¹ Yesu gubasambile, bibyo bibyo, nihumsambile guya gushihugingila u mchango gwa liha lya mioo, gubegingilile wibumba mtu gugo ii miibi nage ii msapi. ² Gulihugingila umchango noo mmushi gwa mioo. ³ Mgimanyi gwa hamchanga gusum'bugulila na mioo gisuhulicha lidi lyake, nage gusuugigita u machina magio, na ugitabola hambuga. ⁴ Nage heligitobola hambuga mioo giake gyose, gusugilambwela, nagio mioo numlama, yulu gigidi lidi lyage. ⁵ Mgenyi gishimlamna ata, giemsina, yulu gishidi madi ma bagenyi. ⁶ Mlingilisho gugo Yesu gubasambile, boo bashimanine biebele hubaganina. ⁷ Yesu gubasambile iyaka, bibyo bibyo, nihusambila, nene noo mchango gwa mioo. ⁸ Bose babangilwe hambele hanyi ii beebi no basapi, na mioo kishibahuliche. ⁹ Nene noo mchango, gegese guigingila uhitila nene, guihona, guingila nautoboa, nage guihewa iliwa. ¹⁰ Miibi gusuchila ugiba, uhaga na udogia, nene nichuile bululi bobe na mwego na bobe nago bee. ¹¹ Nene noo mmushi m'benju mmushi m'benju gusuhana mwego gwake yulu ya mioo. ¹² Mtu guhewa bumona, gugu gushimmushi, bululi mioo bishi bitundu byage, gabemona mluunga gulihuchua, guishiga mioo na usina, na mluunga guigiwata na ugihalinganya. ¹³ Gee gususina yulu imtu guhewa bumona, na mioo wagi ashi atu. ¹⁴ Nene noo mmushi mibenju na banyi nibagidi, na banyi bangidi nene. ¹⁵ Nahi bya tata bielingidi, na nene biandimgidi tata. Nene nihuhana mwego gwanyi yulu ya mioo gyanyi. ¹⁶ Na ginge mioo ninagio, gishi gya lili liha, na gigyo nagyo gilingie nagiuse, na gichulicha lidi lianyi, hanyuma gibi ihichi imwechi na mmushi gumwechi. ¹⁷ Iyo noo yulu tata gulihukunda, nihuhana mwego gwanya bululi naguguhe iyaka. ¹⁸ Ushimtu gulihuguguha nihuhanagoo nene mine, nina uoma wa uguhana, na nina uoma wa ugukuha iyaka, ulagana ubo niuhelwe na tata. ¹⁹ Hachuile gunge msambuana u bafalisayo, yulu ya bibyo binywa. ²⁰ Bengi babo bakanine, guina miha guku, guina mishi, yulu yai mulihummlicha? ²¹ Bange bakanine, bino binywa bishi bya mtu gwa miha, miha ginaosha ubulula meso ma bihobu? ²² Uya Yelusalemu ubele sumbila lya useelela; mengo na peha. ²³ Yesu gubehe hukiata m'ihuilo, mnda mgumbo gwa Sulemani. ²⁴ Bibyo bayahudi bamchunguluile, bamsambile, ata mengo nai wigililila uangaishe mitima gietu? Nambo, gogue noo Kelesitu tusambile hululu. ²⁵ Yesu gukaile, nihumsambila, na benywe mushihuwasha, mugile giandihugila wa china lya tata noo gilihushuhudia. ²⁶ Benywe mushihuwasha, bululi mshi mmanga gwa mioo gyanyi. ²⁷ Mioo gyanyi gihuhulicha lili lyanyi, nene nikigidi, nagyo gihundama. ²⁸ Na nene nabaha mwego gwa milumbu, naboo bashichimina ata, na hashi mtu guikisapula mmaboo manyi. ²⁹ Tata kupele boo ii mmata uli bose, na hashi mtu gunaosha ubasapula mmaboo nma tata. ³⁰ Nene na tata tuli umwechi. ³¹ Bayahudi batolile mawe bululi bamte. ³² Yesu gugule, mikilo kingi kya kibenju ni mmoninye, gilihuhuma wa tata, yulu ya mkila nai, ukiose, guamuli hutela mawe? ³³ Bayahudi bamkaile, yulu ya mkilo gubenju tushihuta mawe, yulu ya usebulula, bululi gogue uli mtu waliitagogue mine uba Abeca. ³⁴ Yesu kugaile, bishibige lwe m'mibindo gyenyu ugana, nene nikanine, benywe muni tubeca. ³⁵ Nambo gumkitile tubeca baya bahiilwe na inywa ya Abeca, (na migolo gishinabelua). ³⁶ Wii! Guya mine guhahachiwa na tata, gummilile m'ibalo, benywe mulihumsambila, wasebulula, yulu nikanine, nene ni mwana Abeca. ³⁷ Nambo nishihugila migilo gwa tata, mushimbuashe. ³⁸ Nambo nahugigila, inangwa mushihumbwasha nene, muwashe giya migilo, yulu mumane na ulubulua ugana tata guli nda mwanyi na nene nili mnda mwa tata. ³⁹ Babendiche iyaka umpuata, haho gulihuminyie mmaboo mmabo. ⁴⁰ Gugile lwake iyaka m'buala mwaYolodani, uya wine ubele Yohana huchunda hambele kushamine uya. ⁴¹ Batu bengi bagile weli, bakanine, winene Yohana gushilile isaga yoyose, byose bidokomine Yohana bya mwano gwa guno bibele bya wiinene. ⁴² Na bengi bambwashiche uyo.