¹ Maya mengo, MLUME guganine, bichula mauda ma maoolo ma ba Yuda, na mauda ma mauulu bage, na mauda ma bibuli, na mauda maba mbuwa, na mauda ma bashami ba m Yelusalemu, mahume mnda sinda chabo; ² nabo bimahaha u chuba, na u mwechi, na u byose byine bili hegulu ha gulu, byabauundile, na umagilila, na uba namo hamwechi, na umaenga, na umatambikila mashiongolwa hamwechi iyaka, na uchiwa; mabi mboleo hegulu ha ibaloo. ³ Na uwa wisobolwa na mihona gyose uhima uba na mwego u bose bene bashigele mnda mlongo guno gwa husone, benebashigele oose uya wine wandibachingile, gwagana MLUME gwa bilume pambwa. ⁴ Iyaka wibasambila ugana MLUME gwanana bino, Wi wii! Batu biigwa, na bashigimane iyaka? Wi wii! Mtu gwigaluwa na ugya, gashigiwile iyaka? ⁵ Yulu yai, bino, bano batu ba Yelusalemu bagalwile nugya unyuma, bashileye ugaluwa bibyo? Balihulama ulibicha abisa, uhanya ugiwila. ⁶ Nihuliche nuuhulicha, ata bibyo badogomine bishi lingye; hashi mtu gulibediche buubi bwage, gee ugana nagila ii? Kila mtu ugiwila wa lwendo lwage gee mine, nahi falasi byagisigya abilo ubita. ⁷ Ehe, iuba-uba hegulu igidi mengo mayo maisambilwe; na diba na amgwi-mgwi na mchinji gusulola mengo mago muuchwa; bibyo batu banyi bashigidi m'bindo gwa MLUME. ⁸ Mwadogoma wi, Beswe tuli na lwenyi, na m'bindo gwa MLUME tuli nago hamwechi neetu? Mndi, loola, kiliyo gyina lulimi gya mgochi gyaguita ube lulimi. ⁹ Bene bali na lwengu bamona abule, bamona iduba, na uwaswa; loola, baihanya inywa ya MLUME, bali na lwenyi nai mnda mwabo? ¹⁰ Bino, wa bibyo, nibaha bange batu baachi babo na mabala mabo nibaha baya benebibahyilila; bululi kila gumwechi gwabo, utula guya gwa mcho-mcho ndaa na guya gwa akungulu, bose bina itima; utula mbuwana ibuli, bose balihugila bya ubichiwa. ¹¹ Bululi balihuhonywa malase ma misiha gya batu banyi wa hegulu hegulu kaa, na udogoma, Talala, Talala, na hashi talala. ¹² Wi wii! bamonine abule, hababele hugila bya uchigilicha? Nangu! Bashimonine abule, na bashioshiche umona abule u byenyi byabo; bibyo biigwa hamwingi habo bene biigwa; mengo ma uchwilwa wabo bigishiwa hasi, MLUME gwagana. ¹³ Nibachimya abisa, MLUME gwagana; hashi zabibu hawingi ha mizabibu, na tini mnda mitini, ata yaanyi yage yihonga; na bitu biya byandibahele byibachimina. ¹⁴ Yulu yai twashama pii? Lisumbichiwe, tugingile mnda mabuga mene mina migumbo, twashame mo pii bululi MLUME, Abetcha etu atushamya pii, nage twatuha maadi mene mali bululu tumanywe, wa ibalo twam'benga MLUME. ¹⁵ Tulolele talala, mndi hashichile busoga bobose; tulolele mengo ma uhona, na loola, unogeya mtima kaa! ¹⁶ Uhuma wa Dani wahulichiwa unguluma wa falasi chage; sii gyose gyadanda yulu ya liidi lya unguluma wa falasi chage cha bita; bululi chichwile, chilile sii na byose byine bilimo; gigyo mbuga na bose bene bali bashame mnda bmuga. ¹⁷ Bululi, loola, nihila ndowa, ehe, kunga, hawingi henyu, mashinaoshiwa utolelechiwa wa maganga; namo mimchiga, MLUME gwagana. ¹⁸ Nambo nabaenda ulihungya, nashimone unyogwa! Mtima gwanyi gwachiminya malanga mnda mwanyi. ¹⁹ Loola, madi ma misiha gya batu banyi, malihuhuma mnda sii gyine gili koo abisa; Wi wii! MLUME gushimo mnda Sayuni? Oolo lyage lishimo mnda mwage? Yulu yai banjigilicha yulu ya miishi gyabo gyababadile, na wa usona wa igenyi? ²⁰ Usola wahuhwa, mengo ma yuda mahuhwa, na ata beswe tusahogononywa. ²¹ Wa bululi bwa masumwa ma misiha gya batu banyi nasumwa nene; nachwala anyiki; ugagilwa wambwata. ²² Wi wii! hashi isumbe mnda Gileadi? Ubo ushi ng'anga? Yulu yai, bino, ishinagiwila ihema ya misiha gya batu banyi?