¹ Inywa ino noo ichwilile Yelemia uhuma wa MLUME, haho noo haya Nebukadleza oolo lya Babeli, na basolokoto bage bose na buoolo bose bwa ino ibaloo bwine bubele hasi ha uhyilila wage, na milongo gyose gya batu, balwile na Yelusalemu hamwechi na mabuga mage mose, ugana, ² MLUME, Abetcha a Isilaeli, gwagana bino, Ugye udogoma na Sedekia, oolo lya ba Yuda, wamsambile, MLUME gwagana bino, Loola, nibiya gino mbuga mmaboo ma oolo lya Babeli, nage gwigichigya wa aahya; ³ iyaka gogwe ushilihogonona na uboo wage, bibyo wiwaswa chigilwe chigilwe, na ubiwa mmaboo mage; na meeso mobe milola meeso ma oolo lya Babeli, nage gwidogoma nobe anywa wa anywa, na gogwe wigya Babeli. ⁴ Ata bibyo uihuliche inywa ya MLUME, Ee Sedekia, oolo lya ba Yuda; MLUME gwagana bino wa yulu ya mwano gobe; ushiwa wa ahilu; ⁵ wiiwa wa talala; na wa uhulilwa mii gwa bamasobe,maoolo ma aala mene mabele hambele hobe, noo byabiuhulila mii; nabo biulilila, Aa, MLUME! bululi nene naidogoma ino inywa, MLUME gwagana. ⁶ Haho Yelemia, mbuwa, gumsambile Sedekia, oolo lya ba Yuda, binywa bibyo byose mnda Yelusalemu, ⁷ maya mengo mabele hulwa basolokoto ba Babeli na Yelusalemu na mabuga mose ma Yuda menemashigele, na Lakishi na Azeka; bululi mabuga mamo noo mene mabele mashigachu u mabuga ma Yuda mene mabele na migumbo. ⁸ Ino inywa noo imchwilie Yelemia uhuma wa MLUME, hanyuma ha haya hene babiile oolo Sedekia alago na batu bose bene babele mna Yelusalemu, ubasambile mwano gwa buhulu; ⁹ ugana kila mtu gabiye mcha gwage na buhulu, kila mtu gabiye mgichi gwage na buhulu,uba guya mlumyana ao mmachanaii Mmebulania; mtu gegese gashimgiche Myahudi, mshiwabo; ¹⁰ na baosobu bose, na batu bose, mengo ma babiile aya alago, ugana mtu gegese gabiye mcha gwage na mgichi gwage na buhulu, mtu gegese gashibagiche migilo iyaka; banyeminye, babaleile. ¹¹ Hanyume balibadiche, babagiche baya bacha, na bagichi baya, bene babalidiche uba nabuhulu, nabo babaitile uba bacha na bagichi babo. ¹² Haho, inywa ya MLUME ichwilile Yelemia, uhuma wa MLUME, ugana, ¹³ MLUME, Abetcha a Isilaeli, gwagana bino, nibiile alago na bamasenyu, luya lusugu lwandibahuminye mnda sii gya Misili, mnda ndu gya bucha, niganine, ¹⁴ Isula ya kila mwaa gwa njwii mtu gegese na gam'biya na buhulu mshiwabo Mmebulania, gugulilwe oli na uugilila myaa mtuba wimlecha gahume oli gabe nabuhulu, ata bibyo bamasetu bashihuliche, na bashitegile matu mabo. ¹⁵ Na benywe mubele bagalubu, mugilile byine bibele bisoga u meeso manyi, umtele mbila gya buhulu kila mtu na mashiwabo; na benywe mubele babiya alago u mbele wanyi, mnda ndu giya gilihugiswa wa china lyanyi; ¹⁶ bibyo mulibediche, na ulituwa chinalyanyi; mtu gegese gugiwiche iyaka mcha gwage na mgichi gwage, bene bamusibele babiye na buhulu nahi byababendiche boo bene, mubabiile iyaka m'bucha, babe bacha benyu na bagichi benyu. ¹⁷ Bino MLUME gwagana bino, Mushipuliche yulu ya ubasambile buhulu mtu gegese na mshiwabo, na kila mtu m'binji nage; loola, nene nabatela mbila gya buhulu, MLUME gwagana, noo bwa ahilu, na ndala, na bisumi; nene nimtela mugye ubo na uya mnda buoolo bose bwa ibaloo. ¹⁸ Na baya batu bene babelile alago anyi, bashibawiliche binywa bya aya alago, ababiile u mbele wa meeso manyi, mengo maya mamugedile mwana ng'ombe bihindi byopi, bahitile hawingi ha biya bihindi; ¹⁹ bauulu ba Yuda, na bauulu ba Yelusalemu, baya bashibagya u baachana, na bibuli, nabatu boseba sii, bene bahitile hawingi ha biya bihindi bopi bya mwana ng'ombe; ²⁰ nene nibabiya mnda maboo ma tumangu twabo, na mnda maboo ma baya bene balihuenga mitima gyabo, bitumba byabo bibi iliwa ya tunonyi twa hegulu, na ya byiila bya sii. ²¹ Na Sedekia, oolo lya ba Yuda, na baulu bage nibabiya mmabo ma tumangu twabo, na mnda maboo ma baya bene balihuenga mitima gyabo,na mnda maboo ma bilume pambwa bya oolo lya Babeli, bene baligile lwabo na umshiga benywe. ²² Loolwe, nibaha alago anyi, MLUME gwagana, na umgiwicha iyaka mnda gino mbuga; nabo bilwa nabo, na ugiwata, na ugichigya wa aahya, nene nimaita mabuga na ba Yuda uba mauwa, mashishaminywe na mtu.