmahuaba uba byake. ⁷ Bibyo Yesu kukanine, mlewe kam'biye ii yulu ya lusugu lwanyi lwa uchiwa. ⁸ Yulu bambuchu muli nabo masugu mose hamwechi nenyu, nene mushinanyi masuku mose. ⁹ Haho bayahudi bengi bamanine ugana gee guli uya, nabo bachuile ishi yulu ya Yesu ka, na yulu bammone Lazalo, guya mine guchulilwe na Yesu uhuma u babu. ¹⁰ Nabo bibuli biata bahungile mmungo gwa umaka Lazalo nage. ¹¹ Bululi yulu yage bayahudi bengi balibakuli na bam'bushiche Yesu. ¹² Lusuku lwa mabili lwake batu bengi babele bakile sumbilo bahuliche ugana Yesu gwachwa Yelusalemu. ¹³ Bakuhile matabi ma miti batoboile hambuga ukya umgaa wisula ya mbaga, batele bigelegle, "Hosana!" gee noo gwa mmelelechiwa mine gwichua wa china lya mlume, Ololya Isilaeli. ¹⁴ Nage yesu kubele gwahupata mwana gwa punda na umchina, nahi biya biabikolilwe, ¹⁵ Nangu uwaboba, msiha gwa Sayuni, lola, olo liobe liachuwa, lichine mwana gwa punda. ¹⁶ Bibyo bihisho bakikiwa bake bashibimanine uya ubutulilo, hanyuma ha Yesu uginunywa, haho noo habaengeleche ugana bigolilwe yulu yage, bammitile biya. ¹⁷ Baya bashuhudiye liya sumbilo libele hamwechi nage hegishile Lazalo uhuma msinda, na umchula. ¹⁸ Yulu ya bibyo ihichi ya batu bagile umgaa; bululi bahuliche gwitile iyo isaga. ¹⁹ Bibyo bafalisayo badogomienye boo wa boo, lolwe mushiosha iyaka uita itu yoyose, ibaloo yose yakia weli. ²⁰ Habele na bamwe Bayunani mmanga gwa batu bene bakile utambikila uliya sumbilo. ²¹ Babo bamkilile Filipo, mtu gwa Betesaida gya Galilaya, bamsambile, mulume, beswe tulihubenja ummona Yesu. ²² Filipo gugile, gumsambila Andele, hanyuma Andele na Filipo bamsambile Yesu mwano. ²³ Yesu nage gubagaile, gudogomine, mengo mahukia kaginunywe mwana gw'Adamu. ²⁴ Bibyo, bibyo, namsambila, tete lya ngano lisahugua m'bitete, libi bioka biya tete lio buchima, nambo liahuuwa, liehunya matete mengi. ²⁶ Mtu gabengilila, na gaandame, wine wandibi, noo ubi na mgichi gwanyi. Iyaka mtu gabengilila tata gwi mnyemia. ²⁷ Mtima gwanyi gwawa, na nene nadogome wii? Tatu uponye mano mengo? Na yulu ya bibyo mano mengo maapiela. ²⁸ Tata uliginune china liobe, haho hachuile lidi uhuma hekulu, naliginuna, na nene niliginuna iyaka. ²⁹ Sumbilo libele likimanyu bahuliche, bakanine hali miukulo; bange baganine, malaika gwadogoma nage. ³⁰ Yesu gugaile, gudogomine, lidi lilio lishibele yulu yanyi, libele yulu yenyu. ³¹ Bino uonona wa ino ibaloo uliho, na mata gw'ibalo guitlua hambuga. ³² Nene nabegi nunywa hegulu ha sii ibabula bose wanyi. ³³ Guganin bibyo gulihumonya ii lubu nai lueliwa. ³⁴ Sumbilo limgaile, beswe tuhuliche uu m'bindo ugana Kelesitu guishama milumbu, na gogue ulihuganawi, bilingie mwana gw'Adamu ukinunua hekulu? Gugo mwana gw'Adamu noo nanyi? ³⁵ yesu gubasammbile, luenge luili hamwechi nenyu mengo macho. Giiwe mengo ma mwili na lulo luenge, yulu mdo gushimambe meso. Gulihugita mdo gushibamana welihukia. ³⁶ Muili na luenge, muluwashe lulo luenge, yulu mube bana ba luenge. Yesu gudogome bibyo gugile na ulibisa bashimmone. ³⁷ Inangua yesu gwishile bisaga bingi biose bibyo bashim'bushiche. ³⁸ Bululi igilie inywa mbwa Isaya yeganine; mlume ii nanyi guwashiche miano gyetu; nanyi gwabululilwa uboo wa mlume? ³⁹ Noo yulu, bashioshiche uwasha, bululi Isaya gudogomine iyaka. ⁴⁰ guamabia meso mabo buhobu guagigumia mitima giabo; bashichwe umona wa meso mabo, bamane wa mitima giabo, balubulwe nabahonye. ⁴¹ Isaya gudogomine bibyo binywa yulu gumonine ugengeda wa Yesu na ulisamba mwano gwake. ⁴² Ata bamwe bata ba ihuilo bawashiche, yulu ya usina bafalisayo bashibalisambe wa hululu bululi bashibabagule usinagogi lyabo. ⁴³ Bululi babendiche ugengeda wa batu uli ugengeda w'Abeca. ⁴⁴ Yesu gutele mbila kuganine, gee mine gwimbwasha nene gusambuasha nene gwawashamine gutumine. ⁴⁵ Guindola nene gwalola mine gutumine. ⁴⁶ Nene nichuile yulu nobe luenge lwa ibaloo, bululi gegese mine guimbuasha nene gushisame mdo. ⁴⁷ Na mtu gabebihulicha binywa bianyi, nangubigila, nene nishihumonona, yulu nishichuile uonona ibaloo, nichuile uihonya ibalo. ⁴⁸ Guya miine guipanya nene, gushigitabicha binywa bianyi, guina mine guimmonona inywa iyo yandigomine noo yimonona lusugu lwa isula. ⁴⁹ Bululi nene nishihulisamba biuhuma mnda mtima gwanyi ka; ila tata mine kutumine, gee gundagile biandilisamba na biandidogoma. ⁵⁰ Nene nigidi bielilagile ii mwego gwa milumbu, bibyo biandihudogoma nene, biya bisambile tata, noo biandihulisamba.