¹ Bino binywa noo binywa bya mkanda, gwine guhilile mbuwa Yelemia u Yelusalemu, uli baya bene bashigele u bauulu bene bawaswilwe kole, na u ba bibuli, na u ba mbuwa, na u batu bose, baya bene bawaswile na Nebukadleza uhuma Yelusalemu nubahyicha Babeli; ² (haha habahwile uhuma Yelusalemu Yekonia oolo, na mnage na oolo, na bene bashibagya u baachana, na bauulu ba Yuda na Yelusalemu, na beeno, na batumbi;) ³ wa uboo wa Alasa, mwaana gwa Shafani, na Gemalia, mwaana gwa Hilkia, ( baya bene Sedekia oolo lya Yuda, belitumine ugya Babeli, wa Nebukadleza, oolo lya babeli), ugana, ⁴ MLUME gwa basolokoto, Abetcha a Isilaeli, gwabasambila bino batu bose bene bawaswilwe kole, bandiitile bawaswe uhuma Yelusalemu ndaa na Babeli; ⁵ Gubawe ndu, mwashame mwagili, unywe mabala mwaye biguma byage. ⁶ gonjwe baachi, mwabute bawalubaga na bawamisiha; mwabagondele baachi baana benyu, mwagonje misiha gyenyu; baabute bawalubaga na bawamisiha; mwabuule ubo na mushihunguwe. ⁷ Mwagihalile mihaa na talala mbuga giya, gyamwiwaswa kole, mwagisabile wa MLUME; bululi yulu ya talala gya mbuga gigyo na benywe mwiba na talala. ⁸ Bululi MLUME gwa basolokoto, Abetcha a Isilaeli gwagana bino, Bambuwa bene bali hawingi henyu, na balisambi benyu, bashi m'biche benywe, na mushihuliche malo menyu, mamusulota. ⁹ Bululi wa china lyanyi musubuwa binywa bya lulimi wamli; nene nisabahila MLUME gwgana. ¹⁰ Bululi MLUME gwagana bino, Babeli hagyiwilichiwa myaa maumi njwii, nimchwila , na uiwilicha inywa yanyi ya isoga wenyu, yulu ya umgiwicha ha ino ihana. ¹¹ Bululi nene nigibi malanga mandihumlangila benywe, MLUME gwagana, ii malanga ma talala na mashi mamadogu, uumma benywe maudagilo masugu menyu ma isula. ¹² Benywe mwingita, mwigya na uusaba, nene nimmulicha. ¹³ Benywe mwikenga na mwimona, hamwikenga wa mtima gwenyu gose. ¹⁴ Nene nimoneya wamli, MLUME gwagana, nene nibagiwicha batu benyu bene bahambilwe, na nene nimsumbicha, nimmumya mnda mioga gyose, na mnda bihana byose, wine wandimchingile, MLUME gwagana; nene nimchwisha iyaka, ndaa na ihanayandiitile muwaswe kole. ¹⁵ Bululi mwadogoma ugana MLUME gwatuginunina ba mbuwa ubo Babeli. ¹⁶ Bululi MLUME gwagana bino, yulu ya mwano gwa oolo lyine lili lishame wisuba ya buoolo bwa Daudi, na yulu ya mwano gwa batu bene bali bashame mnda gino mbuga, bashiwenyu bene bashigile hamwechi nenyuuhambwa. ¹⁷ MLUME gwa bilume pambwa gwagana bino, Loolwe, nilusha hegulu habo ahilu, na ndala, na bisumi, nene nimmita uba nahi tini cha chibochu, chine chishinaoshiwa uliwa, wa yulu ii chibochu abisa. ¹⁸ Nene nibalaminina na ahilu, na ndala na bisumi, na nene nibahumya batelwe ubo na uya mnda buoolo bose bwa ibaloo, babe itu ya ulogwa na ya ugagicha, na ya ushigwa yoga, na ya uambilwa na bato bose, na mnda mioga gyose gyine gyandibachingile oo. ¹⁹ Wa iyo ibalo bashihuliche binywa byanyi MLUME gwagana, byine byanditumune bagichi banyi, baba bambuwa, nibele hubyuwa u mayaya, na ubatuma, ata bibyo mushiundile uhulicha binywa byanyi, MLUME gwagana. ²⁰ Bino, ihulichiwe inywa ya MLUME, benywe bose bene bawachilwe kole, bandihuminye Yelusalemu ndaa na Babeli. ²¹ MLUME gwa bilume pambwa, Abetcha a Isilaeli, gwagana bino, yulu ya mwano gwa Ahabu, mwaana gwa Kolaya, na yulu ya mwano gwa Sedekia, mwaana gwa Maaseya, bene bali hum'bwiila benywe bunywa bya lulimi wa china lyanyi; Loolo, nibabiya mnda maboo ma Nebukadleza oolo lya Babeli, nage gwibahaga u meeso menyu. ²² Iyaka yulu ya mwano gwa uloga byigilwa u bahambwa ba Yuda, bene bali Babeli, ugana, MLUME guite ube nahi Sedekia na ube nahi Ahabu, baya bene oolo lya Babeli gubahagile wa uchigya mmaahya; ²³ wa bululi bagilile bya buhugi mnda Isilaeli, nabo baitile masei na baachi ba babinji nabo, nabo badogoma bunywa bya lulimi wa china lyanyi. byandishiganine nene; na nene noo gusumana, nene nili m'bangisii, MLUME gwagana. ²⁴ Na yulu ya mwano gwa Shemeya, Mnehelami, wigana, widogoma, ²⁵ MLUME gwa bilume pambwa, Abetcha a Isilaeli gwagana bino, ugana, wa china lyobe gogwe mine wabahilila mkanda batu bose bene bali Yelusalemu, na Sefania, mwaana gwa Maaseya, ibuli na bibuli byose, ugana, ²⁶ MLUME guubiya ibuli ha ihana ya Yehoyada, ibuli, bululi mube bagichi mnda ndu gya MLUME, wa mtu gegese mine gwina miishi, na wa mtu gegese mine gulihuliita uba mbuwa, um'biye mnda tumangila na ndemo. ²⁷ Yulu yai, bino, usammambila Yelemia gwa Anathothi, gwaliita uba mbuwa wamli, ²⁸ guya mine gwatuma batu watuli Babeli, ugana, Usasamuwa uno ii wa masugu meengi; gubawe madu, mwashame mnda mwamo; unywe mabala, mwaaye biguma byage. ²⁹ Na Sefania ibuli, gasungule guno mkanda u matu ma Yelemia mbuwa. ³⁰ Haho noo inywa ya MLUME ichwilile Yelamia, ugana, ³¹ Ubahilile mwano batu bose bene babululwe, ugana, MLUME gwagana bino, yulu ya mwano gwa Shemaya, Mnehelami; Wa ibalo Shemaya gwam'buwila benywe, ata bibyo nene nisamtuma, nage gwammudagicha inywa ya lulimi; ³² biino,MLUME gwagana bino, Loola, nimmonona Shemaya, Mnehelami, na ibushi yage; gushibi na mtu mine gwishama u bano batu, na gushimona busoga bwandigila batu banyi, MLUME gwagana; bululi gwadogoma binywa bya ubenga yulu ya MLUME.