¹ Bibyo habele gumwe mtu china lyake Lazalo, gubele msumwa uya Betania, mbuga kya Maliamu na mmulwake Malada. ² Noo Maliamu guya mine gumshininye mulume malashi, na umaula umagulu na njuli chake, na myumiake Lazalo gushibele huosha. ³ Baya bakachage bahille mtu a Yesu na ugana, mlume, guya mine gosuunda gulihusumwa. ⁴ Yesu helihuliche, gukanine, usumwa uno ushi wa lubu, ii yulu ya umonya ugengeda w"Abeca, bululi mwana gw'Abeca katonua wa ubo usumwa. ⁵ Yesu nage gum'bendiche malada kachage Lazalo. ⁶ Helihuliche ugana Lazalo lo gulihusumwa, Yesu gushamine masuga mabili uya wine webele. ⁷ Hanyuma ha haho Yesu gubasambile bagigiwa bage, tugye iyaka ubayahudi. ⁸ Baya bagigiwa bamsambile, mgigya, m'bunge bayahudi babele huenga uuta mawe noo gogue ulihubenja ugia oo iyaka? ⁹ Yesu kugaile, mengo machuba mashi bihindi umina bibili? Mtu gabekiata mchuba gushibahiatala, yulu guihumona lwenge lwa ino ibalo. ¹⁰ Gabegiata mpusugu gusuhiatala, bululi hashi luenge. ¹¹ Guhamine bibyo, hanyuma kubasambile, genda lyetu, Lazalo gualala, wa bibyo nigya yulu na m'biule. ¹² Na baya bakikiwa bamsambile, mulume, nambo gualala, guibiua. ¹³ Yesu kubele hudogoma yulu ya lubu lwage, nabo babele hulanga gulihulisamba mwano ulala tulo. ¹⁴ Yesu noo usili ubasambila hululu, Lazalo, gwawa. ¹⁵ Nina saso yulu yenyu, bululi nisaba uya, yulu muwasha; mano mengo tubekya wali. ¹⁶ Tomaso, kugulilwe hasa, kubasambile bagigi nage, tugie na beswe, tuwe humwechi nage. ¹⁷ Yesu helihuile gumbangile Lazalo msinda gusilimo masugu mana. ¹⁸ Betnia gibele hoka na Yelusalemu nahi magulu uki chitatu. ¹⁹ Na bayahudi benge bachuile uliba Malata na Maliamu ugia ubahungya yulu ya nyumiabo. ²⁰ Malata helihuliche ugana Yesu gulihuchwa, gukile umgaa; Maliamu gubele mshame mndu. ²¹ Malata gumsambile Yesu, Mlume, ugana wisuba hano nyuminyi kusaba wa. ²² Ata bino nigidi yoyose yine yolisaba wa Abeca, Abeca iuha. ²³ Yesu gumsambile nyumiobe gwichwa. ²⁴ Malata gumgaile, nigidi gwichwa ha uchwa wa lusugu lwa isula. ²⁵ Yesu kumsambile, nene noo uchwa na mwego. Guya kwimbwasha nene, inangwa gwiwa, gubigui poo. ²⁶ Ge gese gubi mnda mwanyi na wimbwasha gushiwa milumbu. Wi wawasha bibyo? ²⁷ Gumsambile, Ehe, mlume, nene nawasha ugana gokwe noo, Kelesitu, mwana gw'Abeca, guya gwicha mno m'ibalo. ²⁸ Malata helihuile udogoma bibyo gugile luage, gumkilile Maliamu mnunage wa bubisa na umsambila, mgigya, gulihugita. ²⁹ Maliamu helihuliche guchuile abilo na ukya uli Yesu. ³⁰ Na Yesu gushibele nagingila mmbuga, gulibele uya wine wanasambene na Malata. ³¹ Baya bayahudi bene bobele na Maliamu mndu humungia, habamonine bioli kimrnr abilo na utoboa, bamlamine; balangile ugana guli hugia usinda ugiulila. ³² Maliamu helihuile haya habele Yesu na uummona, gumguilile u magulu, na umganina, mlume, nambo wisuba hano, nyumianyi gusabawa. ³³ Yesu helimmonine guli hulila, na baya bayahudi bose nene bamlamine nabo bobele hulila, mtima gumsumine, na unogea mtima. ³⁴ gubudiche, mwambya uhi? Bamsambile, mulume chuno ulola. ³⁵ Yeu gulilile biosochi. ³⁶ Bayahudi baganine, lolwe biebele hum'benja. ³⁷ Bange babo baganine, gugu bubululile guya ihobu meso, gusaosha uita guku nangu uwa. ³⁸ Bibyo Yesu gulilile mnda mtima gwake, guhuile usinda, nali libele mgumbo na liwe libiwe hekulu hake. ³⁹ Yesu gubasambile, hunyiwe liwe. Malata kachake na Lazalo, gumsambile, mlume, bino gusili hunyuka, yulu isili itumba ya masugu mana. ⁴⁰ Yesu gumsambile, nene nisusambila ugana wahuwasha wimona ugengeda w'Abeca? ⁴¹ Boo nulihunya liya liwe, Yesu gu binuile meso make hekulu, guganine, tata busuachi, yulu wapulicha. ⁴² Na nene nikidi gogue usupulicha masugu mose; yuya lino sumbilo bano bene basumbila nagana bino, bululi bawashe ugana gokwe noo utumine. ⁴³ Nake hehuile udogoma bibyo, gulilile wa lidi liata, Lazalo, chuno, hambuga. ⁴⁴ Kutoboile hambuga guya minuu, mmambwe sanda umaboo na umagulu na ahuba umeso. Yesu gubasambile, msulwe, mlewe gakye lwake. ⁴⁵ Bayahudi benge bachuile wa Maliamu, na umona bieli hishiche, bambushiche. ⁴⁶ Bange bagile ubafalisayo na ubasambila bieli itile Yesu. ⁴⁷ Bibyo bibuli biata na Bafalisayo, basumbiche balacha, baganine, tuita ii? yulu guno mtu gwaita bisaga bingi. ⁴⁸ Tumbelea bino batu bose na mmoga guetu gose. ⁴⁹ Gumwe mtu mmanga gwaba, Kayafa, kubele ibuli yata guya Musa, kubasambile benywe mushigidi imwe abisa. ⁵⁰ Na benywe mushihulanga ugana biliengie mtu gumwechi gowe yulu ya batu, na mmoga gose gushibena mludongo. ⁵¹ Na iyo inywa gushidogomine wa malanga make, yulu kubele ibuli yata guya muoa, gubuile ugana Yesu gwiwa yulu ya gugo mmoga. ⁵² Na ishi yulu ya gugo mmoga ka; na hamwechi na bibyo ubaongola bana b'Abeca basambalile bululi babe bamwechi. ⁵³ Utula lilya chuba bahungile mmungo guumaka. ⁵⁴ Wa bibyo, Yesu gushienine iyaka wa hululu u bayahudi, na guhumine ubo, gukile ihana alibu na ulwanaganywa, mmbuga gilihukiswa Efulaimu. Kushamine ubo hamwechi na bagigiwa bage. ⁵⁵ Na Pasaka gya bayahudi gisibele hokana benge baselile uhuma umabala ukya Yelusalemu hambele ha Pasaka bululi balihahache. ⁵⁶ Babele hummenga Yesu, babele hulidogomia ii bakimanyu m'ihuila, mulihumona wii? Gushichwa m'lino sumbilo lya Pasaka? ⁵⁷ Na bibuli biata na bafalisayo babele bahusambila ubatu, mtu gwimana weli, gabahe mwano bululi bam'bwate.