¹ Ino inywa noo imchwilile Yelemia, uhuma wa MLUME, ugana, ² Bihulichiwe binywa bya mano malagano; wadogome na batu ba Yuda, na bashami ba Yelusalemu; ³ wabasambile, MLUME, Abetcha a Isilaeli, gwagana bino, Na galogwe mtu gushi huhulicha binywa bya mano malagano, ⁴ mandisambile bamasenyu, maya masugu mandibahuminye mnda sii gya Misili, mnda asusu a igela, niganine, nyemiwe liidi lyanyi, mwagile ulamana na byose byine byandimsambila benywe; haho noo hm'bi batu banyi, na nene nibi abetcha enyu.; ⁵ haho naoshe uwilicha ulaha wandilahile na bamasenyu, ubaha sii gyagigiluchu mabele na bui, nahibyagi bino lino. Haho nigaile, niganine, Bibe bibyo, Ee MLUME. ⁶ Nage MLUME gusambile, Lisambe bino binywa byose mnda mabuga ma Yuda na umasango na ndila ma Yelusalemu, wagane, Hulichiwe binywa bya malagano mano, mwamagile. ⁷ Wa bululi nibabangisiye bamasenyu, luya lusugulwandibahuminye mnda sii gya Misili, ndaa na lino, nabebyuwa umayaya na ubabangisiya, nihugana, Linyemiwe liidi lyanyi. ⁸ Ata bibyo bashinyeminye, ata utege matu mabo, bagile kila gumwechi ulamana na ugumagala wa mtima gwage gubi; wa bibyo nachwisha hegulu habo binywa byose bya malagano mano, byandibasambile babigile; ata bibyo bashibabigile. ⁹ Nage MLUME gusambile, Byumano byamoneya hawungi ha batu ba Yuda, na hawingi ha bashami ba Yelusalemu. ¹⁰ Bagiwilila buubi bwa bamasabo, bene bahanyinye uhulicha binywa byanyi; balamine tubetcha tunge na utugilila; ndu gya Isilaeli na ndu gya Yuda, babela malagano manyi mandilagene na bamasabo. ¹¹ Bino, MLUME gwagana bino, Loola, nilwisha buubi hegulu habo,bwine bwabashiosha ubusina; nabo bindilila, nene nishibahulicha. ¹² Haho mabuga ma Yuda na bashami ba Yelusalemu, bigya na ulilila tubetcha twabali huhulila aswenge; haho bashibahogonona ata hacho mengo ma asusu abo. ¹³ Bululi lubalo lwa tubetcha tobe, Ee Yuda, iyilinga na lubalo lwa mabuga mobe; na nahi bili mabuga ma Yelusalemu, noo byamugimiile butambikilo bwa itu iya ya abule, butambikilo bwa utambikila Baali aswenge. ¹⁴ Yelemia, bino, ushibasabile bano batu, na ushigabuwe wa liidi lyobe, na ubasabilalusabo wa Abetcha bano batu; bululi nishibahuliche mengo ma bindilila wa yulu ya asusus abo. ¹⁵ Mmunjwa gwanyi gulihugila ii mndu gyanyi, nambo gulihugila masei? Wi wii! Ulibindila obe wa nyama cha chihaha chiuhuminya abachi obe? Hosugila buubi, noo husumona saaso. ¹⁶ MLUME giigitile china lyobe, Mzeituni gwine guli na byaanyi bya bibisi, mabenju, gwine guli na biguma bisoga; wa mdodo gwa kindo chata gwalamya aahya hegulu hago, na matabi mage manogeya. ¹⁷ Bululi MLUME gwa bilume pambwa mine guunine, gwadogoma biibe yulu yobe, wa bululi bwa buubi bwa ndu gya Isilaeli, na ndu gya Yuda, byabagilile hegulu ha bichuli-chili byabo bya mwego wa unjigilicha, balihuumulila Baali aswenge. ¹⁸ Iyaka MLUME guumaninye bino, na nene nibimanine; haho noo holimaninye bigilanywa byabo. ¹⁹ Haho nene nibele nahi mwaana gwa mmoo mmochu, gwaguhwa ugya ushinjiwa; na haho nishimanine ugana bahunga mihungo yulu yanyi, balihugana, Na tudogye mti hamwechi na biguma byage, na tummile koo na gahume mnda sii gya bene bali na mwego, ²⁰ Haho, Ee MLUME gwa basolokoto, usuonona wa kiine, na usuutonda munda na mitima, ukosheche umona ugiwidicha buubi wa buubi obe yulu yabo; wa bululi niununile gogwe inywa yanyi. ²¹ Bino, wa bibyo, MLUME gwagana bino, yulu ya batu ba Anathothi, balihubenja mwego gobe, balihudogoma, Ushibuwa bubuwa wa china lya MLUME, ushichwe uwa mnda uboo wetu. ²² Wa iyo ibalo MLUME gwa basolokoto gwagana bino, Loola, nibasusula bano batu; bawalubaga biiwa wa ahilu; baana babo na bawamisiha babo biiwa wa ndala; ²³ na hashibi na mtu gegese mine gwishigala wabalo; bululi nilusha usona hegulu ha batu ba anathothi, mwaa gwine gwichwa wabali.