¹ Utula uhyilila wage Sedekia, mwaana gwa Yosia, oolo lya Yuda, iyo inywa imchwilile Yelemia, uhuma wa MLUME, ugana, ² MLUME gunganine bino, Uliitile bihambo na mti gwa uhamba mioshi, wachwale mioshi. ³ Hanyuma wabihile uli oolo lya ba Edomu, na oolo lya ba Moabu, na oolo lya baana ba Amoni, na oolo lya Tilo, na oolo lya Sidoni, mmaboo ma bahilwa bene bihiya Yelusalemu wa Sedekia, oolo lya Yuda. ⁴ Wabalage bagye u balume babo, na ubasambila , MLUME gwa bilume pambwa, Abetcha a Isilaeli, agana bino, Mwibasambila balume bino binywa. ⁵ Nene nibumbile ino ibaloo, batu na nyama chine chili ha guno mgala, wa uosha wanyi wata, na wa uboo wanyi wa ugololwe; nene nisubaha batu nahi byandabenja. ⁶ Na bino, nabiwa sii gino gyose mnda uboo wa Nebukadleza, oolo lya Babeli, mgichi gwanyi; namma na nyama cha mgala chimgilile. ⁷ Na mioga gyimgilila gee, na baana bage, na baana ba baana bage, ndaa na mengo hamiwilila ma sii gyage gee, haho noo mioga giingi na maoolo mamata bimgilila gee. ⁸ Na habibi,mmoga guya na oolo liya lishibenja umgilila Nebukadleza, gugo oolo lya Babeli, na ubiya maishi mabo mnda mti gwa uhamba maoshi gwa oolo lya Babeli, nene niguhugumbila guya mmoga wa ahilu, na wa ndala, na wa bisumi, MLUME gwagana, na habyihyiila nibadiga wa uboo wanyi. ⁹ Bibyo wa mwano gwenyu, mushibahuliche ba mbuwa benyu, ata na buhana mwano benyu,ata na malo menyu, na bamana benyu, na bagabo bebyu, bene balihumsambila ugana Mushimgilila oolo lya Babeli; ¹⁰ bululi bali hum'buwila bya lulimi, yulu ya ummumya benywe koo na sii gyenyu; namchinge mwawe. ¹¹ Bibyo mmoga guya gwine gwibiya maoshi mabo mnda mti gwa uhamba maoshi gwa oolo lya Babeli, na umgilila, mmoga gugo niguleya gushame mnda sii gyabo bo bene, MLUME gwagana; nabo bilima, na ushama mnda mwagyo. ¹² Nimsambile Sedekia, oolo lya ba Yuda, wa mlingilisho gwa binywa bibyo byose, nihugana, Biiwe maoshi menyu mnda mti gwa uhahamba maoshi gwa oolo lya Babeli, mwamgile gee na batu bage, mwabe na mwego, ¹³ Yulu yai mulihuunda uuwa, gogwe na batu bobe, wa ahilu, na wa ndala, na wa bisumi, nahi biganine MLUME wa mwano gwa mmoga guya, gushiunda umgilila oolo lya Babeli? ¹⁴ Ata bibyo mushihuliche binywa bya ba mbuwabyabalihumsambila benywe, ugana, Mushimgilila oolo lya Babeli; bululi bali hum'buwila bya lulimi. ¹⁵ Bululi nene nisabatuma , MLUME gwagana, bino balihubuwa wa china lyanyi wa lulimi; naooshe umtobola hambuga, mwachimiwe, benywe, na bambuwa babo bene balihubuwa. ¹⁶ Itaka nidogomine na bibuli, na batu bose, niganine, MLUME gwagana bino, Mushihuliche binywa bya bambuwa benyu, bene balihum'buwila, baganine, Loolwe, bitundu bya ndu gya MLUME, hanyuma ha mengo macho, byilushiwa iyaka uhuma Babeli; bululi bali hum'buwila bya lulimi. ¹⁷ Mushibahuliche; mumgilie oolo lya Babeli, mwabe na mwego; yulu gino mbuga gwiiswa uba mauwa? ¹⁸ Na uba babo ii bambuwa, na uba inywa ya MLUME ili wabali, bino, na basabi uli MLUME gwa bilume pambwa, ugana bitundu biya byine bishigele mnda ndu gya MLUME, na mnda ndu gya oolo lya ba Yuda, na hano Yelusalemu, bishigye iyaka Babeli. ¹⁹ Bululi MLUME gwa bilume pambwa gwagana bino, wa yulu ya mwano gwa bihanda na mwano gwa bahalina wa mwano gwa matao magena mwano gwa mihona gya bitundu byine bishigele mnda gino mbuga, ²⁰ Byine Nebukadleza, oolo lya Babeli byeshiguhile, haya helimguhile Yekonia, mwana gwa Yehoyakimu, oolo lya Yuda, uhuma Yelusalemu ndaa na Babeli, hamwechi na bauulu bose ba Yuda, na Yelusalemu; ²¹ Ehe, MLUME gwa bilume pambwa, Abetcha a Isilaeli gwagana bino, yulu ya mwano gwa bitundu byine bishigele mnda ndu gya MLUME, na mnda ndu gya oolo lya ba Yuda, na hano Yelusalemu; ²² Byiguhwa ndaa na Babeli, nabyo byishaka uya, ndaa na lusugu luya lwandibigiwicha, MLUME gwagana; haho nii handibichwisha iyaka, na ubigiwicha ha ihana yabyo.