¹ Hingwe abilo ubo na ubo mnda ndila gya Yelusalemu, mumone bino, na umana, na uenga mnda malagala mage, nambo munaosha umpata mtu gumwechi, nambo hali mtu gumwechi mine gulihugila wa kiine, gusuenga uwilila; na nene nileelela gigyo mbuga. ² Na binagana, Nahi MLUME byeli na mwego, chigilwe balihulaha wa lulimi. ³ Ee MLUME,meeso mobe wii! Mashibalingamina uwilila? Wabahula, nabo basachigililwa; wabasungya, nabo bahanya ubechiwa baita byenyi byabo uba bigumu uhima liwe lya lyata bahanya ugiwila. ⁴ Haho niganine, Chigilwe, baba ii bambuchu; mtuhoso tutu; bululi bashigidi ndila gya MLUME, na ata uionona wa Abetcha abo. ⁵ nibagila batu baosobu, na nene nidogoma nabo; bululi babo bagidi ndila gya MLUME, na uonona wa Abetcha abo. Mndi bano wa malanga mamwechi banoga mti gwa uhamba maoshi umwechi, na ugeda bihambo. ⁶ Bino, wa bibyo, tambwe gya uhuma mmisowa gyibahaga, na m'bwabwa gwa igolo gwaibawata kole, ngoo gyihiba mabuga mabo, mtu gegese gwihuma mo gyibageda bihindi bihindi; bululi bwa buube bwabo ii bwiingi, na ugiwila unyuma wabo wachili. ⁷ Mnaosha wii uuleelela? Baana bobe bashiga nene, na uulaha uli baya bene bashi tubetcha; handibele hubagyusha na biliwa, baitile masei, basambene beengi hamwechi mnda madu ma sengu. ⁸ Babele nahi falasi chigyutila mengo ma lwelo; gegese gumwechi gulilile yulu ya itima ya mmachi gwa gunge nage. ⁹ Wi wii! Nashibachinge yulu ya bibyo? Gwagana MLUME; na ichuli-chuli yanyi ya mwego, wii! Nashigiwidiche buube wa buube yulu ya mmoga gya biino? ¹⁰ Chinywe hegulu ha bibambacha byage mwadogye, haho mushidogye abisa; sasulwe matabi mage; bululi mashi mage MLUME. ¹¹ Bululi ndu gya Isilaeli na ndu gya Yuda bangilila bya bushimbi abisa, MLUME gwagana. ¹² Bammanya MLUME, na ugana, Gushi gee; na ata buube bushituhyiila; na tushimina ahilu ata na ndala; ¹³ na bambuwa babi mnaga, na ata inywa yage ishi mnda mwabo; mndi bibyo noo byabigilwa. ¹⁴ Bululi bwa bibyo MLUME, Abetcha a bilume pambwa, gwagana bino,Wa bululi mwagana ino inywa, loolwe, niita binywa byanyi mnda anywa obe uba aahya, na bano batu uba kunyi, nao aahya ibachigya. ¹⁵ Lingaminywe, nichwisha mmoga yulu yenyu gwihuma koo abisa, Ee ndu gya Isilaeli, MLUME gwagana; ii mmoga gwine gwina uoma, ii mmoga gwa aala abisa, mmoga goshigidi liidi lyabo, na ushihumana byagali hudogoma. ¹⁶ Luuku lwabo lusili alibu hululu, ii basolokoto bose iyaka/. ¹⁷ Nabo biiya byolihusola byobe, na mkati gobe, byine bilingye bawalubaga bobe na bawamisiha bobe uubiya; biiya bihichi byibe bya miyoo na bya ng'ombe; biiya mizabibu gyobe na mtini gobe; bigugicha mabuga mobe mene mali na migumbo, molibele huudagila, ehe, bimagugicha wa tuhilu. ¹⁸ Haho ata ha maya masugu, MLUME gwagana, nishimmonona benywe abisa. ¹⁹ Iyaka habi hamwibucha, MLUME gwatugila bihisho bino byose yulu yai? Haho noo holibasambila, Byoka biya nahi benywe byamundeile nene, na utugilila tubetcha tungemndsa suu gyenyu, bibyo noo byamwigilila bagenyi mnsa sii gishi gyenyu. ²⁰ Lisambwe ino inywa mnda ndu gya Yakobo, ilisambwe uli Yuda, ugana, ²¹ Hulichiwe ino inywa, benywe batu tuhuso mishi na umana; muli na meeso na mashi humona; muli na matu na mashi huhulicha. ²² Wi wii! Mushihuunyemya nene? MLUME Gwagana; mushidanda umbele wa meeso manyi; nene nibiile isee uba nyimbo gya bahali, wa alago a masugu mose, lishioshe uitowa? Mabimbi mage inangwa milihula hula, mashimaosha uluhima uoma; minalihula abisa, mashinaosha igihima. ²³ Bino bano batu bali na mtima gwa ubenga na gwa ahyionono; babenga, baligila lwabo. ²⁴ Na bashihudogoma mnda mitima gyabo, Bino, na tumnyemyeMLUME, Abetcha etu, ganyeshe mbula, mbula gya mengo mene matulihugibenja, na mbula gya lunyange, wa mengo mage; na utubiile mayinga ma usola u mengo mamanyiye. ²⁵ Usona wenyu wagalula bino, na buube bwenyu bwamchibila busoga bwenyu bushimmyile. ²⁶ Bululihawingi ha batu banyi bamoneya batu basone; basulibisa nahi batu balihutega magochi; utega gochi, na uwasha batu. ²⁷ Nahi pao gyagisugilula tunonyi, byoka biya madu mabo magilula usapana; wa bibyi basili bahela, bapata bitundu. ²⁸ Bahema na uhanga abisa, bagema; ehe, bahima lingililo lya bigilanywa bisone; bashi hudogomena mashige uhewa byabo, bululi bahewe na ugililwa; na bashihugeda kiine gya basabi. ²⁹ Wi wii! Nashibaambile yulu ya bibyo bihisho? MLUME gwagana; na ichuli-chuli yanyi ya mwego, wii! Nashiligiwidiche buube yulu ya buube hegulu ha guno mmoga gwa biino? ³⁰ Ihisho ya bisaga, ya uchigilicha, yamoneya mnda gino sii! ³¹ Bambuwa babuwa wa lulimi, na bibuli balihuhyilila wa bwatilicho gya babo; na batu banyi balihuunda bihisho bibe bibyo. Na benywe isula yage mwiita wii?