¹ Iyaka inywa ya MLUME ichwilile Yelemia lwendo lwa bubili, haya hene helibele gwili mmambwe u lagala lya kalochi, ugana, ² MLUME gwaiitawii ino ihisho, MLUME gwaibumba yulu gaiwiliche; MLUME noo china lyage; gwgana bino, ³ Ngiite, na nene niugitabuwa, na nene niumonya bigilanywa bwaata, bigumu byoshigidi. ⁴ Bululi MLUME, Abetcha a Isilaeli gwagana bino, yulu ya mwano gwa madu ma gino mbuga, na yulu ya mwano gwa ndu gya oolo lya Yuda, mene mabelilwe yulu ya uhanya migumbo na ahilu; ⁵ Balihuchwa ulwa na Bakaldayo, mndi ii ugilucha na bitumba bya batu, bandihagile wa sungu chanyi na uambila wanyi, bululi bwa usona wabo boo bose nibisile yenyi yanyi u gino mbuga. ⁶ Loolwe nigilushicha ihema na uhona, nene nibahonya; nene nibaununina bwingi bwa talala na winene. ⁷ Nene nubagiwicha bahambwa ba Yuda, na bahambwa ba Isilaeli, na ubagubaila mabuga mabo nahi aala. ⁸ Nene nibahahacha na usona wabo ose, ulamana na ubo bangilile buubi; nene nibaleelela usona wabo ose, yulu yao bangilile buubi; na uluba yulu yanyi. ⁹ Na gino mbuga gibi wandi na china lya saaso, na punda na ugengeda, u meeso ma mioga gyose gya ibaloo, bene bihulicha mwano gwa busoga bose bwine bwandi hubagilila, nabo bimona booba na udanda, yulu ya busoga bose na talala gyandiha gino mbuga. ¹⁰ MLUME gagana bino, mnda iya ihana yine yamulihugana ili mauwa, ishi na batu na ishi na nyama, ehe, mnda mabuga ma Yuda na mnda madila ma Yelusalemu, mene mali mauwa,mushi batu na ata bashami na nyama chishimo. ¹¹ mwihulichiwa iyaka liidi lya saaso na useelella, liidi lya mlume gwa buya naliidi lya mmachi gwa buya, liidi lya baya bene balihugana Mtonywe MLUME gwa bilume pambwa, bululi MLUMEii gwa misa, uleelela wage ii wa milumbu; na liidi lya baya bene balihuhila lutangi lwa utona mndu gya MLUME.Bululi nibagiwicha bahambwa ba gino sii nahi haya haala, MLUME gwagana. ¹² MLUME gwa bilume pambwa gwagana bino, ha ino ihana yine ili auwa, hashi mtu na hashi nyama, na mnda mabuga mage mose, ibi bushamo bwa baushi balihulacha miyoo yabo, ¹³ Na mnda mabuga ma sii gya tubandagulu, na mnda mabygama sii gya ibandabanda, na mnda mabyga ma Negebu, na mnda sii gya Benyamini, na na wihana yine ili hoka na Yelusalmu, na mnda sii gya Yuda, migoma gya miyoo gyihita iyaka hasi ha maboo mage, guugibala, ii MLUME gwagana. ¹⁴ Loolwe, masugu mali huchwa, MLUME gwagana, handiwiicha inywa iya isoga yandiganine, na yulu ya mwano gwa ndu gya Isilaeli, na yulu ya mwano gwa ndu gya Yuda. ¹⁵ Mnda maya masugu, na maya mengo, nimtotecha Daudi Mtonga gwa kiine; nage gwionona wa kiine mnda gino sii. ¹⁶ Ha maya masugu Yuda gwihogononywa, na Yelusalemu gyishama kolongecho, na china lyage lyeligiswa noo lino; MLUME noo kiine gyetu. ¹⁷ Mululi MLUME gwagana bino, Daudi gushihulwa na mtu gushama wisuba ya buoolo bwa ndu gya Isilaeli; ¹⁸ ata na bibuli Balawi bashihulwa ugimana u mbele wanyi, na uhana lutangi lwa uchigya, na uhulila lutangi na uhana nyama cha lutangi masugu mose. ¹⁹ Inywa ya MLUME ichwilile Yelamia ugana, ²⁰ MLUME gwagana bino, Nambo mwiosha ubele alago anyi a mchuba, na alago anyi a m'busugu, na hashibe iyaka mchuba na m'busugu, ulamana na mengo mamo byamasushama, ²¹ haho mnda alago anyi andibiile na Daudi mgichi gwanyi, linaosha ubeleya, na hashibe na mwaana gwa ushama mnda isuba yage ya buoolo; iyaka alago anyi andibiile na Balawi babibuli, bagichi banyi, anaoshiwa ubelwa. ²² Nahi biya basolokoto ba gulu bashinaoshiwa ubalwa, na ata isee ya bahali upimwa; bibyo noo byandilibiya ibushi ya Daudi mgichi gwanyi, na Balawi bene balihungilila. ²³ Hanyuma inywa ya MLUME imchwilile Yelemia, ugana, ²⁴ Wi wii! Ushihulanga ino inywa udogomine bano batu, uganaMilongo byabo gibiligisobole MLUME gwagitela koo? Bibyo noo byabali hunenuna batu banyi, yulu bashibe iyaka moga u mbele wabo. 5 MLUME gwagana bino, uba alago anyi a mchuba na a m'busugu ashihugimana masugu mose, ube nene nishigimaninye mishaminyi gya gulu na ibaloo; ²⁶ mndi haho noo handibatele koo ibushi ya Yakobo, na Daudi, mgichi gwanyi, ata nashiguhe ibushi yage ihyilile heguluha ibishi ya Iblahimu, na Isaka, na Yakobo; bululi nibagiwicha bahambwa babo, na nene nibaleelela.