¹ Nambo anywa anyi abagilula maadi, na meeso manyi uba msula gwa byosochi, yulu naoshe ulila chuba na busugu yulu yabo bene bahagilwe ba misiha gya batu banyi! ² Nambo nisuba naihana ya ushamina mlwanaganywa, itulatula ya bahishi; bululi nabaleye batu banyi ugya wabo! Bululi boo ii bamasei, bose abisa, sumbilo lya batu bene bali na bushimbi. ³ Balihuhinga ndimi chabo, nahi ugana ii buta, yulu ya udogoma lulimi; nabo bali na uomamnda sii, ata bibyo ushi wa uwilila; bululi ii ugililila uhuma u buubi ndaa na u buubi, na bashingidi nene, MLUME gwagana. ⁴ Liuswe,uli mtu na m'binji nage, na mushimmudagile m'buswa gegese; bululi m'buswa gegese gwibaga mshiwabo, na m'binji gegese gwigya ubona ubo na um'baga. ⁵ Nabo bibichana mtu na m'binji nage, nabo bashidogoma bya chigilwe; nabo baolobeche ndimi chabo udogoma lulimi; balihuligonja yulu ya ugila bisone. ⁶ Bushamo bobe bwa hawingi ha ubichana; wa yulu ya lulimi bahanya uumana nene, MLUME gwagana. ⁷ Bino, wa bibyo, MLUME gwa bilime pambwa gwagana bino, Loola, ninasumbulula na ubatonda; bululi nisahigila bibyo, nagile iyaka ii u misiha gya batu banyi? ⁸ Ndimi chabo ii migwi gya bulembe gyuhaga; basudogoma binywa bya lulimi; mtu gumwechi gusudogoma binywa bya talala na miinage mnda anywa age,haho mnda mtima gwage guli hum'bisamina. ⁹ Wi wii! Nashibaambile yulu ya bibyo bigilanywa? MLUME gwagana; na ichulu-chuli yanyi ya mwego wii! Nashiligiwidiche buubi wa buubi hegulu ha mmoga gwa bino? ¹⁰ Hegulu ha loono niilila na ugabuwa, Na ubulishicho bwa mgala nibiya malilo; Wa bululi byachiga byose, na hashi gwa uhita, Na hashi gunaosha uhulicha liidi lya ng'ombe; Tunonyi twa ha hululu, na nyama cha m'bisowa, Chasina, chagya lwabo. ¹¹ Nene niita Yelusalemu uba bibunduguchu, Bushamo bwa mibwabwa; Nene niita mabuga ma Yuda uba mauwa, Mashishaminywe na mtu gegese. ¹² Mnayi guli na lwengu, gaoshe umana na bino? Iyaka ii nanyi guya mine anywa a MLUME adogomone nage, gaoshe ulisamba? nayo iyii bululi bwagyo sii ugugichiwa, na uchigiwa nahi mgala mtu gashihite? ¹³ Nage MLUME guganine, Ii wa ibalo ya baleya m'bindo gwanyi gwandibiile umbele wabo, na bashinyeminye liidi lyanyi, na bashibagyate mnda bibyo; ¹⁴ bino bagyatile mnda uguma wa mitima gyabo boo bene, na ulamana na miishi gya Mabaali, nahi byabagigichiwe na bamasabo. ¹⁵ Bino, MLUME gwa basolokoto, Abetcha a Isilaeli, gwagana bino, Loola, nibalisha bya bululu, ehe, bano batu, nene nibaha maadi ma bululu bamanywe. ¹⁶ Nene nibasala hawingi ha mioga, baya bene bashibamanine; ata bamasabo, nene nihila ahilu u nyuma wabo, ndaa na byine byandibadiga abisa. ¹⁷ MLUME gwa basolokoto gwagana bino, Engelechiwe benywe, mwabagite baachana bene bali na malilo, yulu bachwe, mutume na ubagita baachana beeno, yulu bachwe; ¹⁸ na baite abilo babe na malilo yulu yetu, bululi meeso metu masuwe byosochi, na bilili byetubigeseye maadi. ¹⁹ Hulichiwe bululli liidi lya malilo lyahulichiwa uhuma Sayuni, Nahi byatuwashilwe kole! byatunogemitima abisa! Bululi twagishiga mbuga, wa yulu bagwisha bushamo bwetu. ²⁰ Bibyo hulichiwe inywa ya MLUME, benywe baachana, Na matu menyu mahuliche inywa ya anywa age; Mwabagigye misiha gyenyu uba na malilo, Na mtu gegese na m'binji nage, ulila. ²¹ Wa bululi bitumba byachinana u madilisha metu, byagingila mmadu metu; maoshe ubachinga koo baana bene bali hambuga, na bawalubaga ha masango nandila. ²² Yelemia dogoma, MLUME gwagana bino, Bitumba bya batu byigwa nahi unaga hegulu ha mabala, Na nahi mkanda gwa ngano hanyuma ha guya gweesa, na hashi ata mtu gwiongola. ²³ MLUME gwagana bino, Gwa lwengu gashilitone yulu ya lwengu lwage, ata mine gwina uoma gashitone yulu ya uoma wage, ata mona gashilitone yulu ya bumona bwage. ²⁴ bino mine gulihulitona na galitone wa ino ibalo, wa yulu gungidi nene, na uumana, ugana nene nili MLUME, nisugila bya yano, na uonona wa kiine,mnda sii; bululi nene nisubenjia bibyo bihisho, MLUME gwagana. ²⁵ Loola, masugu mali huchwa, MLUME gwagana, nibaonona bose bene bagile kumbi mnda mishaminyi gyabo gya nangu uba bagibe kumbi. ²⁶ Misili, na Yuda, na Edomu, na baana ba Bamoni, na Moabu, na bose bene balihubega bogi, bashushama mgala; bululi mioga gigyo gyose gishi na ugya kumbi, na ata ndu gyose gya Isilaeli gishigile kumbi gya mitima gyabo.