¹ Sinywe yulu mwabe na mwego, benywe baana ba Benyamini; humwe mnda Yelusalemu, gilwe tusiba mnda Tekoa, gimiwe bisaga miimamnda Brth-hakelemu; bululi buubi buluhulingamine uhuma luubi lwa uboo wa uachi, na udogya wa wata. ² Msiha gwa Sayuni gwa msoga, m'bongu, nimmnya abisa. ³ Baushi na bihichi byabo bya miyoo bimchwila; bigubaa bitula babo hoka nage ngubi chose; mtu gegese gwilishicha ha ihana yage moyoo gyage. ⁴ Biwe bita yulu yage; gimanywe, na tugye hegulu mengo ma kuyia meeno. Luhanga lubi wetu, bululi mengo ma chuba mahutula uhunguwa, bichuli-chuli bya igolo byahuchili uba bilahu. ⁵ Gimanywe, natugye hegulu hage mengo ma busugu, tugugiche madu mage. ⁶ Bululi MLUME gwa bilume pambwa gwagana bino, Ligedelw miti, mwagimiye mgumbo u Yelusalemu. Gino mbuga gilihuhyilwa; umonena kaa noo uli mo. ⁷ Mahi biya ishima byaisusuwa maadi mage, byoka biya noo byaimonya usona wage; buhuli-huli na ugugicha bilihuhulichiwa mnda mwage. isumi na malase bili u mbele wanyi abisa. ⁸ Uononywe, Ee Yelusalemu, ichuli-chuli yanyi ya mwego, ishichwe ugumana nobe; nashichwe uita ube mauwa, sii gishigishaminywe na batu. ⁹ MLUME gwa bilume pambwa gwagana bino, Bihogononywa mihona gya Isilaeli nahi mzabibu; giwicha uboo obe mnda ahwaba, nahi mmombi gya zabibu. ¹⁰ Nadogome nananyi, naubangisiya, yulu bahuliche? Loola, litu lyabo lishigile kumbi, nabashinaosha uhulicha; loole, inywa ya MLUME isili misobo wa bali; bashi huliseelela. ¹¹ Bibyo nagilula na bichigililwa bya MLUME; nahuima na ulichibila; bigeswe hegulu ha baana bene bali mndila, na hegulu ha subilo lya bawalubaga nabo; bululi ata mlume gwiguhwa hamwechi na mmachage, miungu hamwechi na guya gwiwilicha masugumage. ¹² Na madu mabo mabi bibya ba bange batu, mabala mabo nabaachi babo hamwechi; bululi nigolola uboowanyi hegulu ha bashami ba gino sii, MLUME gwagana. ¹³ Bululi utulaguya gwa mchomcho ndaa naguya mmosobu mmanga gwabo, kila gumwechi ii gwa itima; na, utula mbuwa, ndaa na ibuli, bose basugila bihisho bya uhugononya. ¹⁴ Balihuhonya malase ma batu banyi hegulu hegulu ka, balihugana , Talala, Talala, na hashi talala. ¹⁵ Wi wii! bamonine abule, hababele habagilile bya bichigilicha? Nango, bashimonine abule ata acho, na bashioshiche umona abule u byenyi byabo; bino, bigwa mmanga gwa baya bene balihugwa; mengo mandibachwila bigwishiwa hasi, MLUME gwagana. ¹⁶ MLUME gwagana bino, Gimanywe umasango na ndila, mwamone, mwabuche mwano gwa mahitilo ma aala, Gili uhi ndilagya gibenju? Mwagye m gigyo ndila,nabenywe mwiliha ulitucha mnda chili-chuli byenyu bya mwego. Haho baganine, Tushihuunda ugya m gigyo ndila. ¹⁷ Nene nibiile bagimenyi hegulu henyu, balihugana, Lihulichiwe liidi lya asiba; haho baganine tushihuunda uhulicha. ¹⁸ Wa bululi bwa bibyo hulichiwe, benywe mioga, mwamane, Ee sumbilo, iy'hisho nai yimoneya hawingi habo. ¹⁹ Hulicha, Gyenywe sii; loola, nilwisha buube yuluya bano batu, ehe, biguma bya malanga mabo, bululi bashibahuliche binywa byanyi; na iyaka yulu ya mwano gwa m'bindo gwanyi, baguhanya. ²⁰ Haiswe hii bandushiche aswenge a Sheba, na uudi lya uhuma koo? Lutangi lwenyu lwa uchigiwa lushi hugitabichiwa, na ata lutangi lwenyu lushihubwilicha. ²¹ Bino, wabibyo, MLUME gwagana bino, Loola, nibiya bya uhyatala u mbele wa bano batu, na bashibaana ba baana babo bihyatala hamwechi; m'binji na mtu na genda lyage bichimina hamwechi. ²² MLUME gwagana bino, Loola, batu balihuchwa uhuma sii gya lubi lwa uboo wa uachi; na mmoga gwaata gwibyulwa, gwihuma luubi lwa isula ya ibaloo. ²³ Bawashi ba mata na masumo; bina anyamo, bashi na misa; madi mabo malihututa nahi bahali, nabo bachina falasi chabo; kila gumwechi nahi mtu gwa bita gwalibiya hegulu hobe, Ee msiha gwa Sayuni. ²⁴ Tuhuliche myano byobe; maboo metu malebela; asusu atuwata, na busungu nahi mmachana mengo mage ma ubuta. ²⁵ Mushitobowe ugya umabala, na mushigyate mmndila bululi ahilu a amangu aliubo; booba buli ngubi chose. ²⁶ Ee misiha gya batu banyi, ulichwiye bichwalaganywa bya bilembe-lembe, na ulibulaganya mnda mtoo; ubiya malilo, nahi malilo yulu ya mwaana gwa ihene, malilo ma usuma mtima abisa; bululi guya guwata kole gulihuchwa wa ubabula. ²⁷ Niubiile ube songo gyagilahu na mgumbo hawingi ha batu banyi; waoshe umana ndilagyabo na ugitonda. ²⁸ Ii abengi uhima ulingilila bose abisa, balihugya ubo naubo na balihuchinga, babo ii lusuu na bigele, bose balihugila bya usapa. ²⁹ Miguba gilihugombwa wa uoma abisa; migwi kaa noo gilihuhuma mmo mmaahya, mtumbi gwa lufeza gulihusumbula bunene kaa; bululi babii bashihuhunyiwa ugya koo. ³⁰ Batu bibagita bibambu bya lufeza, bululi MLUME gwabahanya.