¹ Ino inywa noo imchwilile Yelemia, uhuma wa MLUME, ugana, ² MLUME Abetcha a Isilaeli, gwagana bino, ugana, Ubigole mmitabo bino binywa byose byandusambila. ³ Bululi, loola, masugu malihuchwa, MLUME gwagana, mandibagiwicha batu banyi Isilaeli na Yuda bene bahambilwe, MLUME gwagana; nene nibagiwicha ndfaa na sii giya gyandihele bamasabo, nabo bigihyilila. ⁴ Na bino noo binywa bidogomine MLUME, yulu ya mwano gwa Isilaeli na yulu ya mwano gwa Yuda. ⁵ Bululi MLUME gwagana bino, Tuhuliche liidi lya ititicha na lya udidibuwa, na lishi lya talala. ⁶ Buchiwe hano, mwamone ugana mlumyana gulihumona busungu bwa bubushi; yulu yai, bino, namona kila mtu gwaliwata maboo mage mlubunda, nahi mmachana mine gwina busungu, na byenyi byose byagaluwa langi. ⁷ Luhanga lubi! Bululi lusugu luya ii lwata, na hashi lunge lunalingilishiwa nalo, bululi ii mengo ma asusu age Yakobo; ata bibyo gwihogononywa nalo. ⁸ Na habi luya lusugu, MLUME gwa bilume pambwa gwagana, niinoga mti gwa uhamba mioshi guhume mioshi mwage, na nene nibele bihambo byage; na ata bagenyi bashimgidicha iyaka; ⁹ haho bimgilila MLUME Abetcha abo, na Daudi oolo lyabo, gwadiginuna yulu yabo. ¹⁰ Wa bululi bwa bibyo ushimone booba, Ee Yakobo, mgichi gwanyi, MLUME gwagana; na ushidambe mme, Ee Isilaeli; bululi, loola, niuhogonona uhumina koo, ibushiyobe uhuma sii gya ubululwa wabo; na Yakobo gwigiwila, nage gwisengamana, na ulitucha, na hashibi mtu gwim'babula. ¹¹ Bululi nene nili hamwechi nobe, MLUME gwagana, nuhogonone; bululi nibaonona abisa mioga gyose gya uya wine wandi usambaleche, ata bibyo nishiuonona gogwe abisa; mndi niugiwicha wa bihulo, sangulo, na nishiuleya bunene wa nangu uuhula. ¹² Bululi MLUME gwagana bino, Usuma obe ushihuhona, na malase mobe ii mata. ¹³ Hashi mtu guudogomena; u malase mobe hashi buganga bwa buuhonya. ¹⁴ Bose bene basuunda bugibilila; bashihuuenga; bululi nubongola wa malase ma amangu, wa uhulwa wa mtu gwa lubengo; wa ibalo ya bwata bwa usona obe, wa yulu ya buubi bobe bubele hubula. ¹⁵ Yulu yai ulihulilila usuma obe? Ushihuhona usuma obe; wa ibalo ya usona obe,wa yulu ya buubi bobe chabula, nuugila bibyo. ¹⁶ Bino, batu bose biuya gogwe nabo biliwa; na tumangu tobe tose bigya uhambwa; kila gumwechi gwabo; na baya buuwatile kole biwaswa kole; na bose bene buuhibile nibaita uba buhibi. ¹⁷ Bululi niugiwidicha mgoma gobe, nene niuhonya malase mobe, MLUME gwagana, wa ibalo buugita bitelwa, balihudogoma, Ii Sayuni, hashi mtu guli hugibenja. ¹⁸ MLUME gwgana bino, Loola, nigiwicha iyaka bitula bya Yakobo byine bibululwe; na ubomonena keene bushamo bwage; nagyo gigyo mbuga gyigubawa hagulu ha bibunduguchu byagyo, nagyo ndu gishaminywa nahi nishaminyi gyagyo. ¹⁹ Iyaka wabo wihulichiwa liidi lya utona, na liidi lya usasamuwa; nene nibagubiya, na bashibi bachoo; iyaka nibaginuna, na bashibi tulema. ²⁰ Baana babo nabo babi nahi aala, na sumbilo lyabo lyimanyiya wandi, nene nibaonona bose bene bali hummonene. ²¹ Na mmela gwabo gubi mtu gwabo bo bene, na guya guhyilila gubi mtu gwa mlingo gwabo bo bene; nene nimgaa wandi, nage gwipyila; bululi mnanyi guli na mtima gwa uosha upyila? MLUME gwagana. ²² Na benywe mubi batu banyi, na nene nibi Abetcha enyu. ²³ Loolwe, isukushi ya MLUME, noo, uambila wage, yachwa isukishi ya usinga; yibagwila basone u miswe. ²⁴ Sungu cha buhuchi bwa MLUME chishigiwila, ndaa na byelihwa ugila, ndaa na byelihwa uwilicha malanga ma mtima gwage; mwimana bibyo ha masugu ma isula.