¹ Utula wa uhyilila wage Yehoyakimu, mwaana gwa Yoasi, oolo lya Yuda, ino inywa ihimine wa MLUME, ugana, ² MLUME gwagana bino, Gimana mnda lagala lya ndu gya MLUME; wadogome na mabuga mose ma Yuda, bene basuchwa utambikila u ndu gya MLUME; udugome nabo bini binywa byandi huusambila ubasambile, ushichibile ata inywa imwechi. ³ Hange bihulicha, na ulibecha na mtu gegese uleya ndila gyage giibi; yulu na nene naalibeche uleya buubi bwandimlange ubagila, wa yulu ya usona wa bigilanywa byabo. ⁴ Na gogwe wibasambila, ugana MLUME gwagana bino, Nambo mushihubenja upulicha, ugyata mnda m'bindo gwanyi, gwandibiile umbele wenyu ⁵ uhulicha binywa bya bagichi banyi, bambuwa, bene bandihutuma wamli, ehe, nisugimana umayaya na ubatuma; bibyo benywe mushibahuliche; ⁶ bino, niita gino ndu uba nahi Shilo, na gino mbuga nigiita uba buloga u mioga gyose gya ibaloo. ⁷ Na ba bibuli, na ba mbuwa, na batu bose, bammuliche Yelemia, haho hene helidogomine bibyo bunywa mnda ndu gya MLUME. ⁸ Haho Yelemia helihwile usogoma bibyo binywa byose bimsambile MLUME ubasambila batu bose, mndi haho ba bibuli, na ba mbuwa, na batu bose, boo nuum'bwata, baganine, Hashi adugwa wiiwa. ⁹ Yulu yai ulihubuwa wa china lya MLUME, uligana gino Ndu gibi nahi Shilo, na gino mbuga gibi mauwa, gishi shaminywa na mtu? Batu bose bammongolwele Yelemia mnda ndu gya MLUME. ¹⁰ Na bahela ba Yuda habahuliche mwano gwa bibyo bihisho, batoboile mnda ndu gya oolo, bagile ndaa na undu gya MLUME; bashamine hasi, haya hene hasugingilila batu u mchango gwa guhya gwa ndu gya MLUME. ¹¹ Mndi haho bibuli, na ba mbuwa, babasambile baosobu na batu bose, baganine,Guno mtu gulingye uwa, wa ibalo gubuile yulu ya gino mbuga, nahi byamwahulicha wa matu menyu. ¹² Haho Yelemia gusambile baosobu bose na batu bose, guganine, MLUME noo gutumine ubuwa yulu ya gino ndu, nayulu ya gino mbuga, binywa bino byose byamwahulicha. ¹³ Bino hano, longiwe madila menyu, na bigilanywa byenyu, mwahuliche liidi lya MLUME, Abetcha enyu; nage MLUME gwilibecha yulu ya usona welidogomine yulu yenyu. ¹⁴ Bino, wandi nene, loolwe, nene nili hano mmaboo menyu; ngililwe byamulihumona bisoga u meeso menyu. ¹⁵ Itu imwechi mumanewinene ugana, m'bepaga, mwilichwishicha hegulu henyu maashi mashi na abachi mabi hegulu henyu, na hegulu ha gino mbuga, na hegulu ha bashami bage; bululi ii chigilwe MLUME gwatuma wamli, umsambila byose byamwahulicha. ¹⁶ Haho bauulu na batu bose babasambile ba bibuli, na ba mbuwa,baganine, guno Mtu gushilingye uhagwa; bululi gwadogoma netu wa china lya MLUME, Abetcha etu. ¹⁷ Haho bamwe batu hawingi ha bauulu ba sii, bachuwile, baganine na sumbilo lya batu, baganine, ¹⁸ Mikaya Mmolashti, gubuwile ha masugu ma Hezekia, oolo lya Yuda; gudogomine na batu bose ba Yuda, ugana, MLUME gwa bilume pambwa gwagana bino, Sayuni gyilimwa nahi bisulimwa lubala, na Yelusalemu yibi bibunduguchu, na loono lwa MLUME lubi nahi ihana ya iginyubu mmisowa. ¹⁹ Wi wii! Hezekia, oolo lya Yuda, na batu ose ba Yuda, bammagile Mikaya? Wi wii! Gushimnyeminye MLUME, na umsaba MLUME gamonye yano yage wabali; nage MLUME nuulibecha, gashibugile buya buubi bweliganine yulu yabo? Na beswe twisuba ugila buubibwata yulu ya mitima gyetu. ²⁰ Iyaka, habele na mtu gubuwile wa china lya MLUME, Ulia mwaana gwa Shemaya, gwa Kiliath-Yealimu; gee nage gubuwile yulu ya gino mbuga, na yulu ya gino sii, lulingo lumwechi na binywa bya Yelemia; ²¹ na Yehoyakimu, oolo, na bilume pambwa byage byose, na baosobu bage bose, habahuliche binywa byage, oolo gubenjiche ummaga; haho Ulia helihuliche mwano gumonine booba, gusinine gugile Misili. ²² Bino, oolo Yehoyakimu gutumine batu bagye Misili, Elmathani, mwaana gwa Akboli, na bange batu hamwechi nage, bagye Misili. ²³ Bam'bwatile Ulia uya Misili, bammiiche wa Yehoyakimu, oolo; nage gummagile wa ahilu, gumtelile itumba yage mnda sinda cha batu bene bashi na bisuba. ²⁴ Mndi haho uboo wa Ahikamu, mwaana gwa Shafani, ubele hamwechi na Yelemia, bashim'biye mnda maboo ma batu bammage.