¹ Inywa ino noo ichwilile Yelemia, uhuma wa MLUME ha mwaa gwa umi gwa Sedekia oolo lya ba Yuda, nago gubele mwaa gwa umi na inana gwa Nebukadleza. ² Bino, mamo mengo basolokoto ba oolo lya Babeli lichunguluwile Yelusalemu; na Yelemia mbuwa, gubele mmambwe milagala mwa ba balochi, libele umbele wa ndu gya oolo lya Yuda. ³ Bululil Sedekia oolo lya ba Yuda, gubele mmambwe, guganine, Bululi bwai mulihubuwa, na ugana MLUME gwagana bino, Lingamina, nibiya gino mbuga mnda maboo ma oolo lya Babeli, nage gwigiguha; ⁴ iyaka Sedekia, oolo lya ba Yuda, gushihogononwa uhuma mmaboo ma Bakaldayo, wa chigilwe gyage gwibiwa mnda maboo na oolo lya Babeli, gwidogoma nage anywa wa anywa, na meeso mage milola meeso mage; ⁵ nage gwim'bwta Sedekia numyicha Babeli, nage gubi uya ndaa na mengo mandimgila, MLUME gwagana, inangwa mwilwa na Bakaldayo mushibahima ata. ⁶ Yelemia guganine, Inywa ya MLUME yanjwila ugana, ⁷ Loola, Hanameli, mwaana gwa Shalumu, mmwabo, gwichwa, gwigana, Uligulile lubala lwanyi lwine luli uya Anathothi; bululi kiine gya buhyana ii bobe,ulugule. ⁸ Haho Hanameli, mwaana gwa mmwetu, gunjwilile mlagala lya kalochi, ulamana na iya inywa ya MLUME, gusambile, Ibumbu ino, ulugule lubala lwanyi luli uya Anahtothi, mnda sii gya Benjamini; bululi kiine gya buhyana ii bobe, na kiine gya uhogonona ii gyobe; uligulile. Haho noo handimanine ugana ino inywa ii inywa ya MLUME. ⁹ Bibyo nilugulile luya lubala lwine lubele uya Anathothiwa Hanameli, mwaana gwa mmwetu, nim'balile bumona bwage, Shekeli umi cha lufeza. ¹⁰ Nene nigolile u guya mkanda, na ubiya yaala, nigitile babangisiyi, nim'biile buya bumona u kilo. ¹¹ Niguhile guya mkanda gwa ugula, guya gubiilwe yaala nahi m'bindo gwa mishaminyi, na na luya lubele hululu; ¹² na guya mkanda gwa buguchi nimmele go Baluku, mwaana gwa Nelia, mwaana gwa Maaseya, umbele wa meeso ma Hanameli, mwaana gwa mmwetu, na umbele wa babangisiyi baya bene babiile byaala mkanda gwa buguchi, u mbele gya Bayahudi bose bene babele bashame u lagala lya balochi. ¹³ Nene nimlagile Baluku umbele wabo, niganine, ¹⁴ MLUME gwa basolokoto, Abetcha a Isilaeli, gwagana bino, Uguhe gino mikanda, mkanda guno gwa ugula, mkanda guno gubiilwe byaala, na guno gwine guli hululu nago, wagibiye mmitundu ya bitete, gyashame masugu meengi. ¹⁵ Bululi MLUME gwa bilume pambwa, Abetcha a Isilaeli, gwagana bino, Ndu na mabala na mabala ma mizabibu migulwa iyaka mnda gino sii. ¹⁶ haho handihyile uumaBaluku, mwaana gwa Nelia, mkanda guya gwa ugula, nimsabila MLUME, niganine, ¹⁷ Aa! MLUME Abetcha, loola, gogwe noo ubumbile gulu na sii, wa uosha obe waatana wa uboo obe uli ugololwe, hashi inywa ili igumu yoshinaosha; ¹⁸ gogwe usuleelela batu uki cha chiingi, usubaha bashibana usona wabo u byaali bya baana babo hanyuma habo; Abetcha ali aata, guli na uoma, MLUME gwa bilume pambwa noo china lyage; ¹⁹ mmata gwa mihungo, guswosha mnda ugila; guya mine meeso mage mmabulubu hegulu ha madila mose ma batu, umma kila mtu ulamana na ndila gyage, na wa ulamana na biguma bya bigilanywa byage. ²⁰ gogwe ugilile bisaga na bigagicha mnda sii gya Misilindaa na lusugu luno lwa lino, u ba Isilaeli na u bange batu; na uliitila china nahi byalili lino; ²¹ ubahuminye batu bobe, Isilaeli, mnda sii gya Misili, wa bisaga, na wa bigagicha, na wa uboo wine uli na uoma, na wa uboo wa ugololwe, na wa udanja boose; ²² ubahele gino sii, gyolibalahile bamasabo ugana wibaha, sii gyagigiluchu mabele na bui; ²³ nabo bagigingile, bagibagishamine; ata bibyo bashinyeminye liidi lyobe, na bashiwashiche m'bindo gobe; bashigilile inywa yobe yoyose yine yolibalagike baigile; bino, wa yulu ya iyo ibalo wachwisha usona uno ose hegulu habo; ²⁴ lingamina, migumbo gino; bagichwila mbuga gino yulu bagisape; na gino mbuga gyabiwa mnda maboo ma Bakaldayo bene balihulwa nabo, wa yulu ya ahilu, na ndala, na bisumi; na biya byolidogomine byagiliya; na loola, gogwe wabimona. ²⁵ Gogwe, Ee MLUME Abetcha, usambile, Ligulile luya lubala wa bumona, wabagite babangisiyi; inangwa gino mbuga byabiwa mnda maboo ma Bakaldayo; wi wii! Bibiwi? ²⁶ Haho noo inywa ya MLUME imchwilile Yelemia, ugana, ²⁷ Loola, nene noo MLUME, Abetcha a bose benebali na mibili; wi wii! Hali inywa yoyose ya igumu yine yandishi naosha? ²⁸ bino, MLUME gwagana bino, Loola, nibiya gino mbuga mnda maboo ma Bakaldayo,na mnda maboo ma Nebukadleza, oolo lya Babeli, nage gwigiguha. ²⁹ Na Bakaldayo bene bali hulwa na gino mbuga, biichwa, na ugibiya aahya gino mbuga, na ugichigya, hamwechi na madu magyo, hegulu ha butato hamo batambikile Baali buswebge, na na utuhongolwela byunywa tunge tubetcha, yulu ya unjigilicha. ³⁰ Bululi baana na Isilaeli, na baana ba Yuda, bagilile bya bisone kaa u mbele wa yeenyi yanyi, utula u buwalubaga bwabo; wa bululi ba Isilaeli basagacha yulu ya bigolanywa bya maboo mabo, MLUME gwagana . ³¹ Bululi gino mbuga noo gisili ibalo ya umbiya na sungu, na ibalo ysa uchigililwa wanyi, utulila luya lusugu lwabagigubaile ndaa na lino; yulu nagihunye gishibe iyaka umbele wa yenyi yanyi; ³² wa ibalo ya buubi bose bwa baana ba Isilaeli, na baana ba Yuda, bwabagilile yulu ya ungita nabe na sungu, boo, na maoolo mabo, na baosobu babo, na bibuli byabo na bambuwa babo, na batu ba Yuda na bashami ba Yelusalemu. ³³ Iyaka bangalwila kuungu chabo, na bishi byenyi byabo; inamgwa nibagigiche, nibyuwile umayaya na ubagigya, ata bibyo bashi bapuliche yulu bawashe lugigyo lwanyi. ³⁴ Bibyo babiile byuchigilcha mnda ndu gigisilwe wa china lyanyi, yulu ya ugigugicha. ³⁵ Iyaka bagubaile wihana ya iginyubu yulu ya Baali, haya noo ihana ya baana ba Hinomu, yulu ya ubachigya baana babo ba balumyana na ba baachana waahya yulu ya Moleki, ihisho yandishibaganine; na ishigingile mnda mtima gwanyi bululi bagile ubo ugugila; yulu bamlubye Yuda. ³⁶ Bino hano, MLUME, abetcha a Isilaeli, gwagana bino, yulu ya mwano gwa gino mbuga,giya gyine benywe muli hudogoma bino binywa yulu yagyo, Gyabiwa mnda maboo ma oolo lya Babeli, wa ahilu, na wa ndala, na wa bisumi; ³⁷ Loolwe, nimsumbicha, na ummunywa mnda bibaloo byose byine byandimchingile oo, yulu ya sungu chanyi, na unyogwa wanyi, na uchigililwa wanyi wiingi; nene nimchwisha iyaka ha ino ihana, nene nimshamya kolongecho. ³⁸ boo babi batu banyi na nene nibi Abetcha abo. ³⁹ nene nibaha mtima gumwechi na ndila gimwechi, bululi baanyemye amsugu mose; wa busoga bwabo, na bwa baana babo hanyuma habo. ⁴⁰ nene ibiya alago a milumbu hamwechi nabo, ugana nishigaluwa na nishibashiga, yulu nabagilile bisoga; nene nibiya iuku yanyi mnda mitima gyabo,yulu bashindei. ⁴¹ Ehe, niseelela yulu yabo nabagilile bisoga, nene nibauna mnda gino sii chigilwe, chigilwe, wa mtima gwanyi gose, na wa uunda wanyo ose. ⁴² Bululi MLUME gwagana bino, Nahi byandichwishiche buubi bwata buno bose hegulu ha bano batu, byoka biya nichisha hegulu habo busoga buno bose bwine bwandibalagile ubagila . ⁴³ Na mabala migulwa mnda gino sii, gyamulihulumbula, ugana, Ii mauwa, gishi na mtu, ata na nyama; gibiilwe mnda maboo ma Bakaldayo. ⁴⁴ batu bigula mabala wa bumona, bigola mikanda gyage, na ubiya byaala, na na ubagita babangisiyi, mnda sii gya Benyamini, na na mnda bihana byose byine bili ngubi chose cha Yelusalemu, na mnda sii gya Yuda, na mnda sii gyose gyine gili na tubandagulu, na mnda sii gya ibandabanda, na mnda sii gya Negebu; bululi nigiwicha bahambwa babo, MLUME gwagana.