¹ Mamo mengo, MLUME gwagana, nibi Abetcha a milongo gyose gya Isilaeli, nabo babi batu banyi. ² MLUME gwagana bino, Batu baya bene bashigilwe u ahilu babele na keeni mlwanaganywa; noo, Isilaeli haya handigile um'biya galituche. ³ MLUME gunjwilile aala, hudogoma, Ehe niuundile wa luundo lwa milumbu, noo yulu niuguhile wa yano yanyi. ⁴ Lwendo lwa bubili niugubaa, na gogwe wigubawa, Ee, inyundu ya Isilaeli lwendo lwa bubili witogolwa wa magoma mobe, na gogwe wimoneya u maina mabo bene bali huseelela. ⁵ Lwendo lwa bubili wiuna mizabibu hegulu ha koono cha Samalia; baunyi biuna, nabo biseelela biguma byago. ⁶ Bululi habi lusugu lumwechi, haho balochi bilila hegulu ha tubandagulu twa Eflaimu, Ginyuwe, twagye Sayuni, wa MLUME Abetcha etu. ⁷ Bululi MLUME gwagana bino, Mgimbilwe Yakobo wa saaso, mumtele bigelegele mmosobu gwa mioga, lisambwe, tonywe, mwadogome, Ee MLUME, ubahogonone batu bobe, mihona gya Isilaeli. ⁸ Loolwe, nimchwisha uhuma sii gya lubi lwa oboo wa uachi, na umsumbicha uhuma bisula byose bya ibaloo, na hamwechi nabo bichwa ba bihobu, na baya bene bali huchuliya, mmachana gwa gumo na guyaguli na busungu bwa ubuta; bigiwila ubo ihichi yaata, ⁹ Bichwa bali hulila, na wa usaba nibagolwela; nibahyicha wine uli ngudi cha maadi, mnda ndila gya gigolobu; na mnda gigyo ndila bashihyatala; bubluli nene noo sage na Isilaeli, na Eflaimu noo bubele bwabyi bwa ubuta. ¹⁰ Ihulichiwe inywa ya MLUME,benywe ba mioga, ilisambwe u bichiba bya koo; mwagane, Gumsalile Isilaeli noo gwimsumbicha, na ummusa, nahi mmushi byesuusa ihichi yage. ¹¹ Wa bululi MLUME gwammumya Yakobo mnda ihambo, gwammogonona uhuma mnda maboo ma guya gubele na uoma ummima gee. ¹² Nabo bichwa, na ugimba hegulu ha loono lwa Sayuni, bisinina yano ya MLUME, biliwa, na divai, na mauta, na miyoo gya gichogicho na ng'ombe; na mitima gyabo gibi nahi lubala lwa lubiwe maadi; na bashichigilwe iyaka abisa, na umona inyokolo. ¹³ Hahi inyundu yiseelela na uina, na bawalubaga na bauulu hamwechi; bululi nigalula ulila wabo uba saaso, nene nibahungya, na ubabiya na saaso baliye ulila wabo. ¹⁴ Nene nigyusha mitima gya bibuli wa unona, na batu banyi bigyuta wa misa gyanyi, MLUME gwagana. ¹⁵ MLUME gwagana bino, Liidi lyahulichiwa Lama, ulila, ma malilo meengi, Laeli gulihulilila baana bage; gushihuoleya uhungiwayulu ya baana bage, yulu bashiho, bawile guno ii Laeli mmachi gwa Yakobo, gubele hulila Yusufu mengo melibushile Benoni nage nuuwa gumonene baana bage keene. ¹⁶ MLUME gwagana bino,Chibila liidi lyobe, ushiliile, na mmeeso mobe mushihuma byosochi; Bululi mgilo gobe gubi na alambwe, nabo bichwa itaka uhuma sii gya amangu; Bibyo noo bilihudogoma MLUME. ¹⁷ Iyaka hali maudagilo ha masugu mobe ma isula, MLUME gwagana; na baana bobe bigiwila iyaka ndaa na ulugumba lwabo boo bene. ¹⁸ Chigilwe nimlilile Eflaimu, guli hulilillila bino, Wakonona, na nene naononywa, nahi mwana ng'ombe gushigwammolobele mti gwa uhamba oshi; ungalule, na nene nigalulwa; bululi gogwe uli MLUME, abetcha anyi. ¹⁹ Chigilwe hanyuma ha ugalulwa wanyi, nilibechiche; na hanyuma ha ugigiwa wanyi, nilihulile u tango; nimonine abule, ehe, nidambile mme, wa yulu niswalile abule a buwalubaga bwanyi. ²⁰ Wi wii! Eflaimu gushi noo mwananyi kunjwa? Wi wii! gushi mwaana gusuunjwa? Bululi hohose hene handisudogoma inywa yulu yage, nili huengelecha abisa; wa yulu ya iyo