¹ Gyenywe ndu gya Isilaeli, hulichiwe inywa yine ili humsambila MLUME; ² MLUME gwagana bino, Mushiligigye ndila gya mioga ginge, na mishigagilwe yulu ya bisaga bya hegulu; bululi mioga gisugagilwe yulu ya bisaga bibyo. ³ bululi mishaminyi gya babo batu ii gisonyu, bululi mtu gumwechi gusugeda mti mmisowa, mgilo gwa maboo na bwino bwa luhemba. ⁴ Ubitogola wa lufeza na nolo; uwenya wa pande na nondo, gushidigile, ⁵ Mlingilisho gwabyo ii mlingilisho gwa lio, mgilo mshinyi, bishihudogoma; bilingye uswalwa bululi bishibaosha ugyata.Ushibimone booba; bululi bishinaosha ugila bisone, na bisha na uosha wa ugila bisoga, ⁶ Hashi ata gumwechi guli nahi gogwe, Ee MLUME; gogwe noo uli mmata, na china lyobe ii lyata mnda uosha. ⁷ Mnanyi gushi huunyemya gogwe, Ee oolo lya mioga? bululi chino noo punda chobe gogwe; bululi mmanga gwa bene bali na lwengu boose bab mioga, na mnda mishaminyi gyabo gya buoolo gyose, hashi ata gumwechi guli nahi gogwe. ⁸ Babo batu bose bali nahi nyama, ii bahugi. Guno mlisambo ii gwa miishi, ii shina lya mti kaa. ⁹ Hali lufeza lwine lusulilwe uba lubatitiwe, luleshilwe uhuma Tilshishi, na nolo uhuma Ufazi. mgilo gwa miino gwa mtumbi gwa nolo; bichwalaganywa byabo ii langi lya samawi na ibule; bibyo byose ii migilo bya beeno babo. ¹⁰ Mndi MLUME noo Abetcha a winene; Gogwe noo Abetcha ali na mwego, oolo lya milumbu; Umbele wa uchigililwa wage sii gyose gyadanda, Ata mioga gishonaosha ugimena sungu chage. ¹¹ Mwibasambila bino, Tubetcha tuto gushinaita gulu na sii, tuto twidigwa mnda sii, nato twihuma hashi ha gulu. ¹² Gubumbile ibaloo wa uosha wage, Gugumiye ibaloo wa lwengu lwage, Na wa umana wage gugandile gulu. ¹³ Hesudogoma wa liidi lyage, hali miukulo gya maadi hegulu, Nage gususecha matimba uhuma u masunga mose ma sii; Mbula gusugiitila tuhenyu-henyu, Gusuhumya mnaga mnda lindo lyage. ¹⁴ Mtu gegese gusili nahi nyama, gushi na malango; Mtumbi gegese gwa nolo gwashigwa yoga na miishi gyage gya ubachwa; Bululi miishi gyage gya usumbululwa ii lulimi, Mnda mwagyo mushi luhuda. ¹⁵ Ii usona ka, ii mgilo gwa ubichana; Mengo ma uchwilwa wabo bichimina ¹⁶ Gee noo mtala gwa Yakobo, gushi nahi baba; Bululi gee noo gubumbile bitu byose; Na Isilaeli noo mlongo gwa buhyana bwage; MLUME gwa bilume pambwa noo china lyage. ¹⁷ Mndi! Sumbicha bibya byobe mnda sii, gogwe mine ulimshame mnda iutu. ¹⁸ Bululi MLUME gwagana bino, Loola, mano mengo nibaha bashami ba gino sii nahi wa mjeledi, nibasusula bamone asusu. ¹⁹ Luhanga lubi wandi, wa yulu ya malase manyi! Bihulo byanyi byamongola; ata bibyo niganine, Chigilwe ii unyogwa wanyi nene, na nene nilingye ulitolelecha. ²⁰ Itula yanyi yawaswa kole, migochi gyanyi gyose gyautuwa; baana banyi bose bashiga na ugya lwabo, bashiho iyaka. Hashi mtu mine gwingimyila itula yanyi iyaka, na upanyiila ma pashiya manyi. ²¹ Wa bululi maushi basilinahi nyama , ata bibyo bashibuchiche wa MLUME; bino, bashibele na bitundu, na bihichi byabo bya miyoo byamwagiya. ²² Liidi lyahulichiwa, Loola, yachwa ihulo uhuma luubi lwa uboo wa uachi, yulu ya umaita mabuga ma Yuda uba mauwa na bushamo bwa mibwabwa. ²³ Ee MLUME, nigidi ugana ndila gya mtu gishimo mnda ichuli-chuli yage ya mwego; utamba matamba mage mashi mnda uosha wa mtu. ²⁴ Ee MLUME, undubulule wa kiine gyobe; ushi wa sungu chobe, ushichwe uupaga. ²⁵ Sungu chobe uchiloshe u mioga gyine gishigiumane, na milongo gyabo gyine gishi huuginamina china lyobe; wa bululi bamya Yakobo, ehe, bamya abisa na umdiga, na ubuita bushamo bwage uba mauwa.