¹ Na Shefania, mwaanagwa Matani, na Gedalia, mwaana gwa Pashuli, na Yukali, mwaana gwa Shelemia, na Pashuli, mwaana gwa Malkiya, bahuliche binywa byine bidogomine Yelemia byelisambile batu bose, ugana, ² MLUME gwagana bino, Mine gwishama mnda gino mbuga gwiiwa wa ahilu na wa ndala, na wa bisumi; bibyo guya gwigya u Bakaldayo gubi poo, nage gwihewa mwego gwage uba kole, nage gushiwa. ³ MLUME gwagana bino, Hashi ata adugwa gino mbuga gwibiwa mnda maboo ma basolokoto ba oolo lya Babeli, nage gwigiwata kole. ⁴ Haho bamsambile oolo, Tulihuusaba, guno mtu gahagwe, bululi gwamagongohola maboo ma batu ba bita, baya bene bashigele mnda gino mbuga,na maboo ma batu bose, wa ubasambila binywa nahi bibyo; bululi guno mtu gushihubaengela bano batu luhangaa lusoga, ii bya shali kaa. ⁵ Nage oolo Sedekia guganine, Loolwe, guli mnda maboo menyu; bululi oolo noo gushibagila inywa yoyose inyume yenyu. ⁶ Bibyo bamguhile Yelemia, boo nuumtela mnda iina ya Malkiya, mwaana gwa oolo, yine ili mlagala lya balochi; bamsachiche wa migochi. Na mya mmiina mushibele maadi, mubele biswaswa ka; nage Yelemia guchindile mnda biya biswaswa. ⁷ Haho, Ebedmeleki, Mkushi, gushibagya u baachana, gubele mnda ndu gya oolo, helihuliche ugana bamtela Yelemia mnda iina; na mamo mengo oolo gubele mshame u mchango gwa Benyamini; ⁸ Ebedmeleki gutobowile mnda ndu gya oolo, gumsambile oolo, guganine, ⁹ Ee mlumyanyi, oolo, bano batu bagila bisone u bigilanywa byabagila yulu ya Yelemia, mbuwa, mine gwatelwa mmiina; nage hange gwiiwa haya heneheli, wa yulu ya ndala; bululi mbuga gyose gishi ata na mkati gwenaya. ¹⁰ Haho noo oolo helimsambile Ebedmeleki, Mkushi,ugana, Uguhe batu maumi matatu utulila hano, umumye mnda iina, bibyo gushinawa. ¹¹ Bibyo Ebedmeleki guguhile batu hamwechi nage, gugingile mnda ndu gya oolo hasi ha ahombo, guhuminye mya bichwalaganywa byine bitelilwe, na bilembelembe byaala, gumsadiche Yelemia mmiina nahi mgochi. ¹² Nage Ebedmeleki, Mkushi, gumsambile Yeleima, Biya, bichalaganywa biino bya bitelwe na bilembelembe biino Baala, hasi ha maaha nahi migochi. Nage Yelemia guitile biya. ¹³ Bibyo bamginunine Yelemia wa gigyo migocho, bammuminye mnd iina; nage Yelemia gushamine mnda lagala lya balochi. ¹⁴ Hanyuma oolo Sedekia gutumine batu, gumyiche mbuwa Yelemia wage, ha bugingililo bwa butatu bwa ndu gya MLUME; oolo gumsambile Yelemia, Nihubenja uubucha inywa, na gogwe ushimbise inywa yoyose. ¹⁵ Bibyo Yelemia gumsambile Sedekia, ugana, nabeuununina iyo inywa, ubi wii! Gogwe ushipaga? Iyaka nene nabeuha lango gogwe ushipulicha. ¹⁶ Haho Sedekia oolo gumlahile Yelemia wa bubisa, guganine, Nahi bili MLUME na mwego, gee mine gubumbile mitima gyetu, nishiuhaga, na nishiubiya mnda maboo ma baya batu bene balihuenga uuhaga. ¹⁷ Haho Yelemia gumsambile Sedekia, MLUME, Abetcha a bilumepambwa, Abetcha a Isilaeli, gwagana bino, Nambo wichuwa na ugya u baulu ba oolo lya Babeli, bibyo ichuli-chuli yobe ya mwego ubi poo, na ata gino mbuga gishichigiwa; gogwe ubi poo na ndu gyobe; ¹⁸ mndi nambo ubehenya uchuwa na ugyau baulu ba oolo lya babeli, haho, gino mbuga gyibiwa mnda maboo ma Bakaldayona bo bigichigya, na ata gogwe ushilihengya na maboo mabo. ¹⁹ Oolo Sedekia gumsambile Yelemia, Nihubamona booba Bayahudibebe babasinine Bakaldayo, bashichwe umbiya mnda maboo mabo, nabo nungilucha. ²⁰ Haho, Yelemia guganine, Nangu! Bashiuhanana. Nobongela ibumbu, nyemya liidi lya MLUME mnda bibyo byine byanduhusambila; noo bibi bisoga oli, na ichuli-hui yobe ya mwego ibi poo. ²¹ Nambo wihanya uchuwa na ugya, iyo noo inywa yamonya MLUME; ²² Loola baachana bose, bene beshigilwe mnda ndu gya oolo lya ba Yuda, bitobolwa na uguhwa na baulu ba oolo lya Babeli, na babo baachana bidogoma, Magenda mobe mene nali hoka muubicha, nabo buuhima; na yulu ya magulu mobe machinda mnda biswaswa abisa, bagaluwa na ugiwila unyuma. ²³ Na bibaguha baachi bobe, na baana bobe bose, na ubaguha ndaa na u Bakaldayo; na gogwe ushihigonowa na maboo mabo, bibyo wiwaswa na uboo wa oololya Babeli, na gogwe ubi ibalo ya gino mbuga uchigiwa. ²⁴ Haho Sedekia gumsambile Yelemia, Mtu gegese gashihuliche guno mwano gwa bino binywa, na gogwe ushiwa. ²⁵ Bibyo nambo baulu babehulicha ugana nadogoma nobe, nabo babechwa oli, na uusambila, Utuununine hano biya byawasambila oolo; ushitubise, beswe tushi uuhaga; na biya byine byusambila oolo. ²⁶ bino, wibasambila ugana, Namsaba oolo gashingiwiche u ndu gya Yonathani, nashichwe uwa mo. ²⁷ Haho baulu bamgilile Yelemia, bam'budiche; nage gubasambile nahi biya bimsambile oolo. Bibyo baleile udogoma nage; bululi iya inywa isimanyiye. ²⁸ Biybo Yelemia gushamine mnda lagala lya balochi ndaa na luya lusugu luwashilwe Yelusalemu na Bakaldayo.