ibalo mtima gwanyi gulihususuwa abisa yulu yage; hashi ata adugwa nimleelela, MLUME gwagana, yulu Eflaimu ii mwanage gwa bubele. ²¹ Libiile mgwalo gwa ndila; uliitile miti gya uugolwela; mtima gobe gulole wine uli ndila gya gyata, gyoka giya ndila gyoligilile; giwila iyaka, Ee inyundu ya Isilaeli, ugiwilile mano mabuga mobe. ²² Ata mengo nayi wilugila-lugila, Ee inyundu yine ili na lubengo? Wa bululi MLUME gwabumba ihisho ya ihya mmibaloo; mmachana gwimmusa mlumyana. ²³ MLUME gwa bilume pambwa Abetcha a Isilaeli, gwagana bino, Bidogoma iyaka ino inywa mnda sii gya Yuda, na mnda mabuga mage, handigiwicha kole chabo; MLUME na guhalile mihaa, Ee bushamo bwa kiine, Ee loono lwa buhaha. ²⁴ Na Yuda, na mabuga mage mose, bishama mo hamwechi; balimi, nabo bene balihugya ubo na ubo hamwechi na bihichi byabo. ²⁵ Wa bululi nigyusha mtima gwine guli na uima, nene natolelecha kila mtima gwine guli na malilo. ²⁶ Bino, nibyuwile, nilingamine; na tulo twanyi tubele busoga abisa wandi. ²⁷ Loola, masugu malihuchwa, MLUME gwagana, handigubaa ndu gya Isilaeli, na ndu ya Yuda, ibushi ya batu na ibushi ya nyama. ²⁸ Iyaka, habi, wa ulamana na byandimmolile, yulu ya uchula, na ubela, na ugwisha, na udiga na ususula; wa ulamana byoka biya nimlingamina, yuli ya ugubaa, na uuna, MLUME gwagana. ²⁹ Maya masugu bashigana iyaka Bashibaana baaya zabibu cha bwine, na meeno ma baana mahubiwa bigigili. ³⁰ Bibyi kila mtu gwiiwa yulu ya buubi bwage ge mine, mtu gegese mine gwiiya zabibu cha bwine, meeno mage noo mimina bugigili. ³¹ Lingamina, handiita alago aahya na ndu gya Isilaeli, na ndu gya yuda. 32 Ushi wa mlingolisho gwa aya andiitile na bamasabo, ha maya masugu mandibawatile uboo, yulu ya ubahunya nda sii gya Misili; uya wine wababelile alago anyi, inangwa nibele mlumyabo, MLUME gwagana. ³³ Bino, ano alago noo andiita na ndu gya Isilaeli, hanyuma ha masugu maya, MLUME gwagana, Nibiya m'bindo gwanyi mnda mwabo, na mnda mitima gyabo nigugola; nene nibi Abetcha abo nabo babi batu banyi. ³⁴ Ata bibyo hashi mtu gwigigya m'binji nage, na ata mtu na mshiwabo, balihudogoma, Mmane MLUME; bululi biimana bose, utula mwanaalela hawingi habo ndaa na mtu gwa akungulu hawunhi habo.. MLUME noo gwagana bibyo; bululi nileelela usona wabo, na ata buubi bwabo nishibuengelecha iyaka. ³⁵ MLUME gwagana bino, gusubaha batu chuba, yulu libe lwenge mengo ma mchuba, na alago a mwechi na tumbala-mbala, yulu ya uba lwenge mengo ma busugu, gususubula bahali, na ata mabimbi mage masututa; MLUME gwa bilume pambwa noo china lyage; ³⁶ Alago ano ahume ashibe umbele wanyi, MLUME gwagana, haho noo ibushi ya Isilaeli nabo bilewa bashibe iyaka mmoga umbele wanyi milumbu. ³⁷ MLUME gwagana bino, Nambo gulu linaoshiwa ulingililwa, na mshingi gwa ibaloo gunaoshiwa umanywa haguli ubo usi, haho noo hene habitelwa koo ibushi ya Isilaeli nayoniitela koo, yulu ya biya byabagilile, MLUME gwagana. ³⁸ Loola, masugu mali huchwa, MLUME gwagana, gino mbuga gyigubawa wa yulu ya MLUME, uhuma u mgumbo gwa Hananeli ndaa na u mchango gwa habamba. ³⁹ Na mgochi gwa gwupimina gwigililila ndaa na u loono lwa Galebu, iyaka gwichunguluwa na uhiya Goa, ⁴⁰ Na ibetabeta yose ya bitumba, na mto, na mabala moose ndaa na u luudi Kidloni, ndaa na usunga lya mchango gwa falasi, luubi lwa mlugulu, haho hose habi hahaha ha MLUME; hashichulwa, na hashibelwa ata milumbu.