¹ Gogwe uli gwa kiine, Ee MLUME, nabegumana nobe, mndi bobyo nidogoma nobe wa mwano gwa kiine. Bululi bwai ndila gya babii gili gigimanyu? Bululi bwai ba ngila biibe bali poo? ² Wabauna, ehe, babiya michinga, baula, ehe, baha biguma; mnda tunywa twabo uli hoka, na mnda mitima gyabo uli koo. ³ Bibyo gogwe, MLUME, ungidi; uumonine, ugutondile mtima gwanyi, byaguli huulanga; ubabule nahi miyoo gilihugya ushinjiwa, ubabiya alibu wa lusugu lwa ushinjiwa. ⁴ Ata mengo nai sii gibi na malilo, na uguma byaanyi bya sii gyose? Wa bululi bya usona wabo bene bali bashame mnda mwayo, nyama na tunonyi twachimiwa tose; wa ibalo baganine bimona isula yetu. ⁵ Uba wahinga abilo hamwechi na babo bene balihugyata na magulu, nabo bahuuima, bino banaosha wii uhimana na falasi? Na inangwa wahuba mnda sii gya talala, uli poo, bibyo wiita wiihaho yulu ya ulimona wa Yolodani? ⁶ Bululi ata bashiwenyu, na ndu gya sobe, buugulila bihisho bya buhulihuli; ehe, baita mdodo unyuma obe; ushibawatiliche, inangwa babeusambila binywa bya bisoga, ⁷ Nagishiga ndu gyanyi, nabutela buhyana bwanyi; nabubiya bugenda mnda maboo ma tumangu twage. ⁸ Buhyana bwanyi busili nahi tambwe mnda isowa; gwaduga liidi lyage waandi; wa yulu ya bibyo nagionywa. ⁹ Wi wii! Buhyana bwanyi busili waandi nahi anonyi a tubala-tubala? Tunonyi twa buhuchi twamsalila ngubi chose? Giwe, musumbiche nyama chose cha m'bisowa, chilushiwe yulu chiye. ¹⁰ Baushi beengi buhuma ginge sii bagugicha lubala lwanyi lwa mizabibu, bagyatila ibaa yanyi hasi ha magulu mabo, baita iya ibaa yanyi ya isoga uba lele na mauwa. ¹¹ Baluita uba mauwa, na wa yulu luli mauwa lwandilila; sii gyose gyaiswa uba mauwa, bululi hashi mtu gubiile bino mnda mtima gwage. ¹² Buuwata kole basela u masongo ma koono mnda mbugu; bululi ahilu a MLUME ihaga utula luubi lumwechi ndaa na lunge luubi lwa bubili lwa sii; hashibi ata mine gwina m'bili gubi na talala. ¹³ Biuna ngano mnda biesa niigwa; balibongola bichuli-chuli byabo bya mwego, na bashibi na alambwe; ehe, monywe abuleyulu ya biguma byenyu, wa ibalo ya sungu cha buhuchi cha MLUME. ¹⁴ MLUME gwagana bino yulu ya babinji nanyi bose bene bali babii, bali huuda buhyana bwanyi bwine bwandihyaninye batu banyi Isilaeli, Loola, nibahumya mnda sii gyabo, nene nichula ndu gya Yuda gishibe hawingi habo. ¹⁵ Iyaka bibi, hanyumaha handibahumya, nigiwila na ubamonena misa; nene nibachwisha iyaka, klia mtu gagingile mnda buhyana bwage, na mtu gegese gagingile mnda sii gyage. ¹⁶ Hanyuma bibi,nambo biligigya wa bichigilicha madila ma batu banyi, ulaha wa china lyanyi, Nahi MLUME byeli na mwego, byoka biya nahi byabagigichiwe batu banyi ulaha wa Baali, haho noo habibiwa hawingi ha batu banyi. ¹⁷ Bibyi, nambo bashibenja uhulicha, uhumya, nuguhumya guya mmoga, na ubadiga abisa, MLUME gwagana.