¹ Ino inywa noo imyiile Yelemia, uhuma mmanywa a MLUME, ugana, ² Gimana ha mchango gwa ndu gya MLUME, walisambe haho ino inywa, benyweba Yuda bose, mulihugingila mnda gino michango yulu ya umnyemya MLUME. ³ MLUME gwa bilume pambwa, Abetchaa Isilaeli, gwagana bino, Sebwe madila menyu, na bigilanywa byenyu, na nene nimshamya ha ino ihana. ⁴ Mushiudagile binywa bya lulimi, mulihidigima , Ihwilo ya MLUME, Ihwilo ya MLUME, Ihwilo ya MLUME noo bino. ⁵ Bululi nambo m'beseba abisa madila menyu nabigilanywa byenyu; nambo m'beonono uonona wa kiine hawingi ha mtu na m'binji nage; ⁶ nambo mushi huumonena mgenyi, naata shige, na ata m'bwilwa, na nangu ugesa mashi mene mashi na abachi ha ino ihana, nanangu ulama tunge tubetcha wa yulu ya ugugila wenyu benywe bene; ⁷ haho noo handimshamya ha ino ihana,na mnda gino sii gyandibahele bamasenyu, utula aala ndaa na milumbu. ⁸ Lingaminywe, mulihuudagila binywa bya lulimi, bishibahana alambwe. ⁹ W wii! Mwigiba, na uhaga, na uita masei na ulahawa lulimi, na umuhila Baali aswenge, na ulama tunge tubetcha twine twamushimanine.; ¹⁰ hanyuma mwichwa na ugimana umbele wanyi mnda gino ndu, gyine gilihugiswa wa china lyanyi, na ugana, Twahona; yulu muoshe ugila bya uchigilicha bibyo byose? ¹¹ Wi wii! Gino ndu, gilihugiswa wa china lyanyi, gisili ihana ya beebi, basapi u meeso menyu? Lingaminywe, nene, ehe, nene, naimona iyo ihisho, MLUME gwagana. ¹² Biino, giwe hano bino wihana yanyi yine iliho haya Shilo, handilishaminye china lyanyi haya habutulilo, mwamine byandigiglie wa yulu ya buubi bwa batu banyi Isilaeli. ¹³ Na bino, wa bululi mwagila migilo gino gyose MLUME gwagana, nene nidogogmine nenyu, ubyuwa halwelo na ugana, ata bibyo mushihuliche; nene nimgishile mushi ngitabuwile; ¹⁴ bino, nigilila gino ndu, gilihugiswa wa china lyanyi, gyamulihuudagila, na inoihana yandimmele benywe na bamasenyu, nahi byandibagilile uya shilo. ¹⁵ Nene nimtela benywe koo na meeso manyi, nahi byandibatelile bashiwenyu bose, noo ibushiyose ya Eflaimu. ¹⁶ Bino, gogwe ushibasabile bano batu, na ushibagabweleliidi lyobe, ata ubasabila wa Abetcha, na ushitendelele yulu yabo; bululi nishiuhulicha. ¹⁷ Wi wii! Ushihumona byabalihugila mnda mabuga ma Yuda, na mnda masango nandila ma Yelusalemu? ¹⁸ Baana basutola kunyi, na bamasabo basulamya aahya, na baachana basuhele buusu, yulu ya umlingecha Malkia gwa gulu mikati, na utuhongolwela tubetcha twa tugenyi lutangi lwa byuubywa, yulu banjigiliche nene. ¹⁹ Wi wii! Bano batu bali hunjigilicha nene? MLUME Gwgana; bashi hulichigilicha bichuli-chuli byabo bya mwego, na ubibiya byenyi byabo abule boo bene? ²⁰ Wa bibyo Mlume ABETCHA gwagana bino, Loola, sungu chanyi na uchigililwa wanyi byigeswa hegulu ha ino ihana, hegulu ha batu, na hegulu ha nyama nahegulu ha miti gya mmabala, na hegulu ha byutota bya sii; nabyo byichiga, na bishichima. ²¹ MLUME gwa bilume pambwa, Abetcha a Isilaeli, gwagana bino, Biiwe lutangi lwenyu lwa uchigya hamwechi na lutangi lwa nyama chenyu, mwaye nyama. ²² Bululi nishidogomine na bamasenyu, na ata bibyo nishibasambile yulu ya lutangi lwa uchigya na lutangi lwa nyama, luya lusugu lwandi bahuminye mnda sii gya Misili. ²³ mndi nibasambile kaa yulu ya ino inywa, niganine, Hulichiwe liidi lyanyi, nene nibi Abetcha enyu na benywe mubi batu banyi; m'begya mnda ndila giya gyose gyine gyandimsambila bululi mwabe na bibya biingi. ²⁴ Haho bashiihuliche na ata utega litu lyabo, bibyo bagile ulamana na mihungo gyabo boo bene, na wa uguma wa mitima gyabo giibi, balihugya unyuma na ushi u mbele. ²⁵ Utula luya lusugu bamasenyu habahumine mnda sii gya Misili ndaa na lino, nabahila bagichi banyi bose bambuwa wamli, nisubyuwa umayaya na ubahila masugu mose. ²⁶ Ata bibyo bashipuliche, ata utege litu lyabo; biya baiitile maoshi mabo uba magumu; bagilile biibe uhima bamasabo. ²⁷ Gogwe wibasambila binywa bibyo byose, ata bibyo bashiuhulicha, gogwe wibagita; ata bibyo bashiuhulicha. ²⁸ Gogwe wibasambila, Mmoga guno noo gushibahulicha liidi lya MLUME, Abetcha abo,na ata ugaa lusungulo; uwilila wchimina, watelwa koo natunywa twabo. ²⁹ Ubege njuli chobe, Ee Yelusalemu, uhitele, Wabiye malilo hegulu ha masongo ma koono; Wa bululi MLUME gwaihanya na wiitela Ibushi ya uchigililwa wage. ³⁰ Bululi baanaba Yuda bagila bya bisone u meeso manyi, MLUME gwagana; babiile byuchigilcha mnda gigyo ndu, gilihugiswa wa china lyanyi, na ugibiya bya bidogu. ³¹ Nabo bahagubaa ha ihana ya Tofethi, mnda ibetabeta ya baana ba Hinomu, yulu ya ubachigya baana babo na misiha gyabo waahya; igilanywa yine yandishibalagile, na ishigingile mnda mtima gwanyi. ³² Bino lingaminywe, masugu malihuchwa, MLUME gwagana,ugana ishigiswa iyaka Tofethi, na ata ibetabeta ya baana ba Hinomu bibyo yigiswa, Ibetabeta ya Bushinjicho; bululi bichiya batu mnda Tofethi, na hashibi ata na uhana yauchiila iyaka. ³³ Na bitumba bya bano batu bibi iliwa ya maubi ma mgala, na ya binyama bya gino sii; na hashibi na mtu gubichinga. ³⁴ Haho mnda mabuga ma Yuda, na umasango nandila ma Yelusalemu, niisungya liidi lya aseo na liidi lya saaso, liidi lya mlume gwa buya na lya mmachi gwa buya; bululi gigyo sii gibi mauwa.